نۇر- سۇلتاندا الەۋمەتتىك پاتەر الاتىندار ءتىزىمى كەڭەيتىلدى
ايتا كەتسەك، بۇعان دەيىن بۇل تىزىمگە الەۋمەتتىك قىزمەتكەرلەر، پوليتسەيلەر، مادەنيەت جانە سپورت ماماندارى ەنگىزىلگەن بولاتىن.
«نۇر- سۇلتان قالاسى بويىنشا «نۇر وتان» پارتياسىنىڭ سايلاۋالدى باعدارلاماسىنىڭ نەگىزىنە 10 نەگىزگى باسىم باعىت كىردى. ونىڭ ءبىرىنشىسى رەتىندە جەڭىلدىكپەن قولجەتىمدى باسپانامەن قامتاماسىز ەتۋ بەكىتىلگەن. اتالعان ماسەلە بويىنشا اۋقىمدى، جۇيەلى جۇمىس اتقارىپ جاتىرمىز. ونىڭ ىشىندە تۇرعىن ءۇي قۇرىلىس جيناق بانكى جانە قازاقستان يپوتەكالىق كومپانياسىمەن (ق ي ك) دە بىرلەسە جۇمىس اتقارۋدامىز»، - دەپ جازدى نۇر- سۇلتان قالاسىنىڭ اكىمى التاي كولگىنوۆ Instagram-پاراقشاسىندا.
ەلوردا باسشىسى اتاپ وتكەندەي، ءورت سوندىرۋشىلەر كۇن سايىن ەرلىك جاسايدى، قالا تۇرعىندارىنىڭ ءومىرىن قۇتقارادى. «ءبىز ق ي ك- پەن بىرلەسىپ، الەۋمەتتىك پاتەر الاتىندار ساناتىن كەڭەيتتىك، ەندى ولاردىڭ قاتارىنا توتەنشە جاعدايلار دەپارتامەنتىنىڭ قىزمەتكەرلەرى دە كىرەدى. بۇعان دەيىن بۇل تىزىمگە الەۋمەتتىك قىزمەتكەرلەر، پوليتسەيلەر، مادەنيەت جانە سپورت ماماندارىن دا ەنگىزگەن بولاتىنبىز. بيىل جوعارىدا اتالعان ساناتتاردان وزگە ق ي ك باعىتى بويىنشا بەرىلەتىن 1 مىڭ الەۋمەتتىك پاتەرگە دەنساۋلىق ساقتاۋ مەن ءبىلىم بەرۋ سالاسىنىڭ قىزمەتكەرلەرى دە ۇمىتتەنە الادى»، - دەدى ا. كولگىنوۆ.
ايتا كەتەيىك، ەلوردادا 1 ميلليون تەڭگە كولەمىندەگى تۇرعىن ءۇي سەرتيفيكاتتارى بەرىلەتىندەردىڭ ءتىزىمى دە كەڭەيتىلگەن بولاتىن. سەرتيفيكاتتى العاشقى جارنا رەتىندە «شاڭىراق» (5-10-20) باعدارلاماسىندا قولدانۋعا بولادى. ەگەر بۇرىن تىزىمدە تەك تولىق ەمەس وتباسىلار، كوپبالالى جانە مۇگەدەك بالا تاربيەلەپ وتىرعان وتباسىلار عانا بولسا، ەندى تىزىمگە حالىقتىڭ الەۋمەتتىك وسال توپتارىنىڭ بارلىق ساناتى، اتاپ ايتقاندا، جەتىم بالالار، 1 جانە Ⅱ توپتاعى مۇگەدەكتەر، زەينەتكەرلەر، ارداگەرلەر مەن تاعى باسقالار كىرەدى. «مەملەكەت باسشىسىنىڭ تاپسىرماسىمەن بيىل قولجەتىمدى باسپانا قۇرىلىسىنىڭ كولەمى ءۇش ەسە ارتتى»، - دەدى التاي كولگىنوۆ.
اۆتور: اياۋلىم التىنبەك