تولەۋتاي راحىمبەكوۆ: جەر شەتەلدىك ازاماتتارعا ساتىلماۋى ءارى جالعا بەرىلمەۋى ءتيىس

نۇر-سۇلتان. قازاقپارات - «اۋىل» حالىقتىق-دەموكراتيالىق پاتريوتتىق پارتياسى جەر ماسەلەسىنە قاتىستى ۇستانىمىن ءبىلدىردى، دەپ حابارلايدى قازاقپارات ءتىلشىسى.

بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا «اۋىل» پارتياسى ءتوراعاسىنىڭ ءبىرىنشى ورىنباسارى تولەۋتاي راحىمبەكوۆكە «ءبىزدىڭ قوعامدى كوپتەن بەرى الاڭداتىپ جۇرگەن ماسەلە بار. ول - جەر ماسەلەسى. جالپى، «اۋىل» پارتياسىنىڭ جەر ماسەلەسىنە قاتىستى ۇستانىمى قانداي؟» دەگەن ساۋال قويىلعان ەدى.

«بۇل، شىنىمەن دە، كوپتەن بەرى بۇكىل حالىقتى، ءار ازاماتتى الاڭداتىپ وتىرعان ماسەلە. بۇل پروبلەما 1992-جىلدان باستاپ قوعامعا بەلىگى بولدى. سودان بەرى ءارتۇرلى پىكىر، قوزقاراس بار. بىرەۋلەر جەردى ساتۋ كەرەك دەسە، ەندى ءبىرى ساتپاۋ كەرەكتىگىن ايتادى. ال «اۋىل» پارتياسىنىڭ ۇستانىمى - جەر شەتەلدىك ازاماتتارعا ساتىلماۋى ءارى جالعا بەرىلمەۋى ءتيىس»، - دەدى تولەۋتاي راحىمبەكوۆ.

وسى رەتتە ول: «جەردىڭ ءوزى بۇگىنگى كۇنى ءومىر ءسۇرىپ جاتقان بىزدەرگە اتا-بابامىزدان امانات رەتىندە قالىپ وتىر. سونى بىلە وتىرىپ جەرىمىزدى شەتەلدىكتەرگە قالاي ساتامىز، قالاي جالعا بەرەمىز؟ اتا-بابامىز سويىلمەن، شوقپارمەن ءجۇرىپ قانىن توككەن جەردى بىرەۋگە ساتۋعا، ءتىپتى جالعا بەرۋگە ەشقانداي قۇقىمىز جوق»، - دەدى.