قازاقستاندىقتار جەمقورلىققا توزىمسىزدىك تانىتا باستادى - مارات ءباشىموۆ

نۇر- سۇلتان. قازاقپارات - قازاقستاندىقتار جەمقورلىققا توزىمسىزدىك تانىتا باستادى. مۇنداي پىكىردى ەۋروپالىق قۇقىق جانە ادام قۇقىقتارى ينستيتۋتىنىڭ ديرەكتورى مارات ءباشىموۆ ءبىلدىردى، دەپ حابارلايدى قازاقپارات ءتىلشىسى.

«قازىرگى ۋاقىتتا ءبىزدىڭ سانامىز وزگەرگەن. اركىم ءوزىن، وتباسىن ويلاپ، قاربالاستىق ازايدى. كوپتەگەن جايتتان قورقۋدى دا قويدىق. مىنە، وسىنىڭ اياسىندا جەمقورلىقپەن ىمىراسىز كۇرەس جۇرگىزۋىمىز قاجەت»، - دەدى ول سىبايلاس جەمقورلىققا قارسى ءىس- قيمىل اگەنتتىگى الاڭىندا وتكەن ونلاين بريفينگ بارىسىندا.

سونىمەن قاتار م. ءباشىموۆ ەلىمىزدە بۇل باعىتتا جۇرگىزىلىپ جاتقان رەفورمالاردىڭ دا جەمقورلىقپەن كۇرەسكە وڭ ىقپال تيگىزىپ وتىرعاندىعىن باسا ايتتى.

«ادامدار اقشاسىمەن، تامىر- تانىسىمەن جالتارىپ كەتۋىنە مۇمكىندىك بەرەتىن بارلىق قالتارىستارعا توسقاۋىل قويىلدى. ەندى ادام جاساعان ارەكەتى ءۇشىن تۇرمەگە وتىراتىندىعىن ءتۇسىنۋى ءتيىس. قازىرگى ۋاقىتتا ەلىمىزدە «اشىق بيۋدجەت» بويىنشا وتە جاقسى باعدارلاما جۇزەگە اسىرىلىپ جاتىر. وسى باعدارلامانىڭ ارقاسىندا كەز كەلگەن ازامات بيۋدجەتتىڭ ءار تەڭگەسىنىڭ قايدا جۇمسالعاندىعىن قاداعالاپ وتىرا الادى. وسى جۇمىستى ودان ارى جالعاستىرعان ءجون»، - دەدى مارات ءباشىموۆ.

ينستيتۋت ديرەكتورىنىڭ اتاپ وتۋىنشە، جەمقورلاردان مەملەكەت پايداسىنا ءوندىرىلىپ الىنعان اقشا قاراجاتىن دەنساۋلىق ساقتاۋ، ءبىلىم بەرۋ سالالارىنا جۇمساپ، اۋرۋحانالار مەن مەكتەپتەر، بالاباقشالار سالۋ قاجەت.

اۆتور: مارلان جيەمباي