ماريانا شۇڭعىماسىنا قاتىستى قىزىق دەرەكتەر
ماريانا شۇڭعىماسى - وتە از زەرتتەلگەن، قۇپياعا تولى جىراق ءارى بۇگىنگى تاڭدا انىقتالعان ەڭ تەرەڭ جەر. ونىڭ ەڭ تۇپكى نۇكتەسى «چەللەندجەر تۇڭعيىق» دەپ اتالادى. بۇل شۇڭعىمانى زەرتتەگەن 2 تەڭىز كەمەسىنىڭ قۇرمەتىمەن اتالعان ەكەن.
2011 -جىلى عالىمدار 10994 مەترگە تەرەڭدىككە جەتكەن. بۇل تەرەڭدىكتە كۇن ساۋلەسى مۇلدەم تۇسپەيتىنىنە قاراماستان ەكى جۇزدەن استام ميكرواعزالار مەن كىشكەنتاي تىرشىلىك يەلەرى تابىلعان.
شۇڭعىمانى مەكەندەۋشىلەردى زەرتتەۋ ارقىلى ءتىرى اعزالاردىڭ قورشاعان ورتاعا قالاي ۇيرەنەتىنىن انىقتاۋعا بولادى دەيدى عالىمدار. ودان بولەك، ادام كوزىنەن تىس جەردە ءومىر ءسۇرىپ جاتقان اعزالار جەردەگى تىرشىلىكتىڭ قالاي پايدا بولعانىن تۇسىنۋگە جول اشۋى مۇمكىن.
ءبىر قىزىعى، ماريانا شۇڭعىماسىندا كادىمگى تاۋ جوتالارى بار. 4 بىردەي شىڭنىڭ بيىكتىگى ەكى شاقىرىمنان اسىپ جىعىلادى.
شۇڭعىمانىڭ ماڭىندا ماريانا ارالدارى ورنالاسقاندىقتان وعان ماريانا اتاۋىن بەرگەن.
1960 -جىلى دون ۋولش پەن جاك پيكار وزدىگىنەن جۇزەتىن تريەست قايىعىمەن 11 مىڭ مەتر تەرەڭدىككە ءتۇستى. وسىدان سوڭ بۇل جەردى «تريەست تەرەڭدىگى» دەپ اتاپ كەتتى.
سۋ استىندا قىسىم ەسەلەنە تۇسەدى. ماريانا شۇڭعىماسىنداعى قىسىم اتموسفەرادان 1072 ەسە جوعارى.
كۇن ساۋلەسى تۇسپەيتىن ماريانا شۇڭعىماسىنداعى سۋدىڭ تەمپەراتۋراسى 2 گرادۋستان اسپايدى. دەگەنمەن كەيبىر جەرىندە گيدروتەرمالىق تەسىكتەر بولعاندىقتان سۋدىڭ تەمپەراتۋراسى 370 گرادۋسقا دەيىن جەتەدى.
شۇڭعىمادا قاۋىپتى تىرشىلىك يەلەرى ءومىر سۇرەدى. مىسالى، ءبىر جاسۋشالى كسەنوفيوفورا امەباسى اۋىر مەتالدان تۇرادى. ونىڭ ىشىندە ءقاۋىپتى سىناپ، قورعاسىن مەن ۋران بار.
massaget.kz