تارازدا اياق استىنان سيرەن گۇلدەدى
قازاقستاننىڭ وڭتۇستىك ايماقتارىنا كۇزگى سالقىن ءالى كەلە قويعان جوق، كۇن ءالى جىلى.
قازىرگى ۋاقىتتا اۋا رايى 24+ 26+ گرادۋسقا دەيىن جىلىنىپ، جەلسىز تىمىق كۇندەر سالتانات قۇرعان.
سوڭعى كۇندەرى تاراز تۇرعىندارى الەۋمەتتىك جەلىلەرگە قايتادان گۇلدەپ جاتقان سيرەن، ياعني بورتەگۇلدىڭ سۋرەتىن جارىسا سالىپ جاتىر. كۇز كەزەڭى ءۇشىن مۇنداي ەرەكشە قۇبىلىس قاراپايىم تۇرعىنداردى عانا ەمەس، بيولوگتار مەن ەكولوگتاردى دا تاڭعالدىرىپ وتىر.
بيولوگ مامان امالبەك تۇرسىنوۆتىڭ ايتۋىنشا، كوپجىلدىق وسىمدىكتىڭ ءبىر جىلدا ەكى مارتە گۇلدەۋى - انومالدى جاعداي. بۇل ەرەكشە جىلى اۋا رايىنا بايلانىستى بولۋى مۇمكىن.
«جايماشۋاق جىلى كۇن وسىمدىكتەردىڭ الداعى كوكتەمگە دەپ بەرىلگەن رەسۋرسىن وسى كەزدە پايدالانۋىنا اكەپ سوعۋى مۇمكىن. ياعني، وسىمدىكتەر كەلەشەككە ارنالعان پوتەنتسيالىن قازىر پايدالانۋعا ءماجبۇر بولادى. مۇنى بيولوگيالىق ساعاتتاردىڭ اۋا رايىنىڭ اسەرىنەن اۋىسىپ كەتۋى دەپ ساناۋعا بولادى. مىسالى، جەمىس اعاشى ءوزىنىڭ بولاشاققا ساقتالعان ءال-اۋقاتىن وسىلاي كۇزدە قولداناتىن بولسا، وندا ول كوكتەمدە جەمىستى از سالۋى مۇمكىن. دەمەك، بۇل - جالپى العاندا جاعىمسىز قۇبىلىس. بارلىق نارسە تابيعاتتىڭ زاڭى بويىنشا ءوز ۋاقىتىندا بولعانى ءجون»، - دەيدى مامان.
«قازگيدرومەت» ر م ك وبلىستىق فيليالى دا بۇل قۇبىلىستىڭ اۋا رايى مەن جامبىل وبلىسى اۋماعىنىڭ كليماتتىق سانالۋاندىعىنا بايلانىستى ەكەنىن ءتۇسىندىردى.
تاياۋداعى جەتى كۇندە جامبىل وڭىرىندە 21+ 17+ گرادۋسقا دەيىن جىلى بولادى. كۇزگى سۋىق قازان ايىنىڭ باسىندا عانا كەلۋى مۇمكىن.