شەتەل تۇرمەلەرىندە قانشا قازاقستاندىق وتىر

نۇر- سۇلتان. قازاقپارات - باس پروكۋروردىڭ ورىنباسارى مارات احمەتجانوۆ شەت ەلدەردەگى تۇرمەلەردە قانشا قازاقستاندىق وتىرعانىن جاريا ەتتى، دەپ حابارلايدى قازاقپارات ءتىلشىسى.

«رەسمي مالىمەتتەرگە سايكەس، بۇگىنگى تاڭدا شەتەلدە 831 قازاقستاندىق جازاسىن وتەپ جاتىر. تۇتقىنداردى الماستىرۋ بويىنشا حالىقارالىق كەلىسىمشارت 21 مەملەكەتپەن جاسالدى. 2019 -جىلى – 28، 2020 -جىلى - 10 ادامدى الماستىردىق. الداعى ۋاقىتتا وزبەكستان، كيپر، دومينيكان رەسپۋبليكاسىمەن وسىنداي كەلىسىمگە كەلۋدى كوزدەپ وتىرمىز»، - دەدى دەپۋتات سۇيىندىك الداشيەۆ پارلامەنت سەناتىنىڭ وتىرىسىندا.

ءوز كەزەگىندە مارات احمەتجانوۆ شەتەلدە جازاسىن وتەپ جاتقان قازاقستاندىقتاردىڭ باسىم كوپشىلىگى رەسەيدە ەكەنىن ايتتى.

«بۇگىنگى كۇنى 735 ادام شەتەلدەردەگى تۇرمەدە وتىر. 70 پايىزى، ياعني 537 سى رەسەيدە. ولار ءبىزدىڭ ەلدىڭ ازاماتتارى سانالعانىمەن ولار سوندا جۇمىس ىستەگەن، وتباسىلارىن سوندا كوشىرىپ، سول جاقتا ءومىر سۇرگەن ازاماتتار. ولار قايتىپ كەلەم دەسە، مۇمكىندىكتەرى بار. ەكى ەلدىڭ كەلىسىمشارتى نەگىزىندە قايتا الادى. 2019-2020 -جىلى رەسەي تاراپىنان ءۇش ازاماتتىڭ قايتارۋدان باس تارتىلدى. الدىمەن شىعىندى وتەۋى كەرەكتىگىن العا تارتتى. ءبىز قازىر مۇنداي كەلىسىمدى وزبەكستانمەن جاساۋدى كوزدەپ وتىرمىز. سەبەبى وندا ءبىزدىڭ 24 ازامات تۇرمەدە جازاسىن وتەۋدە. ال ءبىزدىڭ تۇرمەدە وزبەكستاننىڭ 400 ازاماتى وتىر. ەگەر وسى كەلىسىمشارتقا قول جەتكىزسەك، بىزدە جازاسىن وتەۋشىلەردى ءوزارا الماسۋ مۇمكىندىگى پايدا بولادى»، - دەدى سپيكەر.