تارازدا شەرحان مۇرتازا تۇرعان ۇيگە ەسكەرتكىش-تاقتا ورناتىلدى

تاراز. قازاقپارات - تارازدا قازاقستاننىڭ حالىق جازۋشىسى، مەملەكەتتىك سىيلىقتىڭ لاۋرەاتى شەرحان مۇرتازا تۇرعان ۇيگە ەسكەرتكىش-تاقتا ورناتىلدى، دەپ حابارلايدى قازاقپارات ءتىلشىسى وبلىس اكىمدىگىنىڭ رەسمي سايتىنا سىلتەمە جاساپ.

جازۋشىنىڭ دۇنيە ەسىگىن اشقان كۇنى قارساڭىندا تاراز قالاسىنداعى «استانا» شاعىن اۋدانىنداعى ءوزى تۇرعان 7-ۇيگە ەسكەرتكىش تاقتا ورناتىلدى. قالامگەر بۇل ۇيدە 2009-2013 -جىلدارى تۇرعان. اتالعان بەلگىنىڭ ورناتىلۋىنا جامبىل وبلىستىق مادەنيەت، ارحيۆتەر جانە قۇجاتتاما باسقارماسىنا قاراستى شەرحان مۇرتازا اتىنداعى رۋحانيات جانە تاريحتانۋ ورتالىعى ۇيىتقى بولدى.

شارادا وبلىس اكىمىنىڭ ورىنباسارى ەرجان جىلقىبايەۆ ءسوز سويلەپ، شەرحان مۇرتازانىڭ قازاق ادەبيەتىندە وزىندىك ورىنى بار تۇلعا ەكەنىن، ۇلت قايراتكەرىنە ارنالىپ ەسكەرتكىش- تاقتانىڭ اشىلۋى ۇرپاق ءۇشىن ۇلاعاتتى ءىس ەكەنىن باسا ايتتى.

بۇدان كەيىن سالتاناتتى تۇردە وبلىستىق ارداگەرلەر كەڭەسىنىڭ ءتوراعاسى ەركىنبەك سولتىبايەۆ، تاراز قالالىق ءماسليحاتىنىڭ حاتشىسى باتىربەك قۇلەكەيەۆ، جازۋشىنىڭ نەمەرە ءىنىسى ءاليجان مۇرتازانىڭ قاتىسۋىمەن ەسكەرتكىش-تاقتانىڭ لەنتاسى قيىلدى. ولار ءسوز الىپ، ايگىلى قالامگەر تۋرالى ورامدى وليرانى ورتاعا سالدى.

ەسكە سالساق، بۇگىن - مۇحتار اۋەزوۆ، شەرحان مۇرتازا جانە ورالحان بوكەيدىڭ تۋعان كۇنى.