جاھاندىق ەكونوميكانى قالپىنا كەلتىرۋ ءۇشىن كەلىسىلگەن شارالار قاجەت - ق ر پرەزيدەنتى
بۇل تۋرالى ب ۇ ۇ باس اسسامبلەياسى 75-سەسسياسىنىڭ جالپى ساياسي دەباتتارىندا ءسوز سويلەگەن ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«جاھاندىق ەكونوميكانى قالپىنا كەلتىرۋ ءۇشىن كەلىسىلگەن شارالاردى شۇعىل قابىلداۋ قاجەت. مەن باس حاتشىنىڭ الەمدىك ەكونوميكانىڭ %10 قۇرايتىن ىنتالاندىرۋ جونىندەگى شارالار توپتاماسىن جۇزەگە اسىرۋ قاجەت دەگەن ۇندەۋىنە قوسىلامىن. سونىمەن قاتار، ونىڭ پاندەمياعا قارسى كۇرەس بارشاعا بىردەي جانە مول مۇمكىندىك جاساۋعا باعىتتالعان جاڭا عالامدىق كەلىسىمگە نەگىزدەلۋى كەرەك دەگەن پىكىرىن قولدايمىن. ەڭ كەدەي ەلدەردىڭ قارىزدارىن تولەۋىن توقتاتۋ جونىندەگى شارالار الەمدىك نارىقتاعى تەرىس فاكتورلاردى ازايتۋعا جانە تۇسىنىكسىزدىكتى تومەندەتۋگە ىقپال ەتەدى دەپ ەسەپتەيمىز.
«ۇلتتىق دەنساۋلىق ساقتاۋ ىسىنە ينۆەستيتسيا سالعانداردىڭ قارىزدارىن جەڭىلدەتۋ» فورمۋلاسىنا سايكەس حالىقارالىق قارجى مەكەمەلەرى ءوز جۇمىستارىنا يننوۆاتسيالىق شەشىمدەردى بەلسەندى ەنگىزۋى كەرەك»، - دەدى قاسىم-جومارت توقايەۆ.
ق ر پرەزيدەنتى جاھاندىق دامۋدى قارجىلاندىرۋ جونىندە الداعى ۋاقىتتا وتەتىن جوعارى دەڭگەيدەگى كەزدەسۋدە ناقتى ءارى ماڭىزدى شارالار قابىلدانادى دەپ ۇمىتتەنەتىندىگىن باسا ايتتى.
«تەڭىزگە شىعاتىن جولى جوق دامۋشى ەلدەر (ت ش ج د ە) ساۋدا-ساتتىققا جانە كولىك-لوگيستيكالىق كەشەنگە زور زيانىن تيگىزگەن COVID-19 ىندەتىنەن اۋىر زارداپ شەكتى. وسى دامۋشى ەلدەر توبىنىڭ قازىرگى ءتوراعاسى رەتىندە قازاقستان ۆەنا ءىس-قيمىلدار باعدارلاماسىن جۇزەگە اسىرۋدى جانداندىرۋ ءۇشىن ب ۇ ۇ- نىڭ جول كارتاسىن قابىلداۋدى ۇسىندى»، - دەدى مەملەكەت باسشىسى.