+7 (701) 759 90 19
1 °С : نۇر-سۇلتان
7 °С : الماتى
USD 430.51 EUR 505.72
RUB 5.51 CNY 64.14
جاڭالىقتار

الەمدىك دەڭگەيدەگى وپەرا تەاترلارىمەن تەرەزەمىز تەڭ - ازامات جىلتىركوزوۆ

27 قىركۇيەك 15:11
:ءبولىسۋ
الەمدىك دەڭگەيدەگى وپەرا تەاترلارىمەن تەرەزەمىز تەڭ - ازامات جىلتىركوزوۆ

نۇر-سۇلتان. قازاقپارات - بيىل 2-3-قازان كۇنى «استانا وپەرا» مەملەكەتتىك وپەرا جانە بالەت تەاترىنىڭ كامەرالىق زالى ساحناسىندا گ. دونيسەتتيدىڭ اتاقتى «دون پاسكۋالە» وپەراسىنىڭ پرەمەراسى وتەدى.

وسىعان وراي «قازاقپارات ءتىلشىسى» پرەمەراعا دايىندىق بارىسىمەن تانىسىپ، قازاقستاننىڭ ەڭبەك سىڭىرگەن قايراتكەرى ازامات جىلتىركوزوۆتەن سۇحبات الىپ قايتتى.

ول كارانتين كەزىندە نەمەن اينالىسقانىن، كارانتيننەن كەيىن كورەرمەندەرمەن قاۋىشقاندا قانداي اسەر العانىن جانە بولاشاق جوسپارلارى تۋرالى ايتىپ بەردى.

«دون پاسكۋالە» وپەراسى جەتىنشى ماۋسىمنىڭ ورتاسىندا، ءساۋىر ايىندا قويىلۋى كەرەك بولاتىن. 16-ناۋرىزدان باستاپ كوروناۆيرۋس ىندەتىنىڭ تارالۋىنا وراي ەلىمىزدە كارانتين جاريالانىپ، رەپەتيتسيالار توقتاپ قالعان. وسى سەبەپتى بۇل وپەرا سەگىزىنشى ماۋسىمعا اۋىستىرىلدى. 2-3-قازان كۇنى «استانا وپەرا» مەملەكەتتىك وپەرا جانە بالەت تەاترىنىڭ كامەرالىق زالىندا قويىلادى. كورەرمەندەر بولاتىن- بولمايتىنى شەشىلىپ جاتىر، ءبىراق كورەرمەننىڭ قولداپ- قولپاشتاۋىنسىز، ىزەت- ءىلتيپاتىنسىز ونەر كورسەتۋ قيىن.


قازىرگى ۋاقىتتا دايىندىعىمىزدى توقتاتپاي جۇرگىزىپ جاتىرمىز، - دەيدى ازامات جىلتىركوزوۆ.

ونىڭ ايتۋىنشا، جوبانىڭ مۋزىكالىق جەتەكشىسى - وزيموداعى اكادەميا پروفەسسورى، اتى الەمگە تانىمال وپەرا ءانشىسى اللا سيمونيشۆيلي (يتاليا) «ساحنانى بەزەندىرۋ، دەكوراتسيا، كوستيۋمدەر بويىنشا سۋرەتشىسى ءارى قويىلىمنىڭ ستسەنوگرافى - مانانا گۋنيا. ولارمەن ونلاين بايلانىستامىز. يتاليا مەن قازاقستاندا ۋاقىت ايىرماشىلىعى 4 ساعات. بىزدە ساعات 11:00 بولسا، ولاردا تاڭعى 07:00 بولىپ تۇرادى. ولار جۇمىس كەستەسىن ءبىزدىڭ ىڭعايعا كەلتىردى. وپەرانىڭ قويۋشى رەجيسسەرى - ناتاليا كاگادي، تەاترىمىزدىڭ ديريجەرى - ابزال مۇحيتدينوۆ. جاقسى تۋىندى دۇنيەگە كەلەدى دەپ ويلايمىز»، - دەيدى ول.

بۇل وپەرادا بەس كەيىپكەر، بەسەۋى دە - باستى كەيىپكەر.

