ايگىلى «مەنىڭ اتىم قوجا» فيلمى رەجيسسەرىنىڭ كەلىنى توقايەۆتان كومەك سۇرادى

نۇر -سۇلتان. قازاقپارات - «مەنىڭ اتىم قوجا» فيلمىنىڭ رەجيسسەرى ابدۋللا قارساقبايەۆتىڭ كەلىنى مايرا قارساقبايەۆا قازاقستان پرەزيدەنتى قاسىم-جومارت توقايەۆقا ۇندەۋ جولدادى.

ول مەملەكەت باسشىسىنان كينو يندۋسترياسىنداعى بىرنەشە ماسەلە بويىنشا كومەك سۇرادى، - دەپ حابارلايدى Tengrinews.kz ءتىلشىسى.

مايرا قارساقبايەۆانىڭ حاتىندا جازىلعان ماسەلەلەر كارانتين مەن پاندەمياعا بايلانىستى ەمەس. ايەل ونداعان جىلدار بويى شەشىمى تابىلماعان ءبىرقاتار ماسەلەنى اتادى. ولاردىڭ ءبىرى قازاقستاننىڭ قولىنا تيمەي تۇرعان مۇراعا بايلانىستى: قاز ك س ر-دا تۇسىرىلگەن كينوكارتينالار ءالى كۇنگە دەيىن رەسەيدىڭ مەمفيلمقورىندا ساقتاۋلى ەكەن. ايتۋىنشا، وندا شاكەن ايمانوۆ، ابدۋللا قارساقبايەۆ، سۇلتان حوجيكوۆ، ءماجيت بەگاليننىڭ جاۋھارلارى بار.

«لوندونداعى ەۋرازيا كينوفەستيۆالىنىڭ ديرەكتورى رەتىندە وسى فەستيۆالدە «مەنىڭ اتىم قوجا« فيلمىن كورسەتكىم كەلدى. ءبىز ونى ءوز قاراجاتىمىزبەن الماتىداعى ا ق ش مەكتەپتەرىنىڭ امەريكالىق مۇعالىمدەرى مەن وقۋشىلارىنىڭ كومەگىمەن اعىلشىن تىلىنە دۋبلياجدادىق. دۋبلياج وتە جاقسى شىقتى. الايدا دىبىس رەجيسسەرى داۋىستى كاسىبي تۇردە قويا المادى، ويتكەنى بارلىق دىبىس جولدارى «قازاق فيلمدە« جوق، ولار ماسكەۋدە.

2019 -جىلى 6-ماۋسىمدا لوندوندا ەۋرازيا كينوفەستيۆالىن اعىلشىن تىلىندەگى «مەنىڭ اتىم قوجا« فيلمىمەن اشتىق. كينوتەاتردا كورسەتىلدى، ۆيدەو ساپاسى وتە تومەن بولدى، ال داۋىس بولىنبەگەن جولدار مەن مۋزىكاسىز قويىلدى. مەن BBC گە سۇحبات بەرگەنمىن، كورەرمەندەر فيلمگە تاماشا باعا بەردى، ءبىراق ۆيدەو ساپاسى ءۇشىن ۇيالدىم، ءبىز ءالى كۇنگە دەيىن التىن قورىمىزدى لايىقتى سيفرلاندىرا الماي كەلەمىز»، - دەدى قارساقبايەۆا.

سونداي-اق، ايەل قازاقستاندا كينو ءتۇسىرۋ پروتسەسىن شەتەلدىكتەرگە جەڭىلدەتۋدى سۇرادى. ونىڭ ايتۋىنشا، كينو تۋرالى زاڭ بويىنشا، ولار ءۇشىن سالىقتار تىم جوعارى.

«2013 -جىلدىڭ 22-قازانىندا گولليۆۋد پروديۋسەرلەرىنەن ماركو پولو فيلمىن ءتۇسىرۋ تۋرالى حات كەلدى، ءبىراق مەن ولارعا سالىقتىڭ كوپتىگىنە بايلانىستى كومەكتەسە المادىم. جاقىندا شارىندا فيلم تۇسىرگىسى كەلەتىن پولياك سەرىكتەستەرىم سالىق ريبەيتتەرىنە قىزىعۋشىلىق تانىتتى، ويتكەنى ولار بىزدە زاڭ قابىلدانعانىن بىلەدى. مەن ولارعا (زاڭدا جازىلعانداي) ايتتىم، كەم دەگەندە 850 مىڭ دوللار جۇمساساڭىزدار، 30 پايىزىن قايتارا الاسىزدار، ايتپەسە ەشتەڭە شىقپايدى. ولار ءبىزدىڭ ەلگە شەتەلدىكتەردىڭ فيلم تۇسىرگەنى قاجەتى جوق شىعار دەپ ايتتى»، - دەدى ول.

قارساقبايەۆتىڭ كەلىنى شەتەلدىك كومپانيالاردىڭ قازاقستانعا كەلۋى ءتيىمدى ەكەنىن اتاپ ءوتتى: ولار كوپتەگەن جۇمىس ورنىن اشىپ، ءبىزدىڭ مامانداردى وقىتىپ، بىلىكتىلىگىن ارتتىرادى، قوناقۇيلەردە، مەيرامحانالاردا اقشا قالدىرادى جانە كولىك جالدايدى.

سونداي-اق، مايرا قارساقبايەۆا قازاقستاندا كينوكوميسسيا قۇرۋ كەرەك دەپ سانايدى.

«ءتۇرلى ەلدە شەتەلدىك كينوكومپانيالاردى تارتۋمەن كينوكوميسسيا اينالىسادى، ول قازاقستاندا جوق! ءۇش جىل بۇرىن مەن وزبەكستانداعى كينوكوميسسيانىڭ باستاۋىندا تۇردىم، ولار مەنىڭ ۇسىنىسىم بويىنشا قۇردى، ونى لوس- اندجەلەستە گولليۆۋدتىڭ باس كەڭسەسىندە تىركەدى. ەندى ولار كينوكوميسسيانى الەمنىڭ بارلىق كينوفەستيۆالى مەن كينونارىقتارىندا تانىستىرىپ ءجۇر. ناتيجەسىندە شەتەلدىكتەرگە ءوز فيلمدەرىن قازاقستانعا قاراعاندا وزبەكستاندا تۇسىرگەن وڭايىراق.

ءبىز ەلىمىزدە كينوكوميسسيا قۇرۋ تۋرالى ۇسىنىسپەن جەتى جىلدان بەرى ءتۇرلى ينستانسياعا بارىپ كەلەمىز، ولار مۇنىڭ نە ەكەنىن دە بىلمەيدى»، - دەدى ول.

سونىمەن قاتار، مايرا قارساقبايەۆا قازاقستانعا ءتۇرلى ەلمەن بىرلەسىپ فيلم شىعارۋ ءۇشىن كوپروداكشن- كەلىسىم جاساۋ قاجەت ەكەنىن حابارلادى.

مايرا قارساقبايەۆا پرەزيدەنتتەن وسى ماسەلەلەردى شەشۋگە كومەكتەسۋىن سۇرايدى.