+7 (701) 759 90 19
7 °С : نۇر-سۇلتان
9 °С : الماتى
USD 428.05 EUR 501.2
RUB 5.47 CNY 63.87
جاڭالىقتار

كوروناۆيرۋس قاۋپى: ادامدار نەنى ەسكەرۋى كەرەك

26 قىركۇيەك 11:29
:ءبولىسۋ
كوروناۆيرۋس قاۋپى: ادامدار نەنى ەسكەرۋى كەرەك

نۇر-سۇلتان. قازاقپارات - قازاقستاننىڭ كوروناۆيرۋس ىندەتىمەن كۇرەسىپ كەلە جاتقانىنا التى اي بولىپتى.

وسى ۋاقىت ىشىندە ىندەتكە شالدىققانداردىڭ سانى 100 مىڭنان اسىپ، ونىڭ ىشىندە 1715 ادام كوز جۇمعان. ايتسە دە اۋرۋ جۇقتىرعانداردىڭ 95 پايىزىنىڭ جازىلۋى - ۇرەيدەن گورى ءۇمىتتى كۇشەيتىپ وتىر. وسى رەتتە قازىرگى ەپيدەميولوگيالىق احۋال قانداي؟ اۋرۋدىڭ قايتا ءورشۋ قاۋپى بار ما؟ دارىگەرلەر نەلىكتەن جۇرەك اۋرۋلارى بار ادامدارعا ەسكەرتۋ جاساپ جاتىر؟

وسى سۇراقتارعا بۇگىن ورتالىق كوممۋنيكاتسيالار قىزمەتىنە كەلگەن ماماندار جاۋاپ بەرگەن بولاتىن.

ەكى وبلىستىڭ وقۋشىلارى كوروناۆيرۋس جۇقتىرعان

باسپا ءسوز ءماسليحاتىنا كەلگەن دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەتوۆتىڭ ايتۋىنشا، 25-قىركۇيەكتەگى مالىمەت بويىنشا، ەلىمىزدە كوروناۆيرۋس جۇقتىرعان ازاماتتاردىڭ سانى 107590 عا جەتكەن. ونىڭ ىشىندە 95,1 پايىزى نەمەسە 102360 ناۋقاس جازىلىپ شىقتى. 3515 ادام ەم قابىلداۋدا. وكىنىشتىسى، 1715 ازامات قايتىس بولدى. سوڭعى تاۋلىكتە كوروناۆيرۋس ينفەكسياسى 61 ادامنان انىقتالعان. ءبىر وكىنىشتىسى، بەتى قايتتى-اۋ دەگەن ىندەت ەكى وبلىستاعى - شىعىس قازاقستان مەن سولتۇستىك قازاقستانداعى مەكتەپ وقۋشىلارىنان انىقتالىپ وتىر.

«سولتۇستىك قازاقستاننىڭ مەكتەپتەرىندە كوروناۆيرۋس اۋرۋىن جۇقتىرۋدىڭ 12 جاعدايى تىركەلدى. ىندەت سەگىز ءبىلىم ورداسىنان جانە ءبىر بالاباقشادان انىقتالدى»، - دەدى ول. ەكى وبلىستا كوروناۆيرۋس تابىلعان (جالپى 16 جاعداي) مەكتەپتەر مەن بالاباقشالار كارانتينگە جابىلعان. كوروناۆيرۋس جۇقتىرعان بالالارمەن قارىم- قاتىناستا بولعان اتا- انالار مەن مۇعالىمدەر ءۇي كارانتينىنە جاتقىزىلعان. 14 كۇن وتكەننەن كەيىن اتالمىش ءبىلىم وردالارى مەن بالاباقشالاردا وڭدەۋ جۇمىستارى جۇرگىزىلەدى. سونىمەن بىرگە بالالار قايتا تەكسەرىلەدى.

