+7 (701) 759 90 19
-4 °С : نۇر-سۇلتان
-2 °С : الماتى
USD 432.23 EUR 506.79
RUB 5.45 CNY 64.44
جاڭالىقتار

مينيستر ورفاندىق اۋرۋى بار بالالاردى دارىمەن قامتۋدى ءوز باقىلاۋىنا الدى

29 قىركۇيەك 08:21
:ءبولىسۋ
مينيستر ورفاندىق اۋرۋى بار بالالاردى دارىمەن قامتۋدى ءوز باقىلاۋىنا الدى

نۇر- سۇلتان. قازاقپارات - بۇگىن دەنساۋلىق ساقتاۋ ءمينيسترى الەكسەي سوي ازاماتتىق قوعام، ۇكىمەتتىك ەمەس ۇيىمدار، قوعامدىق قورلار مەن قازاقستاننىڭ بارلىق وڭىرىندەگى دەنساۋلىق ساقتاۋ باسقارمالارىنىڭ وكىلدەرىمەن ورفاندىق اۋرۋعا شالدىققان بالالاردى ءدارى- دارمەكپەن قامتاماسىز ەتۋدەگى ماسەلەلەردى تالقىلادى، دەپ حابارلايدى قازاقپارات.

ەسكە سالساق، ورفاندىق اۋرۋعا قارسى پرەپاراتتار ماسەلەسى بۇعان دەيىن دە كوتەرىلگەن ەدى. بالالاردى ءتيىستى دارىمەن قامتۋداعى پروبلەما جونىندە بالا قۇقىقتارى جونىندەگى ۋاكىل ارۋجان ساين دابىل قاققان بولاتىن.

«ءبىز بۇگىن وتە ماڭىزدى ماسەلەنى قاراۋدامىز. بۇل كوپتەگەن فاكتورعا بايلانىستى جىلدار بويى ىسكە اسىرىلماي كەلگەن پروبلەما. وسى ماسەلەگە ەرەكشە كوڭىل اۋدارعىمىز كەلدى، ونى جۇيەلى شەشۋ ءۇشىن كەمشىلىكتەردى نەمەسە نورماتيۆتىك پروبلەمالاردى قاراۋىمىز ءتيىس»، - دەدى ا. سوي.

ورفاندىق اۋرۋلاردىڭ تىزىمىنە 59 نوزولوگيا كىرەدى. ءبىرىڭعاي ديستريبيۋتوردىڭ 2020 -جىلعا ارنالعان تىزىمىندە سيرەك كەزدەسەتىن اۋرۋلاردى ەمدەۋگە ارنالعان دارىلىك زاتتار مەن مەديتسينالىق بۇيىمداردىڭ 1415 اتاۋى بار. ونىڭ ىشىندە ستاتسيونارلىق كومەككە - 1177 اتاۋ، امبۋلاتوريالىق ءدارى- دارمەكپەن قامتاماسىز ەتۋگە - 649 اتاۋ ارنالعان. قازاقستان رەسپۋبليكاسىندا ديسپانسەرلىك ناۋقاستىڭ ەلەكتروندىق تىركەلىمىنىڭ دەرەكتەرى بويىنشا، 2020 -جىلعى 25 قىركۇيەكتە ورفاندىق اۋرۋلارى بار 13863 بالا ەسەپتە تۇر. مينيسترلىكتەن ءمالىم ەتكەندەي، ەلىمىزدە ورفاندىق اۋرۋعا شالدىققان بالالارعا ارنالعان ءدارى- دارمەككە قاتىستى ءبىرقاتار پروبلەما بار - كەيبىر پرەپارات تىركەۋدەن وتپەگەن، دارىلىك زاتتاردى ساتىپ الۋ ءۇشىن شەكتى باعا بەلگىلەنبەگەن، ءدارىنى جەتكىزۋ جولىنداعى كەدەرگىلەر، دەنساۋلىق ساقتاۋ باسقارمالارىنىڭ سالعىرتتىعى تاعى بار. سونداي- اق بۇگىنگى تاڭدا ورىن الىپ وتىرعان تاعى ءبىر پروبلەما - سيرەك كەزدەسەتىن اۋرۋلارى بار پاتسيەنتتەرگە قاجەتتى كوپتەگەن پرەپارات قازاقستاندا تىركەلمەگەن.

«بۇل ماسەلەنى ءبىز جىلدار بويى شەشە الماي كەلەمىز. اكىمدەرگە تالاي رەت حات تا جازدىق. ەندى دەنساۋلىق ساقتاۋ مينيسترلىگى جەرگىلىكتى اكىمدىكتەرگە ناقتى ۇسىنىس بەرسە. ويتكەنى اۋرۋ بالالاردى ءدارى- دارمەكپەن قامتاماسىز ەتۋگە جاۋاپتىلار جۇمىسىنا سالعىرت قاراعانى ءۇشىن جازالانۋى ءتيىس. اتا- انالاردان، قوعامدىق قورلاردان كەلگەن شاعىم، وتىنىشكە نەمقۇرايلى قاراۋعا بولمايدى. سونىمەن قاتار، ساياسي شەشىم قابىلداۋدى جانە بۇل ءدارى- دارمەكتى ءماجبۇرلى تۇردە تىركەۋدى سۇرايمىن» ، - دەدى بالا قۇقىقتارى جونىندەگى ۋاكىل ارۋجان ساين.

دەنساۋلىق ساقتاۋ ءمينيسترى بۇل ماسەلەنى، اسىرەسە وڭىرلەردە ەرەكشە باقىلاۋعا الۋ قاجەت ەكەنىن ەسكەردى.

«بىررەتتىك تاسىمال، تىركەۋگە قاتىستى پروبلەمالار بار - بۇل تازا بيۋروكراتيالىق راسىمدەر. سونداي- اق، لوگيستيكا ماسەلەسى دە بار. سوندىقتان ءبىزدىڭ مىندەتىمىز - دۇرىس جوسپارلاۋ جانە الدىن- الا بولجام جاساۋ. ءبىرىنشى كەزەكتە ءدارى- دارمەكتى جەتكىزۋ، بىررەتتىك تاسىمال بويىنشا ماسەلەنى شەشۋ كەرەك. ءبىز بۇل پرەپاراتتاردى ەرەكشە باقىلاۋعا الامىز. قازاقستانعا كەلگەن ءدارى- دارمەكتىڭ مۇمكىندىگىنشە تىركەۋدەن تەز ءوتۋىن قاداعالايمىز» ، - دەدى مينيستر.

سونداي- اق، ا. سوي بالالاردى ءدارى- دارمەكپەن قامتۋ ماسەلەسىنە قاتىستى وسىنداي كەزدەسۋلەر الداعى ۋاقىتتا تۇراقتى وتكىزىلەتىنىن ايتتى.


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات