ستۋدەنتتەردەن كۋرستى اياقتاعان كەزدە وتكىزۋى ءتيىس كەتۋ قاعازى تالاپ ەتىلمەيتىن بولادى
بۇل تۋرالى ءبىلىم جانە عىلىم ۆيتسە- ءمينيسترى ميراس داۋلەنوۆ ءمالىم ەتتى، دەپ حابارلايدى قازاقپارات ءتىلشىسى.
«جوعارى وقۋ ورىندارى ءار وقۋ جىلى اياقتالعان كەزدە ستۋدەنتتەردەن كەتۋ قاعازىن تالاپ ەتەتىنى بەلگىلى. كەيبىر ج و و قازىر بۇل تالاپتى سيفرلىق فورماتقا اۋىستىرىپ جاتىر. ياعني، قازىردىڭ وزىندە كەتۋ قاعازىن قاعاز جۇزىندە تالاپ ەتپەيتىندەي نەگىز بار. سول سەبەپتى ارىپتەستەردەن (ج و و- داعى) كەلەسى جىلدىڭ جازىنان باستاپ ستۋدەنتتەردەن ەسەپشىلەردىڭ، كىتاپحانانىڭ ءمورى تالاپ ەتىلەتىن كەتۋ قاعازىن تالاپ ەتپەۋدى وتىنەمىز»، - دەدى ميراس داۋلەنوۆ ءبىلىم جانە عىلىم مينيسترلىگىنىڭ اپپاراتتىق وتىرىسىندا.
ەسكە سالا كەتسەك، بۇعان دەيىن اسحات ايماعامبەتوۆ ءبىلىم جانە عىلىم مينيسترلىگى ۋنيۆەرسيتەتتەردەن ەشقانداي قۇجاتتاردى تالاپ ەتپەيتىنىن ءمالىم ەتكەن ەدى. ءمينيستردىڭ ايتۋىنشا، جوعارى وقۋ ورىندارىنىڭ پەداگوگتارىنا قاتىستى قاعازباستىلىق پروبلەماسىن شەشۋ كەرەك.
اۆتور: ايان بەكەن ۇلى