قازاقستان پرەزيدەنتى «يادرولىق بەستىك» مەملەكەتتەرىن سەمەي شارتىن راتيفيكاتسيالاۋعا شاقىردى

نۇر-سۇلتان. قازاقپارات - يادرولىق قارۋى جوق ءاربىر مەملەكەتكە قاۋىپسىزدىكتىڭ زاڭدى تۇرعىدان مىندەتتى كەرى كەپىلدىكتەرى بەرىلۋى ءتيىس.

بۇل تۋرالى ب ۇ ۇ باس اسسامبلەياسى 75-سەسسياسىنىڭ جالپى ساياسي دەباتتارىندا ءسوز سويلەگەن ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«پاندەميا سالدارىنان ءبىز تاعى دا ەكى ۇلكەن سىن-قاتەرمەن بەتپە-بەت كەلىپ وتىرمىز. ءبىرىنشىسى - يادرولىق قارۋدى تاراتپاۋ جانە قارۋسىزدانۋ داعدارىسى. بۇگىندە قازاقستان ءوز ەركىمەن يادرولىق ارسەنالىنان باس تارتقان جانە الەمدەگى ەڭ ءىرى اتوم سىناق پوليگونىن جاپقان مەملەكەت رەتىندە بارشا الەمگە ۇلگى بولىپ وتىر. وسىلايشا بەيبىتشىلىك ماسەلەسىنە اسا جاۋاپكەرشىلىكپەن قارايتىن ەل ەكەنىن تانىتتى. الايدا، يادرولىق قارۋدى تاراتپاۋ رەجيمى تولىق ىسكە اسپاعاندىقتان ونىڭ قاۋپى سەيىلگەن جوق. وسى ورايدا، بارلىق مۇشە مەملەكەتتەر ادامزاتتى يادرولىق اپاتتان قۇتقارۋعا باعىتتالعان قاجەتتى ءارى كەزەك كۇتتىرمەس بارلىق شارانى قابىلداۋ تۋرالى قازاقستاننىڭ يادرولىق دەرجاۆا سانالاتىن ەلدەرگە جولداعان ۇندەۋىن قولدايدى دەپ ۇمىتتەنەمىن»، - دەدى قازاقستان پرەزيدەنتى.

قاسىم-جومارت توقايەۆ قازاقستان ب ۇ ۇ- نىڭ ءتيىستى ينستيتۋتتارىنىڭ، سونىڭ ىشىندە، يادرولىق سىناقتارعا جاپپاي تىيىم سالۋ تۋرالى شارت ۇيىمىنىڭ بەلسەندى ءرولىن جوعارى باعالايتىندىعىن باسا ايتتى.

«بۇل رەتتە، يادرولىق قارۋى جوق ءاربىر مەملەكەتكە قاۋىپسىزدىكتىڭ زاڭدى تۇرعىدان مىندەتتى كەرى كەپىلدىكتەرى بەرىلۋى ءتيىس دەپ سانايمىز. ءبىز «يادرولىق بەستىكتىڭ» بارلىق مەملەكەتتەرىن يادرولىق قارۋدان تازا ايماقتار تۋرالى شارتتىڭ ءتيىستى حاتتامالارىن، سونىڭ ىشىندە سەمەي شارتىن راتيفيكاتسيالاۋعا شاقىرامىز»، - دەدى مەملەكەت باسشىسى.