ەلوردادا قاي ءپاننىڭ مۇعالىمدەرى جەتىسپەيدى

نۇر- سۇلتان. قازاقپارات - نۇر- سۇلتان قالاسىنىڭ ءبىلىم باسقارماسى قالا مەكتەپتەرىندە قاي ءپاننىڭ مۇعالىمدەرى جەتىسپەيتىنى تۋرالى ايتتى، دەپ حابارلايدى قازاقپارات ءتىلشىسى.

«نۇر- سۇلتان قالاسىندا نەگىزىنەن ورىس تىلىندە وقىتاتىن باستاۋىش سىنىپ مۇعالىمدەرى، ورىس ءتىلى مەن ادەبيەتى، سونداي- اق ارنايى ءبىلىمى بار مەكتەپكە دەيىنگى مۇعالىمدەر قاجەت»، - دەپ جاۋاپ بەردى باسقارما قازاقپارات اگەنتتىگىنىڭ رەسمي ساۋالىنا.

نۇر- سۇلتان قالالىق ءبىلىم باسقارماسى مەكتەپكە كادرلاردىڭ، مۇعالىمدەردىڭ جەتىسپەۋشىلىگى ماسەلەسىن بىرنەشە جولمەن شەشۋدى كوزدەپ وتىر. اتاپ ايتقاندا مۇعالىمدەردى ەلوردادا جۇمىس ىستەۋگە تارتۋ ءۇشىن ۋنيۆەرسيتەت تۇلەكتەرىمەن جازدا ونلاين كەزدەسۋلەر، اشىق ەسىكتەر، جارمەڭكەلەر، ە. بوكەتوۆ اتىنداعى قاراعاندى مەملەكەتتىك ۋنيۆەرسيتەتى، اباي اتىنداعى قازاق ۇلتتىق پەداگوگيكالىق ۋنيۆەرسيتەتى، ا. بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ تۇلەكتەرىمەن كەزدەسۋلەر وتكەن.

«ەلوردا مەكتەپتەرىنىڭ ديرەكتورلارى بوس جۇمىس ورىندار جارمەڭكەسىنە قاتىستى (ل. گۋميليەۆ اتىنداعى ەۋرازيا ۇلتتىق ۋنيۆەرسيتەتى، ا. بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتى). ولار enbek.kz پورتالىندا ۇمىتكەرلەردى (سونىڭ ىشىندە ايماقتارداعى جۇمىس ىستەيتىن مۇعالىمدەردى) قاراستىرۋدا. كادر تاپشىلىعىن جويۋ ءۇشىن نۇر- سۇلتان قالاسىنىڭ اكىمدىگى جىل سايىن ستۋدەنتتەردى پەداگوگيكالىق ماماندىقتارعا وقىتۋعا مەملەكەتتىك تاپسىرىستى ارتتىرىپ جاتىر. 2019 -جىلدان 350 ورىندى جاس پەداگوگتارعا ارنالعان جاتاقحانا اشىلدى. وسىلايشا، كادر تاپشىلىعى ماسەلەسى شەشىلۋدە»، - دەدى باسقارمادان.

اۆتور: ايان بەكەن ۇلى