قازاقستاندىقتارعا كوپ قوناق شاقىرىپ، توي وتكىزۋگە رۇقسات بەرىلە مە

نۇر- سۇلتان. قازاقپارات - قازاقستاندىقتارعا كوپ قوناق شاقىرىپ، توي وتكىزۋگە رۇقسات بەرىلە مە؟ بۇل سۇراققا دەنساۋلىق ساقتاۋ مينيسترلىگى جاۋاپ بەردى، دەپ حابارلايدى قازاقپارات ءتىلشىسى.

قازاقستاندا كارانتين شەكتەۋى مەن تىيىمىنا قاراماستان وتكىزىلىپ، كورونوۆيرۋستىڭ تاراۋىنا سەبەپ بولعان تويلار قانشالىقتى ءجيى كەزدەستى؟ قازاقپارات اگەنتتىگىنىڭ بۇل سۇراعىنا مينيسترلىك تومەندەگىدەي جاۋاپ بەردى.

«توي، ەسكە الۋ شارالارىن (بانكەتتەر، ۇيلەنۋ تويى، مەرەيتوي، ەسكە الۋ) وتكىزۋ كورونوۆيرۋس ينفەكسياسىنىڭ تارالۋىنا سەبەپ بولدى دەپ تىكەلەي بايلانىستىرۋ مۇمكىن ەمەس. ويتكەنى اۋرۋ تاراتۋشى كىم بولعانىن، اۋرۋدىڭ ينكۋباتسيالىق كەزەڭى بارىن ەسكەرە وتىرىپ، جالپى تويعا بارىپ، جاپپاي اۋىرۋ فاكتىسى تىركەلمەگەنىن حابارلايمىز»، - دەپ جاۋاپ بەردى مينيسترلىكتەن.

قازىرگى تاڭدا حالىققا توي وتكىزۋگە رۇقسات بەرىلدى مە؟

بۇل سۇراققا جاۋاپ رەتىندە مينيسترلىك بۇعان دەيىن ەنگىزىلگەن تىيىم كۇشىندە قالعانىن ءمالىم ەتتى.

«قازاقستان رەسپۋبليكاسى باس مەملەكەتتىك سانيتاريالىق دارىگەرىنىڭ «كارانتيندىك شەكتەۋ شارالارى جانە ولاردى كەزەڭ- كەزەڭىمەن جەڭىلدەتۋ تۋرالى» 2020 -جىلعى 15- تامىزداعى №48 قاۋلىسىنا سايكەس وتباسىلىق، سالتاناتتى، ەستەلىك شارالارىن (بانكەتتەر، ۇيلەنۋ تويلارى، مەرەيتويلار، ەسكە الۋ)، ونىڭ ىشىندە ۇيدە وتكىزىلەتىن جانە ادامدار كوپ جينالاتىن وزگە دە ءىس- شارالاردى وتكىزۋگە تىيىم سالىنعان»، - دەلىنگەن جاۋاپتا.

كارانتيندى رەجيم كەزىندە قۇقىق بۇزىپ، توي نەمەسە ەسكە الۋ شاراسىن جاساعان تۇلعالارعا اكىمشىلىك كودەكستىڭ 425-بابىنىڭ 1-تارماعىنا سايكەس اكىمشىلىك ايىپپۇل قاراستىرىلعان.

ايتا كەتسەك بۇعان دەيىن توي نەمەسە ەسكە الۋ شاراسىن وتكىزگەن مەيرامحانا يەلەرى مەن جەكە ادامدار قالاي جازالاتىنىن ەسكەرتكەن ەدى.

اۆتور: ايان بەكەن ۇلى