تاسجول جوندەلگەن سوڭ الماتىدان نۇر-سۇلتانعا قانشا ۋاقىتتا جەتۋگە بولادى؟

نۇر-سۇلتان. قازاقپارات - «قازاۆتوجول» ۇ ق ا ق وكىلدەرى تاسجولداعى جوندەۋ جۇمىستارى اياقتالعان سوڭ جۇرگىزۋشىلەر الماتىدان نۇر-سۇلتانعا قانشا ۋاقىتتا جەتە الاتىنىن ايتتى.

«قازاۆتوجول» مالىمەتىنشە، قازىرگى ۋاقىتتا جولدىڭ بىرنەشە ۋچاسكەسىندە قۇرىلىس جۇمىستارى ءجۇرىپ جاتىر.

«قازىر بارلىق جەردە جوندەۋ جۇمىستارى ءجۇرىپ جاتىر. جوسپار بويىنشا كۇرتى - بۋرىلبايتال - بالقاش تاسجولىنىڭ بولىگىن جوندەۋ جۇمىستارى 2022-جىلى اياقتالادى. بۇل ۋچاسكە وسى كەزەڭدە پايدالانۋعا بەرىلەدى دەگەن ءسوز. وسى كەزەڭدە وندا قوزعالىسقا كەدەرگى كەلتىرمەيتىن بەلگىلەر ورناتىلۋى مۇمكىن»، - دەدى «قازاۆتوجول» باسقارما ءتوراعاسى ۇلان ءالىپوۆ.

ونىڭ ايتۋىنشا، بارلىق قۇرىلىس جانە جوندەۋ جۇمىسى اياقتالعاننان كەيىن الماتىدان نۇر-سۇلتانعا دەيىنگى جول ايتارلىقتاي قىسقارادى.

«قازاقستاندا ساعاتىنا 120 شاقىرىم جىلدامدىق ساقتاۋ تۋرالى شەكتەۋ بار. ال الماتى مەن نۇر-سۇلتان اراسىنداعى جول شامامەن 1200 شاقىرىم. دەمەك ماكسيمال رۇقسات ەتىلگەن جىلدامدىقتا 10 ساعاتتا جەتۋگە بولادى. ءبىراق بۇل جۇرگىزۋشى جولدا توقتاماي جانە جىلدامدىقتى ازايتپايتىنىن ەسكەرگەن جاعدايدا»، - دەيدى ءالىپوۆ.

Tengrinews.kz