نۇرعالي ءنۇسىپجانوۆ ەكىنشى رەت وتباسىن قۇرعان سوڭ العاش رەت سۇحبات بەردى

نۇر-سۇلتان. قازاقپارات - قازاقستاننىڭ حالىق ءارتىسى، قازاقستاننىڭ مەملەكەتتىك سىيلىعىنىڭ لاۋرەاتى، «پاراسات»، «قۇرمەت» وردەندەرىنىڭ يەگەرى نۇرعالي ءنۇسىپجانوۆ سۇحبات بەردى.

حالىق سۇيگەن ازامات، ومىرگە قۇشتار بولىپ وسكەن ءانشى وتكەنى مەن بۇگىنى جايلى ايتتى. ونەر الەمىنە قالاي كەلگەنىن تاعى ءبىر بايانداپ بەردى.

بۇل تۋرالى حالىق ءارتىسى NUR TILEÝ باعدارلاماسىندا ايتتى.

نۇرعالي ءنۇسىپجانوۆ تالدىقورعان وبلىسىنىڭ گۆارديا اۋدانىنداعى كۇرەڭبەلدىڭ (التىنەمەل) جانىنداعى دولانالى اۋىلىندا 1937 -جىلدىڭ 5-قاڭتارىندا قاراپايىم شوپان وتباسىندا دۇنيەگە كەلدى.

اۋىلدا وسكەن بوزبالا مەكتەپتەن كەيىن اتا-اناسىنا قولعانات بولىپ، ەكى جىل قوي باعادى. قارت اتا-اناسىنىڭ جانىندا جۇرەدى. مەكتەپتە وقىپ جۇرگەن شاعىندا-اق اۋدان مەن وبلىسقا تانىلىپ قالعاندىقتان ونىڭ وقۋعا دەگەن قۇمارلىعى ارتا تۇسەدى. مۇنى بايقاعان اكەسى ۇلىن وقۋعا اتتاندىرىپ، باتاسىن بەرگەن ەكەن.

«باستاپقىدا سۋرەتشى بولعىم كەلدى. 4-5-سىنىپتا جۇرگەنىمدە اعاشتى ويىپ، دومبىرا جاساعانمىن. سونداي قابىلەتىم بولعاندىقتان سۋرەتشى بولسام دەدىم. كەيىن ارحيتەكتور بولسام با دەپ ويلادىم. سەبەبى اكە-شەشەم مال سوڭىندا جۇرگەن جاندار ەدى. جۇدەۋ ۇيدە تۇردى. اكە- شەشەم قارت كىسىلەر ەدى. ولاردىڭ جيعان ارتىق دۇنيەسى بولعان جوق. ولارعا ءۇي سالىپ بەرۋدى ارماندادىم. 7 جىل كونسەرۆاتوريادا وقىدىم. كانيكۋل كەزىندە بارىپ، ءۇي سالۋدى باستادىم. سولايشا 3 جىل ىشىندە ەكى بولمەلى ءۇي سالىپ بەردىم. ول ءۇي ءالى دە بار»، - دەدى نۇرعالي اعا.

اكە-شەشەنىڭ باتاسىن العان سوڭ جاس ءانشىنىڭ تاسى ورگە دومالاپ، اندەرى كەڭىنەن تانىلا باستادى. قازاقتىڭ ماڭدايىنا بىتكەن جۇلدىزى، كومپوزيتور نۇرعيسا تىلەنديەۆپەن تانىسىپ، ءومىرىنىڭ سوڭىنا دەيىن اعا-ءىنى بولىپ ارالاستى.

