نۇر-سۇلتاندا تاپا-تال تۇستە بەيتانىس ادامدى توناپ كەتكەن ايەل ۇستالدى

نۇر-سۇلتان. قازاقپارات - نۇر-سۇلتاندا تاپا-تال تۇستە بەيتانىس ادامدى ۇرىپ-سوعىپ، توناپ كەتكەن ايەل ۇستالدى، دەپ حابارلايدى قازاقپارات قالالىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

باسپا ءسوز قىزمەتى تاراتقان مالىمەتتەرگە قاراعاندا، 34 جاستاعى كۇدىكتى ايەل كوشەدە بەيتانىس ايەلدەن قوڭىراۋ شالۋ ءۇشىن تەلەفون سۇراعان. الايدا ول تەلەفونىن بەرۋدەن باس تارتقان. وعان اشۋلانعان كۇدىكتى جابىرلەنۋشىگە دەنە جاراقاتىن سالىپ، قۇنى 100 مىڭ تەڭگە تۇراتىن «Samsung» ماركالى ۇيالى تەلەفونى بار سومكەسىن الىپ كەتكەن.

پوليتسيانىڭ حابارلاۋىنشا، كۇدىكتى بۇرىن دا ۇرلىق جاساعانى ءۇشىن قىلمىستىق جاۋاپقا تارتىلعان.

ەلوردالىق پوليتسەيلەر جەدەل-ىزدەستىرۋ شارالارى بارىسىندا كىسى توناپ، قىلمىسىن جاساعان كۇدىكتىنى ۇستادى. پوليتسياعا جەتكىزىلگەن ايەل جاساعان قىلمىسىن مويىندادى. سومكە مەن تەلەفون يەسىنە قايتارىلدى. «اتالعان فاكتى بويىنشا ق ر ق ك 188-بابى بويىنشا سوتقا دەيىنگى تەرگەۋ امالدارى جۇرگىزىلۋدە. ۇستالعان كۇدىكتىنىڭ ەلوردا اۋماعىندا بۇرىن جاسالعان ۇقساس قىلمىستارعا قاتىستىلىعى انىقتالۋدا»، - دەلىنگەن حابارلامادا.

اۆتور: گۇلزات اقجولوۆا