«ميلليونمەن دەكرەتكە» شىعۋ راسىمەن ءتيىمدى مە؟ مامان كەڭەسى

نۇر-سۇلتان. قازاقپارات - قازىر الەۋمەتتىك جەلىدە «ميلليونمەن دەكرەتكە» شىعۋدى ۇيرەتەتىن ءتۇرلى مارافونداردان كوز سۇرىنەدى. ءبارى اقشا تابۋدى ۇيرەتەدى، ميلليون تابىسقا جەتكىزەدى. ال سوڭعى ترەند - دەكرەتكە ميلليون تەڭگەمەن شىعارۋعا كومەكتەسەدى.

ءبىراق، مۇنداي ونلاين ساباقتاردىڭ كوزدەگەنى مۇلدەم باسقا دەيدى قارجىگەر ماماندار. ولار كەرىسىنشە جۇكتى قىز- كەلىنشەكتەردىڭ وزدەرىن تاقىرعا وتىرعىزادى ەكەن. بۇل تۋرالى «ەۋرازيا ءبىرىنشى» ارناسى حابارلايدى.

قازىر ينستاگرامدى اشىپ قالساڭىز بولدى، ونلاين ساباقتىڭ سان ءتۇرىن كورەسىز. سولاردىڭ ىشىندە ەرەكشە كوزگە تۇسەتىنى - «دەكرەتكە ميلليونمەن» اتتى ونلاين مارافون. بۇل ساباققا قاتىسىپ، اقشاسىن تولەۋ جەتكىلىكتى. قوماقتى قاراجاتپەن دەكرەتكە شىعۋعا ۇيرەتەدى ءارى كومەكتەسەدى. الايدا، ەسەپ- قيساپقا جۇيرىك ماماندار ايەلدەر بۇدان ساق بولماسا، وپىق دەپ قالۋى ادەن مۇمكىن دەيدى.

«دەكرەتكە ميلليونمەن اتىشۋلى مارافوندارعا قاتىسار كەزدە ءبىلىڭىز، سىزدە مىندەتتى تۇردە تابىستى كاسىپ بولۋ كەرەك. ياعني، سىزدە ەشقانداي تابىس جوق، تابىسىڭىز وتە از ءتۇسىپ جاتقان شوتقا 300 مىڭ كورسەتىپ، ودان 295 اۋدارىم جاساپ وتىرۋ، ناعىز الاياقتىق! ءسىز قۇجات وتكىزگەن دە ءبارى تەكسەرىلەدى»، - دەدى بۋحگالتەر گۇلنۇر نۇرلان قىزى.

گۇلنۇر دا ينتەرنەت ارقىلى قىز- كەلىنشەكتەرگە باعىت- باعدار بەرەتىن ونلاين مارافونداردى ءجيى وتكىزەدى. ونىڭ ايتۋىنشا، كوپ جاعدايدا الاياقتارعا اڭقاۋ جۇكتى كەلىنشەكتەر تاپ بولادى ەكەن. سەبەبى، ولارعا سەنگەن ارۋلار سوڭعى تاپقاندارىن ەش ويلانباستان اۋدارا سالادى.

«ءسىز ماعان اقشاڭىزدى بەرسەڭىز، مەن سىزگە تولەم جاساپ الىپ بەرەمىن دەگەندەر ءجۇر. ماعان بۋحگالتەر بولعاننان كەيىن، ماعان وسىلاي اقشامدى الا الماي ءجۇرمىن دەيتىندەر كەلەدى. قۇجات وتكىزدىم، بەرمەي جاتىر دەپ. نەگە؟ سەبەبى، باسقا ادامدارعا بەرگەن، تولەپ وتىرمىن دەپ تولەم جاساعان، الەۋمەتتىك ساقتاندىرۋ قورىنا جاساعان، ال تابىس سالىعىن تولەمەگەن. ول قىزدار الدانىپ قالىپ وتىر»، - دەيدى گۇلنۇر نۇرلان قىزى.

قارجىگەر ەريتا ابدىبايەۆانىڭ پىكىرىنشە، دەكرەتكە ميلليونمەن شىعۋ ءۇشىن ارنايى ونلاين ساباقتارعا بارۋدىڭ ەش قاجەتى جوق. ەڭ دۇرىسى، تاپقان تابىسىڭدى قاراپايىم ەسەپ- قيساپقا سالىپ، وي ەلەگىنەن وتكىزۋ كەرەك.

«ول قاراپايىم ماتەماتيكا دەيمىن. اقپارات دەگەن تولىپ تۇر ىزدەگەن ادامعا. ول جەردە ەشقانداي تەگىن اقشا جوق! اي سايىن اقشا سالىپ وتىرۋ كەرەك، 250 مىڭنان 1 ميلليون العىڭىز كەلسە. ال اقشا سالمايمىن، ميلليون تەڭگە الامىن دەگەن ماركەتينگتىك ءادىس دەپ ويلايمىن. وتىرىپ- وتىرىپ ميلليون تەڭگە الاتىن ەشقانداي امال جوق! زەينەتاقى جارناسىن تولەپ، سالىعىن تولەپ قانا ميليون تەڭگە الادى»، - دەدى قارجىگەر ەريتا ابدىبايەۆا.

قىسقاسى، تەگىن ميلليوندى ەشكىم بەرمەيدى. ال ءدال وسى سوممانى الۋ ءۇشىن سوڭعى 12 ايداعى ايلىق تابىس 280 مىڭنان كەم بولماۋى كەرەك.

«سوندىقتان جۇمىس ىستەمەگەن قىز- كەلىنشەكتەر «دەكرەتتە ميلليون تەڭگەمەن شىعارامىن« دەپ ۋادەنى ءۇيىپ- توككەن الاياقتاردان ساق بولعانى ءجون»، - دەيدى ساراپشىلار.