اسحات ايماعامبەتوۆ ج و و باسشىلارىنا ارنايى تاپسىرما بەردى
مينيسترلىك اپپاراتىنىڭ وتىرىسىندا اسحات ايماعامبەتوۆ وسىلاي ايتتى، دەپ حابارلايدى قازاقپارات ءتىلشىسى.
«ءارتۇرلى رەفورمالار جۇزەگە اسىرىلىپ جاتىر. ولار كەرەك. الايدا سونىڭ ىشىندە ەڭ باستى ماسەلەنىڭ ءبىرى - پەداگوگتارعا كەدەرگى جاسايتىن ەسەپ، جالاقى جانە دەربەستىك ماسەلەسى. ءبىز مەكتەپتەر بويىنشا ارنايى بۇيرىقتار قابىلداپ، تولتىراتىن ناقتى ءتىزىمدى بەكىتتىك. مەكتەپتەگى ماسەلە ەداۋىر رەتتەلىپ قالدى. كەزىندە ەلەكتروندى كۇندەلىكتى ەنگىزگەن كەزدە دە قانشاما سۇراق تۋىنداعان. ءبىراق سيفرلاندىرۋ باعىتىندا ءبىز العا جىلجىدىق»، - دەدى اسحات ايماعامبەتوۆ مينيسترلىكتىڭ اپپاراتتىق وتىرىسىندا.
اسحات ايماعامبەتوۆتىڭ ايتۋىنشا، جوعارى وقۋ ورىندارىنىڭ پەداگوگتارىنا قاتىستى قاعازباستىلىق پروبلەماسىن شەشۋ كەرەك.
«قازىرگى ۋاقىتتا ءبىز اكادەميالىق جانە باسقارۋشى قۇزىرەتتەردىڭ ءبارىن ۋنيۆەرسيتەتتەرگە بەرىپ جاتىرمىز. سونىڭ شەڭبەرىندە مينيسترلىك رەتتەپ وتىرعان ءارتۇرلى قۇجاتتىڭ ءبارىن الىپ تاستادىق. 2-قىركۇيەك كۇنى بۇيرىققا قول قويىپ، ونى ادىلەت مينيسترلىگىنە تىركەدىك. ەندى وسى بۇيرىقتىڭ شەڭبەرىندە جۇمىس ىستەۋ كەرەك. ءبىلىم جانە عىلىم مينيسترلىگى ۋنيۆەرسيتەتتەردەن ەشقانداي قۇجاتتاردى تالاپ ەتپەيدى»، - دەدى ول.
مينيستر ج و و پەداگوگتارى قاجەتسىز جۇمىستاردىڭ بارىنەن بوساپ، ءوز مىندەتىمەن اينالىسۋى كەرەكتىگىن ءمالىم ەتتى.
«قازىر ميعا سىيمايتىن ەسەپ تۇرلەرى بار. مويىنداۋ كەرەك. كاسىپتى ايقىنداۋ جۋرنالى، جۇمىسقا ورنالاسقانى تۋرالى انىقتاما تالاپ ەتىلەدى. ج و و-لاردىڭ ءبارى دەمەيمىن، ءبىراق ءبىرازى ءالى كۇنگە دەيىن وسى انىقتامانى تالاپ ەتىپ ءجۇر. ونىڭ نە كەرەگى بار؟ ءبىلىم جانە عىلىم مينيسترلىگىنە ول قۇجات مۇلدە كەرەك ەمەس. جۇمىسقا ورنالاسۋ كورسەتكىشىن ءبىز باسقا مەملەكەتتىك ورگانداردىڭ ەلەكتروندى بازاسىنان الا سالامىز. مالىمەتتەر جەتەدى. ءتىپتى پەداگوگتارعا ويعا سىيمايتىن تالاپتى قوياتىندار بار. اسىرەسە جازدا كەيبىر ج و و- لارداعى پەداگوگتاردىڭ جۇمىسى قانشاما ابيتۋريەنتتى وقۋ ورنىنا تارتا الاتىنىنا بايلانىستى باعالانادى. بۇل ءتىپتى نونسەنس. شىن مانىندە پەداگوگ ءوز ىسىمەن اينالىسۋى كەرەك»، - دەدى ول.