يتبەگىلىك - بابادان قالعان اسىل مۇرا

None
None
نۇر-سۇلتان. قازاقپارات - ق ر مادەنيەت جانە سپورت مينيسترلىگى قازاقى تازى مەن توبەتتىڭ تۇقىمىن ساقتاپ، ولاردىڭ سانىن ارتتىرۋ جايىن نىقتاپ قولعا الماق. جىل سوڭىنا دەيىن كەشەندى جۇمىس جۇرگىزىلىپ، بولاشاقتا يتبەگىلىكتى ۇلتتىق سپورت قاتارىنا قوسۋ جوسپارلانىپ وتىر.

«تازى- توبەت- ءبورىباسار» قوعامدىق ۇيىمىنىڭ رەسمي ەمەس دەرەكتەرىنە سۇيەنسەك، ەلىمىزدە قازىرگى تاڭدا 40 مىڭنان استام تازى مەن توبەت بار ەكەن. نەگىزگى جۇمىس وسى قۇرىلىمدى اككرەديتاتسيالاۋ مەن الداعى ۋاقىتتا سپورت مەكتەپتەرىندە سەكتسيالار اشىپ، جاتتىقتىرۋشىلار مەن تورەشىلەردىڭ بىلىكتىلىگىن ارتتىرۋ بولىپ وتىر.

مەيرامبەك ماحامبەتوۆ، ق ر مسم ۇلتتىق سپورت تۇرلەرى جانە سپورتتا مۇمكىندىگى شەكتەۋلى تۇلعالارمەن جۇمىس باسقارماسىنىڭ باسشىسى:

«ۇلتتىق قۇندىلىقتاردىڭ نە ەكەنىن بىلگەندە شەشىم جاساۋ قيىن ەمەس. قازاق حالقىنىڭ ۇلتتىق قۇندىلىقتارىنىڭ ءبىرى تازى جانە توبەت. مەملەكەتتىك قولداۋ ارقىلى تازى جانە توبەتتى الەمگە جان- جاقتى تانىتۋ كەرەك.

يتبەگىلىك سپورت ءتۇرى رەتىندە تانىلعان جاعدايدا دەنە شىنىقتىرۋ جانە سپورت سالاسىنىڭ زاڭنامالارىنا سايكەس مەملەكەتتىك قولداۋلار كورسەتىلەدى. ياعني، سپورت جارىستارىنىڭ كۇنتىزبەسىنە ەنگىزىلەدى، بارلىق دەڭگەيدەگى جارىستار وتكىزىلەدى. وڭىرلەردەگى سپورت ۇيىمدارىندا يتبەگىلىك بولىمشەلەرى اشىلادى، جاتتىقتىرۋشىلارى شتاتتىق قىزمەتكە اۋىسادى، جاتتىقتىرۋشىلار مەن تورەشىلەر ينستيتۋتى قالىپتاسىپ، بىلىكتىلىگىن ارتتىرۋ كۋرستارى ۇيىمداستىرىلادى.

بۇگىندە ەلىمىز بويىنشا 21 مەملەكەتتىك سپورت مەكەمەلەرى ۇلتتىق سپورت تۇرلەرىن دامىتىپ جاتىر. ولاردىڭ ىشىندە، اتبەگىلىك جانە قۇسبەگىلىك قارقىندى دامىپ جاتىر. وسى پرينتسيپتەردى ەسكەرە وتىرىپ، الداعى ۋاقىتتا سپورتتىق يتبەگىلىكتىڭ تاريحي باستاماسىنا قول جەتكىزەمىز.

مينيسترلىك «قانسونار» ۇيىمى جانە «تازى، توبەت، ءبورىباسار» رەسپۋبليكالىق فەدەراتسياسى وكىلدەرىمەن بىرنەشە كەزدەسۋ ۇيىمداستىرىپ، بىلىكتى مامانداردان قۇرالعان ءجۇمىس توبىن قۇرۋ تۋرالى شەشىم قابىلدادى. يتبەگىلىكتىڭ باسىندا جۇرگەن ازاماتتار مەن ۇيىمداردىڭ باسىن قوسىپ، مەملەكەت تاراپىنان قاجەت قولداۋلاردى انىقتاپ، ناقتى جۇمىس جوسپارىن بەكىتۋ ماقساتى بار».

قانات احمەتوۆ، يتبەگى:

«قازاقتىڭ قۇماي تازىسى جوعالۋ الدىندا تۇرعان قۇندىلىقتاردىڭ ءبىرى. تازى مەن توبەت - اڭشىل يتتەردىڭ ەڭ اسىلى. ولار يىسپەن، ىزبەن قۋا الادى. تازىنىڭ وزىنە عانا ءتان ايلا- ءتاسىلى دە كوپ. يتبەگىلىك سپورت ءتۇرى رەتىندە تانىلسا ونى ساقتاپ قالۋعا كوپ كومەگى تيەدى. جاس بۋىن قۇماي تازىمەن بالا كەزىنەن تانىسسا، ولە- ولگەنشە بىرگە بولادى. ادامنىڭ اينىماس سەرىگىنە اينالادى.

قازىر يتبەگىلىكتى مەملەكەت قارجىلانبايتىن ۇيىمدار دامىتىپ وتىر. يتبەگىلىكتى سپورت تۇرىنە قوسۋ جولىندا «قانسونار» ۇيىمىنىڭ اشپاعان ەسىگى، قاقپاعان تەرەزەسى جوق. ولار تازى يتتەردى ىزدەستىرىپ، تىركەپ، قۇجات بەرۋدە. بۇگىنگە دەيىن 500 قۇماي تازىعا قۇجات جاسالدى.

بابادان قالعان اسىل مۇرانى ساقتاپ قالۋ، ونى جاس بۋىنعا جەتكىزۋ ءۇشىن قۇماي تازىنى قازاقى يت ەكەنىن دالەلدەپ، تىركەۋىمىز قاجەت. ودان كەيىن ۇلتتىق سپورت مەكتەپتەرىندە يتبەگىلىك ءبولىمىن اشىپ، مەملەكەت قاناتىنىڭ استىنا الۋى كەرەك.

بۇگىندە يتبەگىلىكتەن ءتۇرلى جارىستار ءوتىپ جاتىر. الايدا ونىڭ دەڭگەيى جوعارى دەپ ايتۋعا كەلمەيدى. يتبەگىلىك ونەرىنىڭ حال- جاعدايى ناشار. قازاق اتادان قالعان مادەني ءداستۇرىن ەشقاشان جوعالتپاعان. قازىر دە بار. ءبىراق سونىڭ باسىن بىرىكتىرەتىن كەز كەلدى. ۇكىمەت قولداۋىمەن يتبەگىلىك ونەرىن قايتا جانداندىرۋ قاجەت».

راۋان وقاس، سپورت جۋرناليسى:

«يتبەگىلىك قايتا قارقىن الىپ كەلە جاتىر. مەملەكەت قولداۋىمەن ارى قاراي جاندانا تۇسەدى دەپ ويلايمىن. تازىسىن تۇلكىگە، قارساققا، قويانعا سالىپ جۇرگەن ءبىراز يتبەگىلەردى تانيمىن. ونەرىمىزدى ۇلتتىق سپورت تۇرىنە قوسقان ءجون بولار. يتبەگىلىكتە وزگە سپورتتاعىداي باسەكە بار. دەگەنمەن الەم مويىنداسىن دەسەك، جوعارى دەڭگەيدە جارىستار وتكىزەمىز دەسەك كەيبىر تۇسىن قايتا قاراستىرۋ كەرەك».

يتبەگىلىك - بابادان قالعان اسىل مۇرا. ال الداعى ۋاقىتتا ۇلتتىق سپورت تۇرلەرىنىڭ قاتارىنا قوسىلسا، وندا وسى مۇرامىزدىڭ تاعى ءبىر جاڭارىپ، مەرەيى تاسىعانى ەمەس پە؟!

Massaget.kz


سوڭعى جاڭالىقتار