يسپانيا قايتادان تار جول، تايعاق كەشۋدەن وتكەلى تۇر

نۇر-سۇلتان. قازاقپارات - الداعى اپتادا مادريد قالاسى كوروناۆيرۋستىڭ تارالۋ قارقىنىنا بايلانىستى قيىن كەزەڭدى باستان وتكەرەدى. جەرگىلىكتى دەنساۋلىق ساقتاۋ ءمينيسترى جۋىردا وسىنداي مالىمدەمە جاسادى.

ونىڭ ايتۋىنشا، يسپانيادا سوڭعى تاۋلىكتە تىركەلگەن جاڭا دەرەكتەردىڭ تورتتەن ءبىر بولىگى ەل استاناسىنان انىقتالعان. ال ءبىر كۇندەگى ءولىم- ءجىتىم سانى بولسا، مامىرداعى كورسەتكىشكە دەيىن جەتكەن. وسىعان بايلانىستى ال قازىر مادريد پوليتسەيلەرى تۇرعىندار اراسىندا تەكسەرىس جۇرگىزۋدى قولعا العان. ودان بولەك مادريد بيلىگى ىندەتتىڭ تارالۋىن تەجەۋ ءۇشىن ەل ۇكىمەتىنەن قوسىمشا كومەك سۇراپ وتىر. ايتا كەتەيىك، يسپانيادا كوروناۆيرۋس جۇقتىرۋ كورسەتكىشى ەلدە جالپى ۇلتتىق شەكتەۋ شارالارى اياقتالعان سوڭ كۇرت ءوسىپ كەتتى. قازىر ينفەكتسياعا شالدىققانداردىڭ قاتارى 700 مىڭعا جۋىق. ال كوز جۇمعاندار سانى 31 مىڭنان اسادى.

www.24.kz