ۇلتتىق كەڭەس: ەرلان قارين زاڭعا ەنگىزىلگەن ماڭىزدى ۇسىنىستىڭ ءبىرىن اتادى

نۇر-سۇلتان. قازاقپارات - مەملەكەت باسشىسىنىڭ كومەكشىسى ەرلان قارين ق ر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ ۇسىنىسىمەن زاڭعا ەنگىزىلگەن ماڭىزدى باستامالاردىڭ ءبىرىن اتادى، دەپ حابارلايدى قازاقپارات ءتىلشىسى.

«ۇلتتىق كەڭەستىڭ «قورجىنىندا» جۇزەگە اسىرىلعان تاعى ءبىر ماڭىزدى باستامالاردىڭ ءبىرى - بۇگىن ءماجىلىس پايدالانىلماي جاتقان اۋىل شارۋاشىلىق جەرلەرىنىڭ بازالىق سالىقتىق ستاۆكاسىن ارتتىرۋ باستاماسىن بەكىتتى.

بۇل باستامانى پرەزيدەنت قاسىم-جومارت توقايەۆ 2019-جىلدىڭ 20- جەلتوقسانىندا ۇلتتىق قوعامدىق سەنىم كەڭەسىنىڭ ەكىنشى وتىرىسىندا كوتەرگەن بولاتىن. سول كەزدە مەملەكەت باسشىسى ۇكىمەتكە جەردىڭ ءتيىمدى پايدالانىلۋىنا باقىلاۋدى كۇشەيتۋدى، ونىڭ ىشىندە پايدالانىلماي جاتقان جەر ءۇشىن بازالىق سالىقتىق ستاۆكانى 10 نان 20 ەسە ارتتىرۋدى تاپسىرعان ەدى»، - دەپ جازدى ەرلان قارين Facebook-پاراقشاسىندا.

مەملەكەت باسشىسىنىڭ تاپسىرماسىن ورىنداۋ ءۇشىن بۇل شارا سالىق سالۋ ماسەلەلەرى بويىنشا قازىرگى زاڭناماعا وزگەرىس ەنگىزۋدى كوزدەيتىن زاڭ جوباسىنا ەنگىزىلگەن. وسىنىڭ ناتيجەسىندە كەشە، ياعني 23- قىركۇيەكتە پارلامەنت ءماجىلىسىنىڭ دەپۋتاتتارى ەكىنشى وقىلىمدا «سالىق سالۋ جانە ينۆەستيتسيالىق كليماتتى جاقسارتۋ بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ماقۇلداعان.

«وسى زاڭ جوباسىنا سايكەس جەردىڭ ءتيىمسىز پايدالانىلۋىنا قاتىستى شارالاردى كۇشەيتۋ ماقساتىندا 2022-جىلدىڭ 1- قاڭتارىنان باستاپ پايدالانىلماي جاتقان اۋىلشارۋاشىلىق جەرلەرى ءۇشىن بازالىق سالىقتىق ستاۆكا 10 نان 20 ەسە ارتاتىن بولدى. سونىمەن بىرگە پرەزيدەنتتىڭ باستاماسىمەن وسى جىلدىڭ كوكتەمىندە 4 وڭىردە (اقمولا، قوستاناي، شىعىس قازاقستان جانە ماڭعىستاۋ وبلىستارى) جايىلىم جەرلەردى عارىشتان مونيتورينگىلەۋ بويىنشا پيلوتتى جوبا ىسكە قوسىلدى. وسىنىڭ ارقاسىندا ءتيىمدى پايدالانىلماي جاتقان 7 ميلليون گەكتار جەر مەملەكەتكە قايتارىلدى»، - دەيدى ول.