«مەنىڭ كەيىپكەرىم - مالاتەستا باي ءارى بويداق دون پاسكۋالەنىڭ دارىگەرى. قارتايعان باي دون پاسكۋالە دارىگەرىنە وزىمەن بىرگە تۇراتىن جيەنىن ۇيلەندىرىپ، بولەك شىعارىپ، ءوزى جاس ايەل العىسى كەلەتىنىن ايتادى. وقيعا جەلىسى دارىگەر مالاتەستانىڭ قاريانى جاس جەسىر ايەلمەن تانىستىرۋدان باستالادى. ءبىز وپەراعا دايىندىق بارىسىندا وسى تۋىندىنىڭ تاريحىمەن تانىسىپ، وقيعا جەلىسىنە تەرەڭ ءۇڭىلىپ قارايمىز. بۇل 1842 -جىلى جازىلعان وپەرا. 1843 -جىلى پرەمەراسى پاريجدە قويىلعان. بىزگە رەجيسسەر دە باعىت- باعدار بەرىپ وتىرادى. مىسالى، ءبىزدىڭ ساحنالىق كيىمدەرىمىز قازىرگى زامانعا لايىق، جوعارى تالعاممەن، ساپالى تىگىلگەن»، - دەيدى ازامات جىلتىركوزوۆ.

ونىڭ ايتۋىنشا، وپەرادا كىمگە قاي كەيىپكەر بەرىلەتىنى ەڭ الدىمەن داۋىس مۇمكىندىگىنە قاراپ شەشىلەدى.

«مىسالى، مەن باريتون داۋىسپەن ايتامىن. تەاتردا بىرنەشە باريتون داۋىس بار: تالعات مۇسابايەۆ، تالعات عاليەۆ، ەرجان سايپوۆ. ەرجان ەكەۋمىز ەكى قۇرامدا ءبىر ءرولدى سومدايمىز. بىرەۋىمىز اۋىرىپ قالعان جاعدايدا ەكىنشىمىز الماستىرامىز. كەيىپكەرلەردى بولگەن كەزدە داۋىس مۇمكىندىگىنە، ودان كەيىن مىنەزگە جانە اكتەرلىك شەبەرلىككە قارايدى»، - دەيدى ول.

قازاقستاننىڭ ەڭبەك سىڭىرگەن قايراتكەرىنە كلاسسيكالىق مۋزىكامەن اينالىسۋىنا اناسى ىقپال ەتكەن. «وپەرا سالاسىنا كەزدەيسوق كەلۋ دەگەن بولمايدى. بالا كەزىمدە بيبىگۇل تولەگەنوۆا، ەرمەك سەركەبايەۆ، الىبەك دىنىشەۆ سياقتى كلاسسيكالىق ونەر مايتالماندارىن تەلەديداردان ءجيى كورسەتەتىن. سول كەزدە مەن: «وسكەندە مەنىڭ داۋىسىم ەرمەك سەركەبايەۆتىڭ داۋىسى سياقتى بولادى» دەپ ايتاتىنمىن. راسىمەن سولاي بولدى. انام مۋزىكا ۋچيليشەسىندە وقىعان. ول وقىپ جۇرگەن كەزدە مەنى قۇرساعىندا كوتەرىپ جۇرگەن. ءان ايتۋ قابىلەتى ماعان انامنان دارىدى دەپ ويلايمىن. بالا كەزىمدە مۋزىكا مەكتەبىندە، كەيىن قازاق ۇلتتىق مۋزىكا اكادەمياسىندا وقىدىم. ەريەۆان كونسەرۆاتورياسىندا ماگيستراتۋرانى ءبىتىردىم. 2010 -جىلى ق ر مادەنيەت مينيسترلىگى تاراپىنان اۆسترياعا بارىپ، جارتى جىل بويى تاجىريبەمدى شىڭداپ، بىلىكتىلىگىمدى ارتتىرىپ كەلدىم»، - دەيدى «استانا وپەرا» مەملەكەتتىك وپەرا جانە بالەت تەاترىنىڭ وپەرا ترۋپپاسىنىڭ باسشىسى.

ازامات جىلتىركوزوۆ 2007 -جىلدان باستاپ وپەرا ءاشىسى رەتىندە جۇمىس ىستەي باستاعان.

«1998 -جىلى ەلوردادا قازاق ۇلتتىق مۋزىكا اكادەمياسى اشىلدى. وسى اكادەميادا وقۋ ءۇشىن 2001 -جىلى تالدىقورعاننان وتباسىمىزبەن ارنايى كوشىپ كەلدىك. اكادەميادا وقىپ جۇرگەن كەزىمدە كۇلاش بايسەيىتوۆا اتىنداعى ۇلتتىق وپەرا جانە بالىت تەاترىنا جاس سوليستەردى قابىلدادى. ول كەزدە 2 كۋرس ستۋدەنتى ەدىم. تەاتردا ەۆگەني ونەگين قويىلىمى قويىلاتىن بولىپ، مەنى جاس ونەگيننىڭ رولىنە سايكەس كەلەدى دەپ شاقىرعان. ستۋدەنت بولا ءجۇرىپ تەاتردىڭ ءسوليسى رەتىندە جۇمىس ىستەۋ تاريحتا بولماعان جاعداي دەسەم بولادى. قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى نۇرجامال ۇسەنبايەۆا قىز جىبەك پارتياسىن ايتۋعا 4-5-كۋرستا وقىپ جۇرگەن كەزدە شاقىرىلعان ەكەن. 2007 -جىلدان باستاپ وسى تەاتردىڭ سوليسىمىن»، - دەيدى ول.

