ارقالىقتا قۇس تۇماۋىنان فابريكا قاڭىراپ قالدى
كاسىپورىن وكىلدەرىنىڭ ايتۋىنشا، باعىمداعى 500 مىڭ قۇستىڭ 414 مىڭى ولگەن.
قازىر فابريكا جۇمىسشىلارى ءوز كۇشتەرىمەن ولەكسەلەردى ورتەپ، زارارسىزداندىرۋمەن اينالىسىپ جاتىر. ارقالىق قۇس فابريكاسى قالادان 4-5 شاقىرىمداي جەردە جىراقتا. ساراپتاما قورىتىندىسىمەن قۇس تۇماۋى راستالعاننان كەيىن، كاسىپورىن ءبىر اپتا بۇرىن كارانتينگە جابىلىپ، كۇنى كەشە مىنانداي بلوك- بەكەت ورناتىلدى. فابريكا اۋماعىنا ءوز جۇمىسشىلارىنان باسقالارعا كىرۋگە قاتاڭ تىيىم سالىنعان. كىرگەن- شىققان كولىكتەردىڭ بارلىعى مىنا جەردە مۇقيات زالالسىزداندىرىلادى.
قۋاندىق عابسالىقوۆ، ارقالىق قالالىق اۋماقتىق ينسپەكتسياسىنىڭ باس مامانى:
- اعاشتىڭ ءۇيىندىسىن زالالسىزداندىرىپ، كۇنىنە ايىرباستاپ، جاڭادان ەرتىندى قۇيىپ، سونى اۋىستىرىپ وتىرامىز. قۇس شۋىنان قۇلاق تۇناتىن كەڭ قورالار بۇگىندە قاڭىراپ بوس تۇر. ءار جەردە تاۋ بولىپ ۇيىلگەن ولەكسەلەر. ۆەتەرينارلىق باقىلاۋ ينسپەكتسياسىنىڭ ماماندارى ساناپ شىعىپ، حاتتاما تولتىرعاننان كەيىن عانا ولگەن قۇستار ورتەلەدى. سول اۋماقتىق ينسپەكتسيادان ناقتى شىعىندى ءبىلۋ بىزگە مۇڭ بولدى. انىق نارسەنى قۇپيا قىلىپ كىمنەن جاسىرادى. سول جاعى تۇسىنىكسىز. ال جەرگىلىكتى اكىمدىككە قاراستى ۆەتەريناريا باسقارماسىنداعىلار مۇنداعى ناقتى جاعدايدان حابارسىز.
قاسقىرباي بەيسەنوۆ، وبلىستىق ۆەتەريناريا باسقارماسىنىڭ باس مامانى:
- بۇل جابىق نىسان بولىپ ەسەپتەلگەندىكتەن، بۇلارعا مەملەكەتتىك ۆەتەرينارلىق ينسپەكتورلار عانا كىرەدى. بۇل جابىق مەكەمە، سوندىقتان مۇنىڭ ۆەتەرينارلىق قىزمەتىن وزدەرىنىڭ ۆەدموستۆالىق قىزمەت جۇرگىزەدى. ءبىز بۇل جەردە ەندى ستاتيستيكا جونىندە ەسەپ الىپ وتىرامىز. ال فابريكا وكىلدەرى كامەرا الدىندا سويلەۋدەن باس تارتقاندارىمەن، قىرىلعان قۇستاردىڭ سانى 414 مىڭعا جەتكەندىگىن انىق ايتتى. ول قۇجاتتا دا كورسەتىلگەن دەيدى. ەندى ونىڭ ءبارىن قالپىنا كەلتىرىپ، ءوندىرىستى قايتادان ىسكە قوسۋعا كەمى 7-8 اي قاجەت ەكەن.
بۇل فابريكادان تىس ارقالىق قالاسىنا قاراستى فۋرمانوۆ جانە تسەليننىي اۋىلدارىندا سول كەسەلدەن بىرنەشە ءۇي قۇستارى ولگەن. قازىر ول ەلدى مەكەندەردە كارانتين جاريالاۋ ماسەلەسى قارالىپ جاتىر.
www.24.kz