نارىقتى مونوپوليستەردەن تازالاۋ كەرەك - قاسىم- جومارت توقايەۆ
پرەزيدەنت اۆتوماشينالاردى قۇراستىرۋ پروتسەسىمەن تانىسىپ، 2020 -جىلعى 15 - قازاندا اشىلادى دەپ جوسپارلانىپ وتىرعان ۇساق توراپتى قۇراستىرۋ ادىسىمەن اۆتوموبيلدەر شىعارۋعا ارنالعان جاڭا سەحتى ارالاپ كوردى. مەملەكەت باسشىسىنا جوبانىڭ الماتى قالاسىنىڭ يندۋستريالىق ايماعىنداعى مەملەكەتتىك قۇرىلىمداردىڭ قولداۋىمەن جۇزەگە اسىرىلىپ جاتقانى تۋرالى باياندالدى. كاسىپورىن پايدالانۋعا بەرىلگەننەن كەيىن ونىڭ قۋاتى ءبىرىنشى كەزەڭدە جىلىنا 30 مىڭ، ەكىنشى كەزەڭدە 45 مىڭعا دەيىن ماشينا جاساۋعا جەتەدى. ينۆەستيتسيانىڭ جالپى كولەمى - 28 ميلليارد تەڭگەدەن استام، ونىڭ % 30 - كومپانيانىڭ ءوز قاراجاتى.
Hyundai Trans Kazakhstan كاسىپورنى 700-گە جۋىق جۇمىس ورنىن اشىپ، ساباقتاس سالالاردىڭ دامۋىنا سەرپىن بەرەدى. ينۆەستورلار كەلەشەكتە اۆتوبولشەكتەر شىعاراتىن زاۋىت سالۋدى جوسپارلاپ وتىر. وسىلايشا كومپانيا وتاندىق اۆتوكولىك ونەركاسىبىن دامىتۋ جونىندەگى كوزدەگەن ماقساتتارىنا قول جەتكىزەدى. بۇل وتاندىق ءوندىرىستىڭ % 51 استامىن قامتاماسىز ەتەدى.
مەملەكەت باسشىسى نىساندى ارالاپ كورگەننەن كەيىن يندۋستريالىق ايماق رەزيدەنتتەرىمەن جەكە كاسىپكەرلىكتى قولداۋ جانە كاسىپورىننىڭ باسىم سالالارىن دامىتۋ ماسەلەلەرىن تالقىلادى.
«مەن ءوز جولداۋىمدا ەلىمىزدەگى كاسىپكەرلىكتى دامىتۋعا ەرەكشە ءمان بەردىم. اسىرەسە، بيزنەستىڭ، كاسىپكەرلىكتىڭ دامۋىنا مەملەكەتتىك ورگاندار تاراپىنان كەلتىرىلەتىن كەز كەلگەن كەدەرگى ەلىمىزگە قارسى جاسالعان قىلمىس رەتىندە قارالاتىنىنا ارنايى توقتالدىم. ياعني، باسقاشا ايتقاندا، ۇكىمەت، جەرگىلىكتى اتقارۋشى ورگاندار كاسىپكەرلىكتى دامىتۋعا جان- جاقتى قولداۋ كورسەتۋگە ءتيىس. بۇل - ەكونوميكالىق ساياساتىمىزداعى نەگىزگى باعىت»، - دەدى پرەزيدەنت.
قاسىم- جومارت توقايەۆ ەلىمىزدىڭ ەكونوميكاسىنداعى احۋال پاندەميا سالدارىنان ءالى دە كۇردەلى ەكەنىن جانە بۇل داعدارىستان مەملەكەت پەن بيزنەستىڭ بىرلەسكەن كۇش- جىگەرىنىڭ ارقاسىندا عانا شىعۋعا بولاتىنىن اتاپ ءوتتى. باسەكەلەستىكتى قورعاۋ ءۇشىن ستراتەگيالىق جوسپارلاۋ جانە رەفورمالار اگەنتتىگى قۇرىلدى.
«نارىقتى مونوپوليستەردەن تازالاۋ كەرەك. بارلىق لايىقتى كاسىپكەرلەردىڭ ءبىزدىڭ نارىققا ەنىپ، ەركىن جۇمىس ىستەۋىنە مۇمكىندىك بەرۋ قاجەت. سوندا عانا ەكونوميكا ەركىن دامي الادى. مۇنىڭ ءبارى جاڭا ۇيىمداستىرۋ شارالارىن قابىلداۋدى تالاپ ەتەتىنى ءسوزسىز. بۇل شارالاردىڭ ءبارى ءتيىمدى بولادى دەپ ۇمىتتەنەمىن»، - دەدى مەملەكەت باسشىسى.
پرەزيدەنت ەكونوميكالىق شارالارمەن قاتار مەملەكەت تاراپىنان قازاقستان قوعامىن ودان ءارى دەموكراتيالاندىرۋ جونىندە دە شارالار قابىلداناتىنىن ايتتى. تۇڭعىش پرەزيدەنت - ەلباسى نۇرسۇلتان نازاربايەۆ مەملەكەتتى قالىپتاستىرۋعا كوپ ەڭبەك ءسىڭىردى. ەندىگى مىندەت قازاقستاننىڭ دامۋىنا تىڭ سەرپىن بەرۋ بولىپ تابىلادى.
«پارتيالاردىڭ قىزمەتىنە، بەيبىت جيىندار مەن شەرۋلەر وتكىزۋگە قاتىستى جاڭا زاڭدار قابىلداندى. جۋىردا عانا قازاقستاندا ءولىم جازاسىنان باس تارتۋدى قاراستىراتىن ەكىنشى فاكۋلتاتيۆتى حاتتاماعا قوسىلۋ جونىندە شەشىم قابىلداندى. كەزىندە تۇڭعىش پرەزيدەنتىمىز تاراپىنان ءولىم جازاسىنا جاريالانعان موراتوريي كۇشىندە بولعاندىقتان، بۇل شەشىم كونستيتۋتسياعا تولىق ساي كەلەدى جانە اتازاڭعا ەشقانداي وزگەرىس ەنگىزۋ قاجەت ەمەس. شىن مانىندە، ەلىمىزدە ءولىم جازاسى جوق. تەك كونستيتۋتسيادا قاراستىرىلعان ەكى عانا بولماشى ەرەكشەلىك بار. ولار فاكۋلتاتيۆتى حاتتامانىڭ تالابىنا تولىق ساي كەلەدى. سوندىقتان ەكى بىردەي مىندەت: ەلىمىزدىڭ ەكونوميكاسىن جاڭا جاعدايدا دامىتۋ، قازاقستان ءۇشىن ءتيىمدى ينتەگراتسيالىق پروتسەستەردى كۇشەيتۋ جانە ساياسي رەفورمالاردى جۇزەگە اسىرۋ. بۇل مىندەتتەردىڭ ءبارى ءبىر ۋاقىتتا اتقارىلادى جانە تابىستى بولادى دەپ ۇمىتتەنەمىن»، - دەدى قاسىم- جومارت توقايەۆ.
بيزنەس وكىلدەرى جولداۋدا ايتىلعان شارالارعا وڭ باعا بەرىپ، كاسىپكەرلىككە قولداۋ كورسەتكەنى ءۇشىن پرەزيدەنتكە العىس ءبىلدىردى. سونىمەن قاتار ولار ءتىرى مالدى ەكسپورتقا شىعارۋعا جاريالانعان موراتوريدى سوزۋ جونىندە مەملەكەت باسشىسىنا ءوتىنىش جاسادى.