تاسمانيا ارالىندا كيتتەر جاپپاي قىرىلىپ جاتىر

نۇر- سۇلتان. قازاقپارات - اۋسترالياداعى تاسمانيا ارالىنىڭ باتىس جاعالاۋىندا 270-كە جۋىق كيت تاياز سۋدا قالىپ قويعان. سالدارىنان ولاردىڭ 90-ى ءولدى، دەپ حابارلايدى قازاقپارات euronews-كە سىلتەمە جاساپ.

عالىمدار قىرىلعان سۇتقورەكتى جانۋارلاردىڭ سانى كوبەيەتىنىنە الاڭداپ وتىر. جەرگىلىكتى تەڭىزدەگى تابيعاتتى قورعاۋ قىزمەتىنىڭ قۇتقارۋشىلارى دۇيسەنبى كۇنى ماككۋوري مۇيىسىندە كيتتەردىڭ ءۇش توبىن انىقتاعان. 200-گە جۋىق كيت قۇمدى سۋى تاياز جەرگە شىعىپ كەتكەن. ءتىرى قالعان كيتتەردى قۇتقارۋ بويىنشا كۇردەلى وپەراتسيانىڭ بىرنەشە كۇنگە سوزىلاتىنى كۇتىلىپ وتىر.

كيتتەردىڭ تاسمانيا جاعالاۋىنا قالاي كەلگەنى بەلگىسىز. ولاردى قۇتقارۋ جۇمىستارىنا 40 ماماننان قۇرىلعان كوماندا جۇمىلدىرىلدى. ارال بيلىگى كومەكشىلەرىنىڭ جەتكىلىكتى ەكەنىن ايتىپ، جۇرتشىلىقتى وقيعا ورنىنان الىس جۇرۋگە شاقىردى.

اۆتور: زارينا تۋعانبايەۆا