نۇر-سۇلتاندا كوپىر استىنان سپورتپەن اينالىساتىن الاڭقاي اشىلدى

نۇر-سۇلتان. قازاقپارات - ل. ن. گۋميليەۆ اتىنداعى ە ۇ ۋ ماڭىنداعى ءۇش مىڭ شارشى مەترگە جۋىق جاڭا كوپىر الاڭى اباتتاندىرىلدى.

بۇل تۋرالى نۇر-سۇلتان قالاسى اكىمى التاي كولگىنوۆ ءوز «ينستاگرام» پاراقشاسىندا جازدى، دەپ حابارلايدى اكىمدىكتىڭ رەسمي سايتى.

«تۇرعىندارىمىز بەن ەلوردا قوناقتارى ءۇشىن تاعى ءبىر كوپىراستى كەڭىستىك (ل. ن. گۋميليەۆ اتىنداعى ە ۇ ۋ ماڭى) اشىلدى. ول ءۇشىن 3 مىڭعا جۋىق شارشى مەتر جەر اباتتاندىرىلدى. جاڭا قوعامدىق كەڭىستىك ەكى بولەك ورنالاسقان ۇلكەن اۋماقتان تۇرادى. بۇل - باسكەتبول جانە ۆوركاۋت الاڭدارى. جاس تۇرعىندارىمىزدىڭ ءوتىنىشى بويىنشا سكەيت-الاڭ اشىلىپ، تەننيس ۇستەلى ورناتىلدى. سۋرەتشىلەرىمىز دە قابىرعالارعا تانىمال سپورتشىلاردى بەينەلەپ، ول دا وزىندىك ءسان بەرىپ تۇر. بۇل - بالالاردىڭ كوز الدىندا ولارعا رۋح بەرىپ، وزدەرىنە سەنىمدى بولۋى ءۇشىن ۇلگى بولارلىقتار كورىنىس. ويتكەنى كاسىبي ارەنالارعا اپاراتىن جول جانە سالاۋاتتى ءومىر سالتىن قالىپتاستىرۋ اۋلاداعى سپورتتان باستالاتىنى بەلگىلى. ول ءۇشىن بيىل 150 اۋلا مەن 50 قوعامدىق كەڭىستىكتى اباتتاندىرامىز. وسىنىڭ ءوزى بىزگە 300 مىڭنان اسا ادامنىڭ سپورتپەن اينالىسۋىنا جايلى جاعداي جاساۋعا مۇمكىندىك بەرەدى. بۇدان بولەك، 3 تۇرعىن الاپتا ۇلكەن سپورت كەشەنىنىڭ قۇرىلىسى ءجۇرىپ جاتىر. سول سياقتى ءبىرقاتار سپورت نىسانىنا جوندەۋ جۇرگىزىلەدى. كارانتين بىزگە دەنساۋلىققا اسا ءمان بەرىپ، يممۋنيتەتىمىزدى كوتەرىپ، سپورتپەن اينالىسۋ كەرەكتىگىن كورسەتتى»، - دەپ جازدى التاي كولگىنوۆ.