12:15, 23 - قىركۇيەك 2020 | GMT +6
قوستانايدا تۇتقىن ەسىگى دۇرىس جابىلماعان پوليتسيا كولىگىنەن ءتۇسىپ، قاشىپ كەتكەن - ۆيدەو
قوستاناي. قازاقپارات - جۇمىسىنا سالعىرت قاراعان قوستاناي وبلىسى پوليتسيا دەپارتامەنتىنىڭ قىزمەتكەرلەرى تارتىپتىك جاۋاپقا تارتىلدى، دەپ حابارلايدى قازاقپارات.
وبلىستىق پوليتسيا دەپارتامەنتىنىڭ باسپا ءسوز قىزمەتى الەۋمەتتىك جەلىدە تاراعان ۆيدەوعا قاتىستى پىكىر ءبىلدىردى. بەينەجازبادا ەر ادامنىڭ پاترۋل كولىگىنىڭ ارتقى ەسىگىنىڭ شىعىپ كەتكەنى كورىنەدى.
«بۇل وقيعا 2020 -جىلعى 19-قىركۇيەكتە كاربىشەۆ جانە جاۋىنگەر- ينتەرناتسيوناليستەر كوشەلەرىنىڭ قيىلىسىندا بولعان. پاترۋل پوليتسيا قىزمەتكەرلەرى ۇساق بۇزاقىلىق ءۇشىن ۇستالعان ەر ادامدى مەديتسينالىق ايىقتىرعىشقا الىپ كەلە جاتقان. پاترۋل ماشيناسى توقتاعان كەزدە، ءتارتىپ بۇزۋشى كولىكتەن شىعىپ كەتكەن. الايدا، ول بىردەن ۇستالىپ، مەديتسينالىق ايىقتىرعىشقا جەتكىزىلدى» دەلىنگەن پوليتسيا اقپاراتىندا.
اتالعان فاكتى بويىنشا جەرگىلىكتى پوليتسيا قىزمەتى قىزمەتتىك تەرگەۋ جۇرگىزدى. پاترۋل كولىگىنىڭ ەسىگىن دۇرىس جاپپاعان پوليتسەيلەر تارتىپتىك جاۋاپقا تارتىلدى.