«بالالار اۋرۋدى جەڭىل تۇردە وتكەرىپ جاتىر. كوبىندە دەنە قىزۋى دا بايقالعان جوق. كەيبىرىندە جوتەل، كەيبىرىندە اۋرۋدىڭ باسقا دا جەڭىل تۇرلەرى انىقتالدى. جالپى جاعدايلارى جاقسى. ءبارى دە ۇيىندە. ولار قاجەتتى ءدارى- دارمەكپەن قامتاماسىز ەتىلگەن. دارىگەرلەردىڭ باقىلاۋىندا»، - دەيدى باعدات قوجاحمەتوۆ.

بۇعان دەيىن ءبىرقاتار باق استانالىق «بارىس» حوككەي كومانداسىنىڭ ويىنشىلارى كوروناۆيرۋس جۇقتىرعانىن حابارلاعان ەدى. ەڭبەك ۇجىمدارىنداعى ىندەتتىڭ كورىنىس بەرۋى دەنساۋلىق ساقتاۋ مينيسترلىگىن الاڭداتىپ وتىر ەكەن.

ناقتىراق ايتقاندا، وسى جىلدىڭ 17-قىركۇيەگىندە «بارىس» حوككەي كومانداسىنداعى 40 ادامعا پروفيلاكتيكالىق جۇمىستار جۇرگىزىلگەن. ونىڭ ىشىندە 11 ادامنىڭ كوروناۆيرۋس جۇقتىرىپ العانى بەلگىلى بولدى. ءدال سول كۇنى قالانىڭ باس سانيتارلىق دارىگەرىنىڭ قاۋلىسى شىعىپ، سول ۇجىمدا ەپيدەميولوگيالىق شارالاردى وتكىزۋ تۋرالى شەشىم قابىلدانعان. ك ۆ ي جۇقتىرعاندارمەن بايلانىستا بولعان 29 ادام انىقتالىپ، بارىنە دە «بارىس- ارەناعا» كەلۋگە تىيىم سالىنعان ەكەن. ونىڭ ايتۋىنشا، 22-قىركۇيەكتە كوماندانىڭ تاعى 8 مۇشەسىنەن كوروناۆيرۋس (ولار بۇرىن جۇقتىرعاندارمەن بايلانىستا بولعان) انىقتالعان. «قازىر كومانداداعى كوروناۆيرۋس جۇقتىرعان 19 ادامنىڭ ءبارى اۋرۋدى سيمپتومسىز وتكەرىپ جاتىر. وزدەرىڭىز كورىپ وتىرعانداي، بۇل ىندەتتى بالالار مەن قاراپايىم ادامدار عانا ەمەس، دەنساۋلىعى مىعىم سپورتشىلار دا جۇقتىرۋدا»، - دەپ اتاپ ءوتتى ول.

قازاقستاندىق ۆاكسينا - سىناق ساتىسىندا

باعدات قوجاحمەتوۆتىڭ سوزىنە سەنسەك كوروناۆيرۋس جۇقتىرعان مەديتسينا قىزمەتكەرلەرىنىڭ 70 پايىزى وتەماقى الىپ ۇلگەرگەن. «كەلەسى اپتادا دەنساۋلىق ساقتاۋ ءمينيسترى وسى ماسەلە بويىنشا ءماجىلىس دەپۋتاتتارىمەن كەزدەسەدى. وسى ۋاقىتقا دەيىن 12800 مەديتسينا قىزمەتكەرى كوروناۆيرۋس جۇقتىرعان. ونىڭ تەك ءبىر بولىگىن كوميسسيا العى شەپتە كاسىبي مىندەتىن اتقارىپ ءجۇرىپ، كوروناۆيرۋس جۇقتىرىپ الدى دەپ تانىعان بولاتىن. بۇل رەتتە ارنايى تالاپتار بارىن ەسكەرۋ كەرەك. بۇگىنگە دەيىن كوروناۆيرۋس جۇقتىرعان مەديتسينا قىزمەتكەرلەرىنىڭ 70, ءتىپتى 71 پايىزى وتەماقى الىپ ۇلگەردى»، - دەدى باعدات قوجاحمەتوۆ. ءوز كەزەگىندە ۇلتتىق عىلىمي كارديحيرۋرگيا ورتالىعىنىڭ باسشىسى مىندەتىن اتقارۋشى ماحاببات بەكبوسىنوۆا ورتالىقتاعى 813 قىزمەتكەردىڭ 348 ى كوروناۆيرۋس جۇقتىرىپ العانىن ايتىپ ءوتتى.