ول قازاق تۋىندىلارىنان جانىنا جاقىنى - «اباي» وپەراسى ەكەنىن ايتتى. «مەن بۇل ءرولدى 23 جاسىمدا سومدادىم. بۇل ءرولدى ەرمەك سەركەبايەۆ اتامىز 27 جاسىندا سومداعان ەكەن. بۇل دا ءوزىم ءۇشىن رەكورد ورناتۋمەن بىردەي. ەۆگەنيي ونەگيننىڭ ءرولىن وتە جاقسى كورەمىن.

«جىبەك ساتى» وپەراسىنداعى مەن سومدايتىن جەرمانو ءرولىن دە جاقسى كورەمىن. سول كەيىپكەر مەن «دون پاسكۋالەدەگى» مالاتەستا ءرولى ءبىر- بىرىنە ۇقسايدى. ەكى قويىلىمدا دا بۇل كەيىپكەرلەر ەكى تاراپتى تاتۋلاستىرۋشى، بايلانىستىرۋشى بولىپ جۇرەدى. بۇل ءرول سونىسىمەن ۇنايدى. سومداعىم كەلەتىن كەيىپكەر قاتارى كوپ. قازىرگى ۋاقىتتا وسى تەاترىمىزدا 14 وپەرامىز بار.

«دون پاسكۋالە» - 15-وپەرا، جەلتوقسان ايىندا «ماحاببات شارابى» دەگەن وپەرا ۇلكەن ساحنادا قويىلادى دەپ ۇمىتتەنىپ وتىرمىز. الداعى ۋاقىتتا جاتتايتىن پارتيالار كوپ»، - دەيدى ازامات جىلتىركوزوۆ.

ول كارانتيندەگى ۋاقىتى قالاي وتكەنى تۋرالى دا جەتكىزدى.

«كارانتين كەزىندە ءبارىمىز ۇيگە مۋزىكالىق اسپاپ ساتىپ الدىق. تەاترعا كەلۋگە تىيىم سالىنعاندىقتان، ءۇي جاعدايىندا دايىندالىپ جۇردىك.

«كارانتيندەگى جۇلدىز» جوباسىنا قاتىستىق. وپەرا انشىلەرىنەن مايرا مۇحامەد قىزى ءبىرىنشى بولىپ ونلاين كونتسەرت بەرىپ، ءبىز جالعاستىردىق. سونداي-اق وتباسىمىزعا ۋاقىت بولدىك. مەنىڭ جۇبايىم دا - مۋزىكانت، سوندىقتان ماعان ۇيدە دايىندالۋ قيىن بولعان جوق. ال كورشىلەرىم وزدەرىمەن بىرگە وپەرا ءانشىسى تۇراتىنىن بىلەدى، سوندىقتان ولار دا تۇسىنىستىكپەن قارادى. ارينە، تۇنگى وننان كەيىن تىنىشتىق رەجيمىن ساقتادىم»، - دەيدى ول.

«استانا وپەرا» مەملەكەتتىك وپەرا جانە بالەت تەاترىنىڭ وپەرا ترۋپپاسىنىڭ باسشىسى بۇل سالادا جالىعىپ كورگەن كەزى بولماعانىن ايتتى. «مۋزىكانىڭ شەگى دە، شىڭى دا جوق. قانشا اي، قانشا جىل وتسە دە وپەرا جانرى ماڭگىلىك ءومىر سۇرە بەرەدى. ⅩⅣ عاسىردان باستاۋ العان وپەرا جانرى ءالى كۇنگە دەيىن قايماعى بۇزىلماعان قالىپتا كەلە جاتىر. رەجيسسەرلەردىڭ قابىلەتىنە قاراي ساحنالىق كيىم جانە باسقا دا وزگەرىستەر بولۋى مۇمكىن، ءبىراق نەگىزگى قاڭقاسى، ياعني ءبىر دە ءبىر نوتاسى وزگەرگەن جوق. مەن 30 عا جۋىق حالىقارالىق، رەسپۋبليكالىق وپەرا انشىلەرىنىڭ بايقاۋىنا قاتىستىم. كوپ ەلدە بولىپ، جۇلدەلى ورىندار الدىق. 2010 -جىلى بيبىگۇل تولەگەنوۆانىڭ حالىقارالىق كونكۋرسىندا باس جۇلدە الدىم. ۋكراينادا وتكەن ا. نەجدانوۆا اتىنداعى بايقاۋدا باس جۇلدەگە يە بولدىم. باكۋدا وتكەن وپەرا انشىلەرى اراسىندا وتكەن بايقاۋدا دا باس جۇلدە الدىم. 2011 -جىلى 25 جاسىمدا «قازاقستاننىڭ ەڭبەگى سىڭگەن قايراتكەرى» اتاعىن الدىم.

