سەمەي قالاسىندا جالعان پوليتسەي ۇستالدى
ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، الاياقتىڭ ارباۋىنا تۇسكەن 47 جاستاعى ايەل پوليتسياعا ارىز جازعان. وسى جىلدىڭ شىلدە ايىندا «وپپو» ماركالى ۇيالى تەلەفونىن جوعالتىپ العان ول بۇل جايلى جاقىن تانىمايتىن فارحات ەسىمدى ازاماتقا ايتقان. ەر ادام ءوزىنىڭ پوليتسيا قىزمەتكەرى ەكەنىن العا تارتىپ، جوعالعان تەلەفوندى تەزىرەك تابۋعا ۋادە بەردى. جالعان پوليتسەي ءوز قىزمەتىن جەتى مىڭ تەڭگەگە باعالاعان. الايدا اقشانى العاننان كەيىن ەر ادام تەلەفون قوڭىراۋىنا جاۋاپ بەرمەي، مۇلدە جوعالىپ كەتتى.
«جەدەل- ىزدەستىرۋ شارالارى بارىسىندا پوليتسيا قىزمەتكەرلەرى بۇرىن سوتتالعان جۇمىسسىز 23 جاستاعى قالا تۇرعىنىن ۇستادى. جاۋاپ الۋ كەزىندە ول كىناسىن مويىنداپ، اقشانى جەكە قاجەتتىلىكتەرىنە جۇمساعانىن ايتتى»، - دەيدى ش ق و پ د باستىعى ساعات ماديەۆ. تەرگەۋ بارىسىندا ونىڭ قۇقىق قورعاۋ ورگاندارىنا ەشقانداي قاتىسى جوق ەكەندىگى انىقتالدى. قازىرگى ۋاقىتتا اتالعان فاكتى بويىنشا ق ر قىلمىستىق كودەكسىنىڭ 190-بابى 1-بولىگىمەن سوتقا دەيىنگى تەرگەۋ امالدارى جۇرگىزىلۋدە.