كوشەدە ەسىنەن تانعان ەلوردا تۇرعىنىن توناپ كەتكەن

نۇر- سۇلتان. قازاقپارات - ەلوردادا كوشەدە ەسىنەن تانىپ قالعان ەر ادامدى توناپ كەتكەن. بۇل تۋرالى نۇر- سۇلتان قالالىق پوليتسيا دەپارتامەنتىنەن ءمالىم ەتتى، دەپ حابارلايدى قازاقپارات ءتىلشىسى.

«57 جاستاعى ازاماتتىڭ ايتۋىنشا، ول قاراساي كوشەسىمەن تەمىرجول ۆوكزالىنا قاراي جاياۋ كەلە جاتىپ، گاراجداردىڭ جانىندا كەنەتتەن ەسىنەن تانعان. ەر ادام نەدەن ەسىنەن تانعانىن ەسىنە تۇسىرە المادى. ءبىرشاما ۋاقىتتان كەيىن ەسىن جيعان ول قاسىندا بەيتانىس ەكى ادامنىڭ وتىرعانىن جانە قالتالارىن ءتىنتىپ جاتقانىن كورگەن. «نە ىستەپ جاتىرسىڭدار؟» دەگەن ساۋالىنان كەيىن كۇدىكتىلەر ونى سوققىعا جىققان. قالتاسىنان 30 مىڭ تەڭگە مەن ۇساق زاتتارىن الىپ كەتكەن. ءتىپتى، زارداپ شەگۋشىنىڭ شالبارىنان بەلدىگىن جانە كوزاينەگىن الىپ كەتۋدەن دە تارتىنباعان»، - دەدى دەپارتامەنتتەن.

ۆەدومستۆو مالىمەتىنشە، پوليتسيا قىزمەتكەرلەرى اتالعان قىلمىستى جاساۋ كۇدىگىمەن ەلوردانىڭ 26 جانە 36 جاستاعى تۇرعىندارىن «ءىزىن سۋىتپاي» ۇستادى. ۇستالعان كۇدىكتىلەردىڭ بۇعان دەيىن دە سوتتالعانى جانە قىلمىستىق جاۋاپكەرشىلىككە تارتىلعانى انىقتالدى. زاتتاي ايعاقتار مەن اقشا قاراجاتى تاركىلەنىپ، زاڭدى يەسىنە قايتارىلدى. كۇدىكتىلەر پوليتسيا دەپارتامەنتىنىڭ ۋاقىتشا وقشاۋلاعىشىنا قامالدى.

«اتالعان فاكتى بويىنشا ق ر ق ك 191-بابىمەن سوتقا دەيىنگى تەرگەۋ جۇرگىزىلىپ جاتىر. ۇستالعان تۇلعالاردىڭ بۇعان دەيىن ەلوردا اۋماعىندا جاسالعان وسىنداي قىلمىستارعا قاتىسى تەكسەرىلىپ جاتىر»، - دەدى پوليتسەيلەر.

اۆتور: مارلان جيەمباي