بەيجىڭدە تىكەلەي حالىقارالىق رەيستەر توقتاتىلۋى مۇمكىن
مۇنداي مالىمدەمەنى بەيجىڭ قالاسى حالىقتىق ۇكىمەتىنىڭ رەسمي وكىلى سيۋي حەتسزيان جاسادى، دەپ حابارلايدى قازاقپارات ءتىلشىسى.
ونىڭ ايتۋىنشا، قانداي دا ءبىر رەيستىڭ بەس جولاۋشىسىنان كوروناۆيرۋس انىقتالسا، بەيجىڭگە قوناتىن مۇنداي تىكەلەي حالىقارالىق اۋە رەيستەر ۋاقىتشا توقتاتىلىپ، قونۋ ورنى قىتايدىڭ باسقا قالالارىنا اۋىستىرىلادى. جۇما كۇنى پاكىستاننان تىكەلەي حالىقارالىق رەيسپەن بەيجىڭگە كەلگەن 23 جاستاعى جولاۋشىدان كوروناۆيرۋس انىقتالدى. ونىمەن تىعىز بايلانىستا بولعان 38 ادام وقشاۋلانىپ، مەديتسينا قىزمەتكەرلەرى باقىلاۋىنا الدى.
ەسكە سالا كەتسەك، قىتاي استاناسىنا قوناتىن حالىقارالىق رەيستەر 164 كۇندىك ۇزىلىستەن كەيىن 3- قىركۇيەكتە جۇمىسىن قايتا جانداندىرعان بولاتىن.
استانا بيلىگىنىڭ حابارلاۋىنشا، بەيجىڭگە كەلەتىن تىكەلەي حالىقارالىق رەيس جولاۋشىلارى رەيستەر ۇشىپ شىعاتىن ەلدىڭ ازاماتى نەمەسە ق ح ر ازاماتى بولۋى كەرەك. ءۇشىنشى مەملەكەت ازاماتتارىنا مۇنداي رەيسپەن بەيجىڭگە كەلۋگە تىيىم سالىنعان.