قاسىم- جومارت توقايەۆ مەملەكەتتىك حاتشىنى قابىلدادى
پرەزيدەنتكە بۇكىل الەمدىك پاندەمياعا قاراماستان ۇلى ابايدىڭ 175 -جىلدىعى، ءال- ءفارابيدىڭ 1150 -جىلدىعى، التىن وردانىڭ (ۇلىق ۇلىس) 750 -جىلدىعى جانە ت م د ەلدەرىنىڭ بيىلعى مادەني استاناسى شىمكەنت قالاسىنىڭ 2200 -جىلدىعىنا ارنالعان ءىس- شارالاردىڭ مازمۇندى تۇردە جۇزەگە اسۋى تۋرالى اقپارات بەرىلدى. كەزدەسۋدە مەملەكەت باسشىسى كەلەسى جىلى وتەتىن تاۋەلسىزدىكتىڭ 30 -جىلدىعىنا دايىندىق ماسەلەسىنە ەرەكشە كوڭىل ءبولۋ قاجەت ەكەنىن اتاپ ءوتتى. قاسىم- جومارت توقايەۆ ساياسي قۋعىن- سۇرگىن قۇرباندارىن تولىق اقتاۋ جونىندەگى ارنايى مەملەكەتتىك كوميسسياعا كەزىندە قازاق حالقىنىڭ باسىنان وتكەن اشارشىلىق قاسىرەتى تۋرالى ءىس- شارالار قابىلداۋدى مىندەتتەدى. سونىمەن قاتار مەملەكەتتىك حاتشى قازاق ءتىلىن لاتىن الىپبيىنە كوشىرۋ جانە مەملەكەتتىك ءتىلدىڭ فۋنكتسيونالدىق مارتەبەسىن كوتەرۋ جونىندەگى ۇسىنىس- پىكىرلەردى باياندادى. «رۋحاني جاڭعىرۋ» باعدارلاماسىن ۇلتتى جاڭعىرتۋ باعدارلاماسى رەتىندە جالعاستىرۋ قاجەتتىگى اتاپ ءوتىلدى. پرەزيدەنت مەملەكەتتىك حاتشىعا 1-قىركۇيەكتەگى قازاقستان حالقىنا ارناعان جولداۋىندا ايتىلعان الەۋمەتتىك ماسەلەلەردى شەشۋدە ورتالىق جانە جەرگىلىكتى اتقارۋشى ورگانداردىڭ جۇمىسىن ۇيلەستىرۋدى باقىلاۋدا ۇستاۋدى تاپسىردى.