«نۇرعيسا تىلەنديەۆ اعام ماعان 30 دان اسا ءان جازدى. ءومىرىنىڭ سوڭعى 30 جىلىندا مەنىڭ داۋسىما ارنايى اندەر جازدى. مەن ساپارلاپ ءبىر ايداي كەلمەي كەتسەم، تەلەفون سوعىپ شاقىراتىن. بارسام كوزىنە جاس الا قۇشاقتايدى. «ادالىم»، «جالعىزىم» دەپ اتايتىن. ول كىسى ەكەۋمىزدىڭ ارامىزدا تازا تۆورچەستۆولىق ماحاببات بولدى. ونى شىعارماشىلىق ادامدار جاقسى تۇسىنەدى. ودان بولەك ءشامشى اعامدى قاتتى قۇرمەتتەيمىن. ەكەۋى دە مەنى اتىمدى اتاماي نۇرعاش دەۋشى ەدى»، - دەپ ءانشى كوزىنە جاس الا ساعىنىشپەن ەسكە الدى.

حالىق ءارتىسى بيبىگۇل تولەگەنوۆا، روزا باعلانوۆا، ەرمەك سەركەبايەۆ سىندى تۇلعالاردىڭ جەكە باسىن قۇرمەتتەپ، ونەرىنە ءتانتى ەكەنىن ايتتى. وزىنە ۇلگى تۇتتى، ولاردان ۇيرەنگەن نارسەم كوپ بولدى دەيدى.

ءانشى جاقىندا زامانداسىنان ايىرىلدى. ءوزى ومىردەن وتكەن دوسى، مىقتى كومپوزيتور مىڭجاسار ماڭعىتايەۆتىڭ اماناتىن ارقالاپ قالعانىن ايتتى.

«مىڭجاسار ماڭعىتبايەۆ دەگەن كومپوزيتور نۇراعامنان كەيىنگى جاقسى، كاسىبي كومپوزيتور ەدى. جاقىندا ومىردەن ءوتتى. ماعان 5 ءانىن امانات ەتىپ قالدىرىپ كەتتى. سول اندەردى وركەستردىڭ سۇيەمەلدەۋىمەن شىرقاپ، ەلگە جەتكىزىپ، 80 جىل ءومىر سۇرگەن سازگەردىڭ اماناتىن ورىنداسام دەگەن جوسپارىم بار»، - دەدى ءنۇسىپجانوۆ.

حالىق ءارتىسىن كوپشىلىك وزىندىك ستيلىمەن دارالاپ جاتادى. ساحنادا اسقان سالماقتىلىق تانىتىپ، قوزعالماستان ءانىن شىرقايدى. ءانشى وسى رەتتە ساحنادا قوزعالىسسىز تۇرىپ ءان ايتۋىنىڭ سەبەبىن اشىپ ايتتى.

«مەنىڭ مىندەتىم اقىن مەن سازگەردىڭ اماناتىن ەلگە جەتكىزۋ. مەن ءوزىمدى كورسەتۋگە ۇمتىلعان ەمەسپىن. مەن ءوزىمنىڭ قيمىلىم ارقىلى، ءبيىم ارقىلى ءوزىمدى كورسەتكىم كەلمەيدى. مەن ءاننىڭ وزىمنەن دۇرىس شىققانىن قالايمىن»، - دەدى ءانشى اعا.

ادالدىقتى، اقيقاتتى جانى سۇيەتىن ءانشى اعا ورەلى اڭگىمە ايتىپ، ساليقالى سۇحبات بەردى. «اكەم شوپان بولسا دا، دانا كىسى ەدى» دەيدى. اكەسىنىڭ كوزى تىرىسىندە ايتقان دانالىق وسيەتىن جەتكىزدى.

«اكەمنىڭ وسيەتىمەن ءومىر ءسۇردىم. «اماناتقا ادال بول. اقيقاتتى ءسۇي» دەگەن قاعيداسى ماڭگى جادىمدا قالدى»، - دەدى حالىق ءارتىسى.

ايتا كەتەيىك، نۇرعالي ءنۇسىپجانوۆ 80 نەن اسقان شاعىندا وزىنەن 45 جاس كىشى جۋرناليست قىزدى جار ەتتى. ءانشىنىڭ ەكىنشى رەت وتاۋ قۇرعانىن قۇپ كورگەندەر دە، سىناعاندار دا جەتەرلىك. بۇل ءانشىنىڭ ەكىنشى رەت وتاۋ قۇرعاننان كەيىنگى العاشقى كولەمدى سۇحباتى.