كورشى ەلگە شيكىزات ەكسپورتىن تەجەۋ كەرەك - ازات پەرۋاشيەۆ

نۇر- سۇلتان. قازاقپارات - «اق جول» پارتياسى شيكىزات ەكسپورتىن تەجەۋ جانە وزبەكستانعا وڭدەلگەن ونىمدەردىڭ ەكسپورتىن ىنتالاندىرۋ باعىتىندا ۇلتتىق ەكونوميكانىڭ مۇددەسىن قورعاۋدى قاجەت دەپ سانايدى.

وسى ورايدا ءماجىلىستىڭ جالپى وتىرىسىندا دەپۋتات ازات پەرۋاشيەۆ ۇكىمەتكە ساۋال جولدادى، دەپ حابارلايدى قازاقپارات ءتىلشىسى.

«ەكسپورتتى دامىتۋ - بۇل مەملەكەتتىك ەكونوميكالىق ساياساتتىڭ ماڭىزدى باعىتتارىنىڭ ءبىرى جانە وتاندىق وندىرۋشىلەردىڭ ناقتى باسەكەگە قابىلەتتىلىگىنىڭ ايقىن كورىنىسى. الايدا، ەكسپورتتىڭ دامۋىنا تەك كاسىپكەرلەردىڭ كۇش- جىگەرى عانا ەمەس، سونىمەن قاتار پوتەنتسيالدى ەكسپورتتاۋشى ەلدەردىڭ قازاقستاندىق تاۋارلارعا قاتىستى شەكتەۋ شارالارى دا اسەر ەتەدى. ت م د ەلدەرىندەگى قازاقستاننىڭ ماڭىزدى ساۋدا سەرىكتەستەرىنىڭ ءبىرى - بۇل ءبىزدىڭ جاقىن كورشىمىز وزبەكستان رەسپۋبليكاسى. كورشى ەلمەن 2019 -جىلدىڭ سوڭىندا ساۋدا كولەمى 2,7 ميلليارد ا ق ش دوللارىنان اسقان. الايدا، بۇل كورسەتكىشتەر الدەقايدا جوعارى، ال ەكسپورت قۇرىلىمى الدەقايدا كۇردەلى جانە تابىستى بولۋى مۇمكىن»، - دەدى ا. پەرۋاشيەۆ پرەمەر- مينيستر اسقار مامينگە جولدانعان دەپۋتاتتىق ساۋالىندا.

وسى ورايدا ول 1997 -جىلى ەكى ەل اراسىندا ەركىن ساۋدا تۋرالى كەلىسىم جاسالعانىن ەسكە سالدى. سونىمەن قاتار، 2013 -جىلعى 31 - مامىرداعى حاتتامامەن وزبەكستان 2011 - جىلعى 18 - قازانداعى ەركىن ساۋدا ايماعى تۋرالى كەلىسىمگە قوسىلدى. سوعان سايكەس كەلىسىمگە قاتىسۋشى مەملەكەتتەر جانە وزبەكستان تاراپتارعا كەدەندىك اۋماعىنان شىققان تاۋارلاردى اكەلۋگە كەدەندىك باجداردى قولدانباۋدى مىندەتى الدى.

«سوعان قاراماستان، بۇگىندە وزبەكستان تاراپى 96 تاۋارلىق پوزيتسياعا تاۋارلاردىڭ كەدەندىك قۇنىنان 5-تەن 50 پايىزعا دەيىن اكسيزدىك سالىق بەلگىلەدى. سونىمەن قاتار، ولار شيكىزات (ەڭ الدىمەن اۋىل شارۋاشىلىعى: بيداي، مايلى داقىلدار، ەت پەن جانۋارلاردىڭ تەرىسى جانە ت. ب. ) ەكسپورتىن ىنتالاندىرىپ، قازاقستاندىق وڭدەلگەن ونىمدەردىڭ يمپورتىن ادەيى شەكتەيدى. بولاشاقتا بۇل وزبەكستاندا شيكىزاتتار وڭدەلىپ، سول قوسىمشا قۇن، جۇمىس ورىندارى مەن جوعارى پايدا اكەلەدى. ال قازاقستاندىق شيكىزاتتان وندىرىلگەن ءونىمنىڭ ءبىر بولىگى ودان ارى قاراي، سونىڭ ىشىندە قازاقستان نارىعىنا ەكسپورتتالادى. قازاقستاندا وزبەكستاندىق تاۋارلارعا اكسيزدەر نەمەسە سالىقتار سالىنبايدى. مۇنداي جاعدايدا وتاندىق تاۋار وندىرۋشىلەرگە وزبەكستاندىق تاۋار وندىرۋشىلەرىمەن تەك وزبەك نارىعىندا عانا ەمەس، سونىمەن قاتار ءوز ەلىمىزدە دە باسەكەگە ءتۇسۋ قيىن»، - دەدى دەپۋتات.

ونىڭ سوزىنە قاراعاندا، قازاقستان مەن وزبەكستان ءبىر- بىرىنە «ەركىن ساۋدا» رەجيمىن، ياعني تاۋارلاردىڭ ەكسپورتى مەن يمپورتى ءۇشىن تەڭ جاعدايلاردى قامتاماسىز ەتۋى كەرەك. ءىس جۇزىندە، قازاقستاندىق كاسىپكەرلەر دايىن ءونىمدى ەمەس، وڭدەلمەگەن شيكىزاتتى ساتۋعا ءماجبۇر بولىپ، الاتىن پايداسىنىڭ ەداۋىر بولىگىن جوعالتىپ وتىر.

«ءبىز وزبەك شەنەۋنىكتەرىنىڭ ءوز مەملەكەتىنە دەگەن قامقورلىعىن تۇسىنەمىز. ءبىراق ءبىزدىڭ مەملەكەتتىك ورگاندار وزدەرىنىڭ ۇلتتىق مۇددەلەرىن نەگە ويلامايتىنىن تۇسىنبەيمىز؟ ارينە، وزبەك حالقى - قۇداي قوسقان دوس كورشىمىز. «اق جول» ق د پ دەپۋتاتتىق فراكسياسى وسى ايتىلعاندارعا بايلانىستى ماسەلە ۇكىمەتارالىق دەڭگەيدە شەشىلگەنگە دەيىن، شيكىزات ەكسپورتىن تەجەۋ جانە وزبەكستانعا وڭدەلگەن ونىمدەردىڭ ەكسپورتىن ىنتالاندىرۋ، سونداي- اق كورشى رەسپۋبليكادان تاۋارلارعا قوسىمشا سالىق سالۋدى ىنتالاندىرۋ ءۇشىن وسىنداي اشىق كەدەندىك ساياساتتى جۇرگىزۋ ارقىلى ۇلتتىق ەكونوميكانىڭ مۇددەسىن قورعاۋدى قاجەت دەپ سانايدى»، - دەدى ازات پەرۋاشيەۆ.

اۆتور: رۋسلان عابباسوۆ