بۇكىل الەم اۋمالى-توكپەلى وقيعالاردىڭ جاڭا تولقىنىنىڭ الدىندا تۇر - ق ر پرەزيدەنتى

None
None
نۇر-سۇلتان. قازاقپارات - بۇكىل الەم اۋمالى-توكپەلى وقيعالاردىڭ جاڭا تولقىنىنىڭ الدىندا تۇر.

بۇل تۋرالى ب ۇ ۇ باس اسسامبلەياسى 75-سەسسياسىنىڭ جالپى ساياسي دەباتتارىندا ءسوز سويلەگەن ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«ءبىز بيىل بىرىككەن ۇلتتار ۇيىمىنىڭ 75 جىلدىعىن اۋمالى-توكپەلى ءارى كۇردەلى سىن-قاتەرلەرگە تولى كەزەڭدە اتاپ ءوتىپ وتىرمىز. ونىڭ ىشىندە ەڭ باستىسى - COVID-19 پاندەمياسى. بۇل ىندەت جاھاندىق ەكونوميكاعا وراسان زور زيانىن تيگىزدى جانە سونىڭ اۋىرتپالىلىعىنان الەم حالقى زارداپ شەگۋدە. ادامزات تاريحىنداعى وسىنداي ناۋبەتكە قارسى تۇرىپ، ءبىزدى اۋىر ىندەتتەن قورعاۋ ءۇشىن العى شەپتە بولعان دارىگەرلەرگە بارشا وتانداستارىمنىڭ اتىنان شىنايى ريزاشىلىعىمدى بىلدىرەمىن. الەمدەگى قازىرگى توتەنشە جاعداي دەنساۋلىق ساقتاۋ جۇيەسىنىڭ بۇزىلۋىنا، سونداي-اق گۋمانيتارلىق جانە الەۋمەتتىك- ەكونوميكالىق كۇيزەلىسكە الىپ كەلدى. بۇل - ءبىزدىڭ بەرىكتىگىمىز ءۇشىن زور سىناق. COVID-19 ءبىزدىڭ جىبەرگەن قاتەلىكتەرىمىز بەن اعاتتىقتارىمىزدى انىق كورسەتتى»، - دەدى مەملەكەت باسشىسى.

ق ر پرەزيدەنتى داعدارىسقا قارسى كۇرەس بارىسىندا حالىقارالىق ىنتىماقتاستىققا كەرى اسەر ەتكەن ساۋدا پروتەكتسيونيزمى مەن ساياسي ۇلتشىلدىقتىڭ ارتقانىن، سونداي-اق «جاھاندىق توقىراۋدىڭ» كۇشەيە تۇسكەنىن بايقاعانىمىزدى باسا ايتتى.

«بۇگىندە بۇكىل الەم اۋمالى-توكپەلى وقيعالاردىڭ جاڭا تولقىنىنىڭ الدىندا تۇر. ونىڭ سالدارى وتە اۋىر بولۋى مۇمكىن. ءوزارا سەنىمنىڭ جەتىسپەۋى، حالىقارالىق باسەكەلەستىكتەگى تۇسىنىسپەۋشىلىك، ساۋدا سوعىستارى مەن سانكتسيالار ورنىقتى دامۋدىڭ كەلەشەگىنە نۇقسان كەلتىرىپ، ميللياردتاعان ادامنىڭ جارقىن الەمگە دەگەن ءۇمىتىن ءۇزدى»، - دەدى قاسىم-جومارت توقايەۆ.

سوڭعى جاڭالىقتار