+7 (701) 759 90 19
1 °С : نۇر-سۇلتان
5 °С : الماتى
USD 428.68 EUR 507.21
RUB 5.57 CNY 64.2
جاڭالىقتار

دومبىرانى الەمگە دارىپتەگەن

23 قىركۇيەك 15:01
:ءبولىسۋ
دومبىرانى الەمگە دارىپتەگەن

نۇر-سۇلتان. قازاقپارات – ءسان، سۇلۋلىق جانە ءومىر سالتى تۋرالى جازاتىن امەريكالىق Vogue جۋرنالىندا قازاقتىڭ ۇلتتىق كيىمى مەن مۋزىكالىق اسپابىن ناسيحاتتاپ جۇرگەن مارجان قاپسامات ونەرى جايىندا ماقالا جارىق كوردى.

وندا دومبىرا اسپابى مەن قازاق ۇلتتىق كويلەگىنىڭ ءسان- سالتاناتىن سۋرەتتەلىپ، «ءداستۇرلى سانگە دەگەن ساعىنىشتى جاڭا ءداۋىر ارقىلى قايتا سەزىنتەدى» دەپ جازىلعان.

قازاقتىڭ ۇلتتىق ونەرىن جان- جاقتى تۇرلەندىرىپ، بۇگىنگى تانىمعا ىقشامداپ ۇسىنىپ جۇرگەن - مارجان قاپسامات باياناۋىلدىڭ تۋماسى. 23 جاستاعى بويجەتكەن كوز تارتارلىق تابيعات اياسىندا تۇسىرىلگەن كىشىگىرىم ساحنالىق كورىنىستەردى ينستاگرام الەۋمەتتىك جەلىسىندە ۇسىنىپ كەلەدى. كليپ الەۋمەتتىك جەلىلەردە تەز تارالىپ، از ۋاقىتتا كورەرمەن كوزايىمىنا اينالدى.

بۇل تۋراسىندا جۋرنال ءتىلشىسى ليانا ساتەنشتەين «بەينەجازبالاردىڭ بىرىندە ول ۇلكەن قالا الماتىداعى شىمبۇلاق باۋرايىندا تىماق كيىپ، جىڭىشكە كەلگەن اسپاپتا وينايدى. كەلەسى ساتتە اقمولا وبلىسىنداعى قىزعىلت ءتۇستى كوبەيتۇز كولىندە جانە باسقا ورىنداردا ۇلتتىق كيىممەن وتىرىپ، ۇلتتىق مۋزىكا اسپابى - دومبىرامەن كۇي شەرتەدى. كليپتە مارجان قازاقتىڭ ءداستۇرلى كيىمىنە زاماناۋي وزگەرىس اكەلگەن جانە كوكشىل كويلەگى مەن جەرگىلىكتى ايەلدەردىڭ تۇرمىسقا شىعاردا كيەتىن «ساۋكەلە» دەپ اتالاتىن باس كيىمىن ۇيلەستىرگەن. وسى ساتتە ءداستۇرلى سانگە دەگەن ساعىنىشتى جاڭا ءداۋىر ارقىلى قاي̆تا سەزىنتەدى جانە دومبىرانى سيفرلىق زامانعا الىپ كىرەدى»، دەپ جازادى.


ماقالادا قازاق حالقىنىڭ ۇلتتىق كيىمدەرىنىڭ قالىپتاسۋى مەن ءتۇر- سيپاتى، كوشپەلى تۇرمىس، حالىقتىڭ نانىم- سەنىمدەرى جايىندا دا ءسوز قوزعالىپتى. سونداي- اق ۇلتتىق اسپاپ دومبىرانىڭ كونەدەن كەلە جاتقانىن، قايتا جاڭعىرتۋ جونىندەگى باستامالاردىڭ ارقاسىندا دومبىرانىڭ قازاقستان مادەنيەتىندە قايتا جاندانعانىن اتاپ وتەدى.

مارجان ونەرلى وتباسىندا دۇنيەگە كەلگەن، ايتۋىنشا اكەسى دە قارا دومبىرانى جانىنا سەرىك ەتكەن كىسى. قاراعاندىداعى ونەر مەكتەبىن بىتىرگەن سوڭ، شەبەرلىگىن شىڭداۋ ءۇشىن وقۋىن تاتتىمبەت اتىنداعى قاراعاندى ونەر كوللەدجىندە جالعاستىرعان. بيىل استاناداعى قازاق ۇلتتىق ونەر ۋنيۆەرسيتەتىن ويداعىداي اياقتاپ، نۇر- سۇلتان قالاسىندا دومبىرا مەكتەبىن اشقان. دومبىرا، ۆوكال، جەتىگەن، گيتارا، فورتەپيانو سىندى بىرنەشە باعىتتا جۇمىس ىستەيتىن مەكتەپ تاڭداۋلى تالاپكەرلەردى ونەرگە باۋلىپ كەلەدى.

«مەن الەمگە ۇلتتىق ونەرىمىز بەن ەلىمىزدى كورسەتكىم كەلەدى. دومبىرادا ويناسام كەۋدەمدى ماقتانىش كەرنەيدى ءارى ەركىندىكتى سەزىنەمىن. حالقىمىزدىڭ جان دۇنيەسى مەن ءداستۇرىن جەتكىزۋ ءۇشىن ۆيدەوعا ۇلتتىق كيىممەن تۇسۋگە تىرىسامىن. ءتىپتى كۇندەلىكتى كيىم كيسەم دە ۇلتتىق ستيلدىڭ ەلەمەنتتەرىن قوسامىن»، دەيدى تالاپتى جاس. كۇيشى قىز كۇمبىرلەگەن كۇيدى، اۋەلەگەن ءاندى ەشۋاقىتتا تاستاماق ەمەس. قازىر ول «ءار ۇيگە - دومبىرا» اتتى جاڭا جوبا باستاپ جاتىر. ابدەن بابىنا كەلتىرىپ جەتكىزگەن سوڭ، جاقىن ارادا كوپ نازارىنا ۇسىنۋدى قوش كورىپ وتىر.

كەمەلىنە كەلگەن حالىقتىق ءان- كۇي قۇدىرەتى كەلەشەگىن كەڭ ورىسكە بەتتەتىپ كەلەدى. بۇگىندە ديماشتىڭ انشىلىگىنە ءتانتى بولعان ايداي الەمنىڭ ونىڭ تۋعان ءتىلى - قازاق تىلىنە ايرىقشا ىنتا- ىقىلاس قويىپ جاتقانىنا كۋامىز.

ءبىر كەزدەرى زاڭعار جازۋشىمىز مۇحتار اۋەزوۆ: « ءبىز ءالى كۇيدى تىرىلتە الماي، ەسكەرە الماي كەلەمىز. جالپى، مۋزىكا اتاۋلى نارسە ەلدىڭ سەزىم بايلىعى مەن ىشكى جاراتىلىس قالپىن بىلدىرەتىن بولسا، سولاردىڭ ىشىندەگى ەڭ تولعاۋلى، ەڭ تەرەڭ سىرلىسى - كۇيى. كۇيدىڭ تىلىندەي باي ءتىل قازاقتىڭ انىندە جوق»، دەگەن ەدى. بابادان قالعان قارا دومبىرانى قاستەر تۇتىپ، الەمگە تانىتىپ، دارىپتەپ جۇرگەن مارجان قىزدىڭ ۇلتتىق ونەرىمىزدى ۇستىن ەتىپ، الدىنا ماقسات قويۋى - اۋەزوۆتەي اتاسىنىڭ ءۇمىتىنىڭ اقتاعانى دەپ بىلەمىز.



:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات