اسقار مامين: ۇكىمەت اگروونەركاسىپتىك كەشەندەگى جاڭا جوبالاردى قولدايدى

نۇر-سۇلتان. قازاقپارات - ۇكىمەت اگروونەركاسىپتىك كەشەندەگى جاڭا جوبالاردى قولدايدى.

بۇل تۋرالى ۇكىمەت وتىرىسىندا پرەمەر- مينيستر اسقار مامين ءمالىم ەتتى، دەپ حابارلايدى قازاقپارات ءتىلشىسى.

«جاڭا جوبالاردى ۇسىنىڭىزدار، ولاردى قولدايمىز. بۇعان ۇكىمەت تاراپىنان باسىمدىق بەرىلەدى. ءبىزدىڭ الدىمىزعا ءتيىستى مىندەت جۇكتەلدى، وڭىردە ازىق- تۇلىك حابىن قۇرۋ ماقساتى بار. اتاپ ايتقاندا، اگروونەركاسىپتىك كەشەندى دامىتۋ، ەكسپورتتىق الەۋەتتى كوتەرۋ ءۇشىن مۇمكىندىك جوعارى»، - دەدى ا. مامين ونلاين رەجيمدە اقمولا جانە قوستاناي وبلىستارىنداعى ءىرى شارۋاشىلىق باسشىلارىنىڭ بايانداماسىن تىڭداۋ بارىسىندا.

«ەڭبەك ونىمدىلىگىن ارتتىرىپ، جاڭا تەحنولوگيالاردى ەنگىزىپ، جاڭا ەكسپورتتىق نارىقتارعا شىعۋ كەرەك. مەملەكەت باستامالارىڭىزدى تولىقتاي قولدايدى. بۇل قادامدار ەلىمىزدىڭ بارلىق وڭىرىندەگى اگرارلىق قىزمەتكەرلەرگە قاتىستى، سايكەسىنشە قولداۋ جاسايمىز»، - دەدى ۇكىمەت باسشىسى.

وسى ورايدا ا. مامين قازاقستاندا ەكونوميكانى داتىتۋدا اۋقىمدى الەۋەت بار ەكەنىن، ونى تولىقتاي جۇزەگە اسىرۋ قاجەتتىگىن اتاپ ءوتتى. بۇدان بۇرىن حابارلانعانداي، بيىل گەكتارىنا 12,3 سەنتنەر ورتاشا تۇسىمدىلىكپەن 18,2 ميلليون توننا استىق باستىرىلدى. ۇكىمەت وتىرىسىندا پرەمەر- مينيستر استىقتى ساتىپ الۋ مەن تاسىمالداۋعا قاتىستى ءبىرقاتار تاپسىرما بەردى.

اۆتور: رۋسلان عابباسوۆ