جامبىل وبلىسىندا العاش رەت ءسۇت بەزى قاتەرلى ىسىگىنە بىرەگەي وتا جاسالدى
بۇعان دەيىن مۇنداي وپەراتسيالار تەك الماتىداعى قازاق ونكولوگيا جانە راديولوگيا عىلىمي-زەرتتەۋ ينستيتۋتىندا جانە نۇر-سۇلتانداعى ۇلتتىق عىلىمي ونكولوگيالىق ورتالىعىندا جاسالاتىن.
بۇل تۋرالى وبلىس اكىمدىگى دەنساۋلىق ساقتاۋ باسقارماسىنىڭ باسپا ءسوز قىزمەتى حابارلادى.
تالاس اۋدانى قاراتاۋ قالاسىنىڭ 46 جاستاعى تۇرعىنى ديسپانسەرلىك ەسەپتە «وڭ جاق ءسۇت بەزىنىڭ كارتسينوماسى، 2-ساتى» كلينيكالىق دياگنوزىمەن تىركەلگەن.
ناۋقاس اديۋۆانتتى ەمەس حيميالىق تەراپيانىڭ ءتورت كۋرسىنان ءوتىپ، ىسىكتەرىنىڭ رەگرەسسياسى %50 دەيىن جەتىپتى.
جەدەل تۇردە وتا جاساۋ تۋرالى شەشىم قابىلدانعاننان سوڭ، بىلىكتى دە تاجىريبەلى دارىگەرلەر قايرات تولەشيەۆ پەن جاندوس سەيداحمەتوۆ «ينتراوپەراتسيالىق ەكسپرەسس-تسيتولوگيالىق زەرتتەۋدى قولدانا وتىرىپ، دەرتتىڭ وشاعىن الىپ تاستادى»، - دەدى باسقارمانىڭ باسپا ءسوز قىزمەتىنىڭ جەتەكشىسى تولقىن ومىربايەۆا.
مامانداردىڭ ايتۋىنشا، مۇنداي وتانىڭ باستى ەرەكشەلىگى - ءسۇت بەزىن ساقتاۋعا جانە قاتەرلى ىسىكتىڭ قايتالانۋىن بولدىرماۋعا باعىتتالعان. بۇرىن ونكولوگيالىق اۋرۋلارعا حيرۋرگيالىق ارالاسۋدىڭ باسقا ءتاسىلى قولدانىلاتىن.
بۇل ءادىستىڭ تيىمدىلىگى - قوسىمشا اۋرۋدىڭ الدىن-الۋعا دا سەپتىگىن تيگىزەتىندىگىندە بولىپ وتىر. وبلىستىق كوپ بەيىندى اۋرۋحانا دارىگەرلەرىنىڭ ىزدەنىسى مەن ۇيلەسىمدى، ءارى تابىستى جۇمىسىندا تسيتولوگيالىق زەرتحانا قىزمەتكەرلەرى تاتيانا سيم مەن راديولوگيا ءبولىمىنىڭ مەڭگەرۋشىسى روزا بەگيمبايەۆانىڭ زەرتتەۋلەرى ماڭىزدى ءرول اتقارعانىن اتاپ وتكەن ءجون.