«348 ادام - كلينيكادان تىس كوروناۆيرۋس جۇقتىرىپ العان مەديتسينالىق قىزمەتكەرلەر. 337 ادام ءبىزدىڭ ورتالىقتىڭ كوۆيد بولىمشەلەرى مەن پتر زەرتحانالارىندا جۇمىس ىستەگەن. ول كەزدە ءبىز كوروناۆيرۋس جۇقتىرعان ازاماتتاردى قابىلداپ، ورتالىق قىزمەتكەرلەرى ءۇشىن دە، پاتسيەنتتەر ءۇشىن دە پتر- دياگنوستيكا وتكىزىپ جاتقان بولاتىنبىز»، - دەيدى ول.

سپيكەرلەردىڭ ايتۋىنشا، قازىرگى تاڭدا الەمدىك ۆاكسينالاردىڭ ىشىندە جىلدامدىعى بويىنشا وزىق شىققانى - رەسەي جانە وكسفورد ەكپەسى. وكىنىشكە قاراي، وكسفورد ۆاكسيناسىن سىناۋ بارىسىندا ادام اعزاسىنا كەرى اسەر ەتەتىن ءبىر بەلگى انىقتالعان. وسىنىڭ سالدارىنان ونى زەرتتەۋ جۇمىستارى توقتاپ قالعان. رەسەيلىك ۆاكسينا كلينيكالىق سىناقتىڭ ءۇشىنشى ساتىسىنان وتۋدە. وعان 10 مىڭداعان ادام قاتىسىپ جاتىر. بۇل - ەكپە پروتسەسى ەمەس، كلينيكالىق زەرتتەۋ ساتىسى. مەديتسينا ماماندارى وسىنى شاتاستىرىپ الماۋ كەرەكتىگىن ەسكەرتەدى. باعدات قوجاحمەتوۆتىڭ سوزىنشە قازاقستاندىق ۆاكسينا دا وتە جاقسى ناتيجە كورسەتىپ وتىر.

«دەنساۋلىق ساقتاۋ مينيسترلىگىنىڭ ساراپشىلارىنان قۇرالعان توپ جامبىل وبلىسىنداعى زەرتحانانى كورىپ قايتتى. ازىرگە قازاقستاندىق ۆاكسينا كلينيكالىق سىناقتىڭ العاشقى فازاسىنان ءوتىپ جاتىر. الداعى ايلاردا اتقاراتىن قاۋىرت جۇمىس كوپ. بۇل باعىتتاعى ءىستى جالعاستىرامىز»، - دەدى ول.

ىندەت ەڭ ءبىرىنشى كىمگە قاۋىپتى؟

ۇلتتىق عىلىمي كارديوحيرۋرگيالىق ورتالىعى باسقارما ءتوراعاسىنىڭ مىندەتىن اتقارۋشى ماحاببات بەكبوسىنوۆا «كوروناۆيرۋسقا قارسى مىعىم يممۋنيتەت بار ما، الدە بۇل ۋاقىتشا عانا يممۋنيتەت پە؟» دەگەن سۇراققا جاۋاپ بەردى. ايتۋىنشا وسى سۇراق توڭىرەگىندە قازىر الەمدىك قاۋىمداستىق ءتۇرلى پىكىرتالاس وتكىزىپ جاتىر.

«بۇل ماسەلە قازىر زەرتتەلۋ ۇستىندە. ءبىراق كەيىنگى شولۋ ماتەريالدارىنىڭ بىرىندە COVID- ينفەكسياسىنان كەيىن جاقسى يممۋنيتەت قالىپتاساتىنى جايلى اقپارات بولدى. ءتىپتى ودان بۇرىن COVID- ينفەكسيا قانشالىقتى اعزاعا اۋىر بولسا، سونشالىقتى مىعىم يممۋنيتەت قالىپتاسادى دەگەن دە تۇجىرىم بولعان. ءبىراق بۇل سۇراقتىڭ جاۋابى كەلەشەكتىڭ ەنشىسىندە دەپ ايتار ەدىم»، - دەدى ماحاببات بەكبوسىنوۆا.

ونىڭ مالىمەتىنشە، بۇعان دەيىن كوروناۆيرۋستى قايتادان جۇقتىرۋدىڭ ءبىر عانا جاعدايى تىركەلگەن. الايدا قايتا جۇققانى - ۆيرۋستىڭ باسقا شتامى بولعان.

«بۇل - سينگاپۋردان كەلگەن حابارلاما. بۇل پاتسيەنت ەكىنشى ينفەكسيانى - COVID ۆيرۋسىنىڭ باسقا شتامىن جەڭىل وتكەرگەن»، - دەدى دارىگەر.

ماماننىڭ پىكىرىنشە كوروناۆيرۋس ارتەريالدى گيپەرتونياسى بار ادامدارعا اسا قاۋىپتى. تۇسىندىرۋىنشە كوروناۆيرۋس پنيەۆمونياسىنىڭ اۋىر ءتۇرىنىڭ ءورشۋ تاۋەكەلىنىڭ ەڭ كۇردەلى فاكتورى - ارتەريالدى گيپەرتونيا.

«ارتەريالدى گيپەرتونياسى بار پاتسيەنتتەر - قاۋىپ توبى بويىنشا ەڭ الدىڭعى قاتاردا تۇر. ولاردا پنيەۆمونيا جىلدام ءارى اۋىر بولىپ كەزدەسەدى. جۇرەك قان- تامىرلى جۇيەسىندە پاتولوگياسى، ارتەريالدى گيپەرتونيا نەمەسە جۇرەك اۋرۋى بار بارلىق قازاقستاندىقتاردى تۇرعىلىق جەرى بويىنشا ەمحاناعا ەسەپكە تىركەلۋدى سۇرايمىن. سوندا ولاردىڭ جاعدايىن قازىردىڭ وزىندە باقىلاۋعا الىپ، دەنساۋلىق جايىن قاداعالاپ وتىرۋعا مۇمكىندىك بولادى»، - دەدى ماحاببات بەكبوسىنوۆا.

ورتالىق باسشىسىنىڭ ايتۋىنشا، جۇرەكتىڭ سوزىلمالى اۋرۋلارىمەن اۋىراتىن پاتسيەنتتەر باسقا اۋرۋى بار ادامدارعا قاراعاندا كوروناۆيرۋستى اۋىر كوتەرەدى.

«جۇرەك قان- تامىر جۇيەسىندە پاتولوگياسى بار پاتسيەنتتەردە كوروناۆيرۋستىڭ العاشقى بەلگىلەرى پايدا بولسا بىردەن دارىگەرگە جۇگىنۋ كەرەك. ەشقاشان ءوزىمدى ءوزىم ەمدەپ الام دەپ ويلاماڭىزدار. مۇنداي ادامداردا پنيەۆمونيا جەدەل ءورشيدى. اۋىر كوتەرەدى. ماسەلەن قايتىس بولعانداردىڭ جارتىسىندا ارتەنيالدى گيپەرتونيا بولعان»، - دەدى ول. سونىمەن قاتار ماحاببات بەكبوسىنوۆا مۇنداي ادامدار جەدەل جاردەم كەلگەنشە نە ىستەۋى كەرەكتىگىن ءتۇسىندىردى.

«ارتەريالدى قىسىمدى ولشەۋ كەرەك. قازىر ادامداردىڭ كوبى ۇيىندە- اق تونومەترمەن قىسىمىن ولشەي الادى. ەگەر قىسىم جوعارى بولسا جانتايىپ دەمالعان ابزال. ال پاتسيەنتتە مۇنداي جاعدايدا مىندەتتى تۇردە «كاپتوپريل» بولۋى ءتيىس»، - دەپ ءتۇيدى ماحاببات بەكبوسىنوۆا.

اۆتور: ايان بەكەن ۇلى


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات