قازاقستاندىق عالىمدار استىقتىڭ ساپاسىن انىقتايتىن كومپونەنت ويلاپ تاپتى
«ق ر ب ع م عىلىم كوميتەتى م. ا. ايتحوجين اتىنداعى مولەكۋلالىق بيولوگيا جانە بيوحيميا ينستيتۋتىنىڭ ءداندى داقىلدار بيوحيمياسى زەرتحاناسىندا ءبىر توپ عالىم بيولوگيا عىلىمدارىنىڭ كانديداتى ايدار حاكىمجانوۆتىڭ جەتەكشىلىگىمەن بيوحيميالىق ادىستەردىڭ كومەگىمەن بيداي دانىندەگى ەڭ قىزعىلىقتى فەرمەنتتەردىڭ ءبىرى - الفا- اميلازانى زەرتتەۋ بويىنشا ەكسپەريمەنتتەر جۇرگىزدى. اتالعان فەرمەنت مولشەرىن ستاندارتتى ساراپتامالىق ادىستەرمەن ولشەۋ وتە قيىن، ءبىراق بۇل استىقتىڭ ءونۋ جاعدايىنىڭ ماڭىزدى كورسەتكىشى سانالادى»، - دەدى عىلىم كوميتەتىنىڭ باسپا ءسوز قىزمەتى.
عالىمدار الفا- اميلازا فەرمەنتىنىڭ ءبىر ءتۇرىن مۇقيات زەرتتەپ، ودان جوعارى دارەجەلى انتيدەنەلەر العان. ولاردىڭ نەگىزىندە الفا- اميلازا مولشەرىن ءدال انىقتايتىن جوعارى سەزىمتال يممۋنوتەستەر جاسالدى. داندەگى فەرمەنت مولشەرىنىڭ كورسەتكىشى دەنساۋلىققا زياندى، تاماقتانۋعا جارامسىز شالا پىسكەن ونىمدەردى بولدىرماۋ ءۇشىن ناندى پىسىرگەنگە دەيىنگى ۇننىڭ ساپاسىن باعالاۋعا، سونداي- اق بيدايدىڭ جاڭا سورتتارىن شىعارۋ كەزىندەگى سۇرىپتامالىق پروتسەستى جۇرگىزۋ ءۇشىن قاجەتتى استىقتىڭ ساپاسىن انىقتاۋعا مۇمكىندىك بەرەدى.