ق ر پرەزيدەنتى قازاقستاننىڭ ءولىم جازاسىنان باس تارتۋىنا قاتىستى تۇسىنىك بەردى
«جۋىردا عانا قازاقستاندا ءولىم جازاسىنان باس تارتۋدى قاراستىراتىن ەكىنشى فاكۋلتاتيۆتى حاتتاماعا قوسىلۋ جونىندە شەشىم قابىلداندى. كەزىندە تۇڭعىش پرەزيدەنتىمىز تاراپىنان ءولىم جازاسىنا جاريالانعان موراتوري كۇشىندە بولعاندىقتان، بۇل شەشىم كونستيتۋتسياعا تولىق ساي كەلەدى جانە اتازاڭعا ەشقانداي وزگەرىس ەنگىزۋ قاجەت ەمەس. شىن مانىندە، ەلىمىزدە ءولىم جازاسى جوق. تەك كونستيتۋتسيادا قاراستىرىلعان ەكى عانا بولماشى ەرەكشەلىك بار. ولار فاكۋلتاتيۆتى حاتتامانىڭ تالابىنا تولىق ساي كەلەدى»، - دەدى مەملەكەت باسشىسى.
ەسكە سالايىق، 23- قىركۇيەكتە بىرىككەن ۇلتتار ۇيىمىنىڭ شتاب-پاتەرىندە قازاقستاننىڭ ب ۇ ۇ جانىنداعى تۇراقتى وكىلى قايرات وماروۆ ءولىم جازاسىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىنىڭ ەكىنشى فاكۋلتاتيۆتىك حاتتاماسىنا قول قويدى.
سول كۇنى ءولىم جازاسىن جويۋ تۋرالى حالىقارالىق حاتتاماعا قوسىلۋ تۋرالى شەشىمدى قازاقستان پرەزيدەنتى قاسىم-جومارت توقايەۆ ب ۇ ۇ باس اسسامبلەياسىنىڭ 75-مەرەيتويلىق سەسسياسىنىڭ جالپى ساياسي پىكىرتالاس بارىسىندا سويلەگەن سوزىندە جاريالادى. كەيىننەن ق ر سىرتقى ىستەر مينيسترلىگىنىڭ باسپا ءسوز قىزمەتى قازاقستاننىڭ اتالمىش حالىقارالىق پاكتىگە قوسىلۋىنا قاتىستى تۇسىنىكتەمە بەردى.