عالىمدار قازاق سوزدەرىن اۆتوماتتى تۇردە تانيتىن تەحنولوگيانى جاساپ شىعاردى
ونىڭ كومەگىمەن قازاق ءتىلىن جاھاندىق سيفرلىق الەمگە بەلسەندى ەنگىزۋگە بولادى، دەپ حابارلايدى قازاقپارات ۋنيۆەرسيتەتتىڭ باسپا ءسوز قىزمەتىنە سىلتەمە جاساپ.
جوبانى جۇزەگە اسىرۋ ءۇشىن عالىمدار قازاق تىلىندەگى ەڭ ۇلكەن دىبىستىق دەرەكتەر جيىنتىعىن – 2000 نان استام ادامنىڭ 300 ساعاتتىق جازباسىن جينادى. بۇل زەرتتەمەنى قولدانۋ قازاق ءتىلى مەن ءسوزىن ۆيرتۋالدى كومەكشىلەر ارقىلى تانۋ، ءتۇرلى باعدارلامالاردا جانە «اقىلدى ءۇي» تەحنولوگيالارىندا قولدانۋ سەكىلدى جاڭا مۇمكىندىكتەرگە جول اشادى. سونىمەن قاتار، بۇل جوبا قازاقستاندا ينكليۋزيانىڭ دامۋىنا ۇلكەن سەرپىن بەرەدى. جاڭا تەحنولوگيانى ەرەكشە قاجەتتىلىگى بار ادامدار كەڭىنەن قولداناتىن داۋىس جانە ءماتىن باعدارلامالارىندا پايدالانۋعا بولادى.
«بۇرىن ۇلكەن دەرەكتەر جيىنتىعىنىڭ جەتكىلىكتى بولماۋى قازاق ءتىلىنىڭ سيفرلىق الەمدەگى مۇمكىندىكتەرىن شەكتەيتىن، سوندىقتان ءبىز وسى جوبانى جۇزەگە اسىردىق. ەندى ءبىز ەكونوميكا مەن قوعام دامۋىنا پايدالى بولسىن دەگەن نيەتپەن قازاق تىلىندەگى دىبىستىق دەرەكتەر جيىنتىعىن اشىق باستاپقى كودىمەن بىرگە بارلىق زەرتتەۋشىلەر جانە كاسىپكەرلەرمەن بولىسۋگە دايىنبىز» - دەيدى ISSAI NU ديرەكتورى، پروفەسسور اتاكان ۆارول.
جوبانىڭ ىسكە قوسىلۋى نازاربايەۆ ۋنيۆەرسيتەتىنىڭ اقىلدى جۇيەلەر مەن جاساندى ينتەللەكت ينستيتۋتىنىڭ قۇرىلعانىنا ءبىر جىل تولۋىنا ورايلاستىرىلدى. 14-قىركۇيەكتە ISSAI ءوزىنىڭ العاشقى تۋعان كۇنىن اتاپ ءوتتى. مىنا سىلتەمەگە كىرىپ، قازاق تىلىندەگى داۋىستىق دەرەكتەر جيىنتىعىمەن تانىسۋعا، سونداي-اق قازاق ءتىلىن اۆتوماتتى تۇردە تانۋ جۇيەسىن تەكسەرۋگە بولادى.