قازاقستاندىق فيلم ەكى بىردەي بەدەلدى كينوفەستيۆالگە قاتىسادى
قازاقستاندىق رەجيسسەر فارحات ءشارىپوۆ تۇسىرگەن «18 كيلوگەرتس» اتتى جاڭا كوركەم فيلمنىڭ الەمدىك تۇساۋكەسەرى ورتالىق جانە شىعىس ەۋروپانىڭ ەڭ بەدەلدى فەستيۆالدەرىنىڭ ءبىرى - 36-حالىقارالىق ۆارشاۆا كينوفەستيۆالىنىڭ (WFF) نەگىزگى بايقاۋى شەڭبەرىندە وتەدى.
بۇل تۋرالى كينوتۋىندىنىڭ كرەاتيۆ جونىندەگى پروديۋسەرى يۋليا كيم حابارلادى.
«18 كيلوگەرتس» - 90-جىلداردىڭ سوڭىنداعى جاس وسپىرىمدەردىڭ ومىرىنەن سىر شەرتەتىن فيلم.
«18 كيلوگەرتس - ەرەسەكتەر ەستىمەيتىن دىبىس جيىلىگى. فيلم جاس وسپىرىمدەر پروبلەمالارىنا ارنالعان... ەسەيە كەلە جىل سايىن جاس بۋىننىڭ قيىندىقتارىن ءتۇسىنۋ قيىنداپ بارا جاتىر. ءوزىمىز دە جاس ءوسپىرىم بولدىق، كەي پروبلەمالار شەشىلمەيتىندەي بولىپ كورىنىپ ەدى. ءتىپتى تىعىرىقتان شىعاتىن جول تابا الماي، تۇلا بويىڭدى قورقىنىش بيلەگەن كەزدەر دە بولدى. ءبىزدىڭ فيلم سول كەزدەردى ەسكە ءتۇسىرۋ ءۇشىن ارنايى ءتۇسىرىلدى»، - دەدى رەجيسسەر فارحات شاريپوۆ.
فيلمنىڭ ءتۇسىرىلىم جۇمىستارى الماتى قالاسىندا ءوتتى. باستى رولدەردى مۇساحان جۇماحان، الىبەك ادىكەن، كاميلا فۋن-سو ەسىمدى جاس دەبيۋتانت-اكتەرلەر سومدادى. الەمدەگى ەڭ بەدەلدى كينو بايقاۋلاردىڭ ءبىرى - ۆارشاۆاداعى حالىقارالىق كينوفەستيۆالدىڭ نەگىزى 1985-جىلى قالانعان بولاتىن.
حالىقارالىق كينوپروديۋسەرلەر قاۋىمداستىعىنىڭ فەدەراتسياسى شەشىمىمەن 2009-جىلى بۇل فەستيۆالگە «ا» ساناتى بەرىلگەن بولاتىن. بيىل كوروناۆيرۋس پاندەمياسىنا قاراماستان ۆارشاۆا كينوفەستيۆالى 9-18- قازان ارالىعىندا ادەتتەگى ءداستۇرلى فورماتتا وتەدى. ودان بولەك، وتاندىق «18 كيلوگەرتس» فيلمى ازياداعى ەڭ ءىرى فەستيۆالدەردىڭ ءبىرى - 21-30- قازاندا وتەتىن 25- حالىقارالىق پۋسان كينوفەستيۆالىنىڭ (BIFF) كونكۋرستىق باعدارلاماسىنا قاتىسادى. كينوتۋىندى «ازيا كينوسىنا تەرەزە» (A Window on Asian Cinema) اتتى باعدارلاماسىندا كورسەتىلەدى.