وپەرا ءانشىسى كۇلاش بايسەيىتوۆا ك س ر و حالىق ءارتىسى دەگەن ەڭ جوعارى اتاقتى العان كەزدە نەبارى 24 جاستا بولعان ەكەن. مۇنداي جۇلدەلى ورىندار مەن اتاقتار ادامعا ەشقانداي ارتىقشىلىق بەرمەيدى، كەرىسىنشە ونىڭ ءبارى مەن ءۇشىن - سىناق. مۇنىڭ ءبارى ەڭبەكتىڭ ناتيجەسى. مىسالى، شەتەلدە ونەر كورسەتكەن كەزدە ساعان ءبارى سىن كوزبەن قارايدى.

ارىپتەسىم مەدەت جوتابايەۆ «يتاليانىڭ جۇلدىزى» دەگەن وردەن العان العاشقى قازاقستاندىق وپەرا ءانشىسى. مۇنداي جەتىستىككە جەتۋ ءۇشىن ولاردان اسىرىپ ورىنداۋ كەرەك. قازىر بۇكىل الەمنىڭ وپەرا تەاترلارى بىزبەن ساناسادى. ءبىزدىڭ تەاتردىڭ كەرەگەسى الەمدىك دەڭگەيدەگى تەاترلاردىڭ تەرەزەسىمەن تەڭ»، - دەيدى ازامات جىلتىركوزوۆ.

ول كارانتيننەن كەيىن 50 كورەرمەننىڭ قاتىسۋىمەن وتكەن گالا-وپەرادا قانداي سەزىمدە بولعانىن ايتتى.

«گالا- وپەراعا كەلگەن 50 كورەرمەن ءبىز ءۇشىن زالدا ينە شانشار ورىن قالدىرماي وتىرعان كورەرمەنمەن تەڭ بولدى. جارتى جىلدىق ۇزىلىستەن كەيىن 50 كورەرمەننىڭ ءوزى وسىنداي كەرەمەت شابىت سىيلايدى. 50 كورەرمەن عانا وتىر دەگەن جوقپىز، ءبىز بار جان- تانىمىزبەن بەرىلىپ ونەر كورسەتتىك. ونەر ادامى ءۇشىن جارتى جىل ساحنادا ونەر كورسەتپەۋ دەگەن جارىسقا قاتىسۋدان شەتتەتىلگەن سپورتشىمەن تەڭ. گالا- وپەرادا تەاتر قورجىنىندا بار 15 وپەرانىڭ بەس- التاۋىنان ۇزىندىلەر ورىندادىق. دەكوراتسيا دا، ساحنالىق كيىمدەرىمىز دە كەرەمەت بولدى. ەكى كۇن بويى 1 ساعات 40 مينۋت ونەر كورسەتتىك. سوليستەردىڭ بارلىعىنا ونەر كورسەتۋگە مۇمكىندىك بەرۋ ءۇشىن وسىلاي ىستەدى. وپەرا ءانشىسى بىرنەشە مينۋت ساحنادا تۇرىن ونەر كورسەتۋى ءۇشىن ساحنا سىرتىندا قانشاما ادام ەڭبەك ەتەدى. ولاردىڭ ەڭبەگى وراسان زور. ولار: جارىق قويۋشىلار، ۆيدەوينجەنەرلەر، ساحنانى كوتەرىپ، ءتۇسىرىپ، دەكوراتسيانى قوزعالتاتىن مەحانيك ينجەنەرلەر، ساحنالىق كيىمدەرىمىزدى دايىنداۋشىلار. بۇل ماماندار بولماعاندا ءبىزدىڭ ونەرىمىز ايتارلىقتاي اسەرلى بولماس ەدى»، - دەيدى ول.

اۆتور: زارينا قاھارمان


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات