پاۆلودار وبلىسىندا بىرنەشە مەكتەپتىڭ وقۋشىلارى كوروناۆيرۋس جۇقتىرىپ الدى
نۇر-سۇلتان. قازاقپارات - «پاۆلودار وبلىسىندا 2020 -جىلدىڭ 1-قىركۇيەگىنەن بەرى COVID-19 جۇقتىرۋدىڭ 78 جاعدايى تىركەلدى. ولاردىڭ 17 جاعدايى - 18 جاسقا دەيىنگى جاستار، 11 ى - مەكتەپ جاسىنداعى بالالار. اۋدانداردى جەكە قاراستىرعاندا، شارباقتى اۋدانىندا - 5، پاۆلودار قالاسىندا - 5، اقسۋ قالاسىندا 1 جاعداي تىركەلگەن»، - دەپ حابارلايدى پاۆلودار وبلىستىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى.
دەپارتامەنتتىڭ حابارلاۋىنشا، 23-قىركۇيەك كۇنى شارباقتى اۋدانىنداعى الەكسەيەۆ ورتا مەكتەبىنىڭ باستاۋىش سىنىپ وقۋشىسىنان COVID-19 اۋرۋىن جۇقتىرۋدىڭ العاشقى جاعدايى تىركەلگەن.
«24-قىركۇيەكتە اتالمىش مەكتەپتە اۋرۋ جۇقتىرعان بالامەن بايلانىستا بولعانداردى زەرتتەۋ بارىسىندا باستاۋىش بلوكتاعى تاعى ءۇش بالانىڭ كوروناۆيرۋس جۇقتىرعانى بەلگىلى بولدى. بالالاردىڭ جاعدايى قاناعاتتانارلىق. شاعىم جوق، اۋرۋ ۆيرۋس بەلگىسىنسىز ءوتىپ جاتىر. ءتورت بالادان كوروناۆيرۋس انىقتالعاننان كەيىن 25-قىركۇيەكتە مەكتەپ كارانتينگە جابىلدى»، - دەلىنگەن حابارلامادا.
سونىمەن قاتار 25-قىركۇيەك كۇنى شارباقتى اۋدانىنىڭ قوسقۇدىق اۋىلىندا تۇراتىن ءبىر بالادان COVID-19 اۋرۋى انىقتالعان. بالا اباي اتىنداعى ورتا مەكتەپتە قاشىقتان ءبىلىم العان. وسىلايشا شارباقتى اۋدانىندا كوروناۆيرۋس جۇقتىرعان بالالاردىڭ سانى بەسكە جەتىپ وتىر.
«كەشە، ياعني 27-قىركۇيەكتە پاۆلودار قالاسىندا مەكتەپ وقۋشىلارىنىڭ COVID-19 جۇقتىرۋىنىڭ تاعى ەكى جاعدايى تىركەلدى. وبلىستاعى الەكسەيەۆ اتىنداعى ورتا مەكتەپ پەن №10-مەكتەپ- ليتسەيدە ەپيدەمياعا قارسى شارالار وتكىزىلدى: جوسپاردان تىس تەكسەرۋ جۇرگىزىلىپ، سانيتاريالىق- ەپيدەميولوگيالىق شارالاردى وتكىزۋ تۋرالى قاۋلى شىعارىلدى، دەزينفەكسيا جۇمىستارى جۇرگىزىلدى. اۋىرىپ قالعان بالالاردىڭ جەتەۋى COVID-19 بويىنشا تەستتەن ءوتۋ كەزىندە، ءبىر بالا پروفيلاكتيكالىق ماقساتتاعى زەرتتەۋ كەزىندە، ءۇش بالا وزدىگىمەن كەلگەن كەزدە انىقتالدى. بەس بالا اۋرۋدى جەڭىل تۇردە، ال التاۋى سيمپتومسىز وتكەرىپ جاتىر. قازىر ولاردىڭ جاعدايى جاقسى. التى بالا ءۇي كارانتينىندە امبۋلاتوريالىق ەم الۋدا»، - دەپ حابارلايدى دەپارتامەنتتەن.
اۆتور: ايان بەكەن ۇلى