الماتىدا تۋريستەر اراسىندا جاراقات الۋ جاعدايلارى كوبەيىپ بارادى

الماتى. قازاقپارات - الماتىدا قۇتقارۋشىلار تاۋعا شىققاندار اراسىندا جاراقات الۋشىلار كوپ بولعانىنا الاڭداپ وتىر، دەپ حابارلايدى قازاقپارات ءتىلشىسى.

ءبىرىڭعاي ديسپەتچەرلىك قىزمەتكە 28-قىركۇيەككە دەيىن 37 رەت قوڭىراۋ تۇسكەن.

جىل باسىنان بەرى قۇتقارۋشىلار بيىك تاۋ شىڭىنان 4 ادامدى قۇتقارىپ، قايتىس بولعان 1 ادامدى ءتۇسىردى.

بارلىعى وسى ۋاقىت ارالىعىندا تاۋدا اداسقان، جاراقات العان 68 تۋريست قۇتقارىلدى.

27-قىركۇيەكتە تۇسكى 15:30 تە «109» قىزمەتى مەدەۋ تاۋ شاڭعىسى كۋرورتى ماڭىنداعى «گورەلنيك» سارقىراماسى ماڭىندا 55 جاستاعى ايەلدىڭ اياعىن قايىرىپ العانى تۋرالى حابارلاما ءتۇستى.

«بۇل ايەلدى قۇتقارۋعا 5 ادامنان تۇراتىن ەكيپاج جىبەرىلدى. جاراقات العان ايەل تەڭىز دەڭگەيىنەن 2300 مەتر بيىكتىكتە ورنالاسقان گورەلنيك سارقىراماسى جانىنان تابىلدى. ونىڭ سول اياعىنىڭ تىزەسى شىعىپ كەتكەن. العاشقى كومەك كورسەتىلگەن سوڭ ماماندار ايەلدى ارنايى قۇتقارۋ زەمبىلىنە سالىپ، تومەندەگى جەدەل جاردەم كولىگىنە جەتكىزدى. تۋريست №4 -اۋرۋحاناعا جەتكىزىلدى»، - دەدى الماتى قۇتقارۋ قىزمەتىنەن.

109 قۇتقارۋ قىزمەتى الماتىلىقتارعا تاۋعا شىعۋدا اباي بولۋدى ەسكەرتەدى.

اۆتور: گۇلميرا عوسمانالي