ءاربىر قازاقستاندىق قورشاعان ورتاعا دەگەن جاۋاپكەرشىلىگىن سەزىنۋى ءتيىس - ماۋلەن اشىمبايەۆ
مۇنداي پىكىردى ق ر پارلامەنتى سەناتىنىڭ ءتوراعاسى ماۋلەن اشىمبايەۆ ءبىلدىردى، دەپ حابارلايدى قازاقپارات ءتىلشىسى.
«بۇگىن - حالىقارالىق تازالىق كۇنى. وسىناۋ ۇلكەن حالىقارالىق باستامانى مەملەكەتتىك ەمەس ۇيىمدار كوتەرىپ، سوڭعى 10 جىلدان استام ۋاقىت بويى بۇكىل الەمدە قىركۇيەك ايىنىڭ ىشىندە وسىنداي شارالار وتۋدە. مىسالى، وتكەن جىلى حالىقارالىق تازالىق كۇنىنە 180 مەملەكەتتە 20 ميلليوننان استام ادام قاتىسقان. بۇگىن ەكولوگيا مينيسترلىگىنىڭ جانە ەلوردا اكىمدىگىنىڭ باستاماسىمەن وسىنداي جاقسى شارا ءوتىپ جاتىر. ءبىر جاعىنان تۇرمىستىق قاتتى قالىقتاردان ساياباقتارىمىزدى، كوشەلەرىمىزدى تازارتساق، ەكىنشى جاعىنان اعاش وتىرعىزۋدامىز. بۇل قۇپتارلىق باستاما. جالپى، قورشاعان ورتانى قورعاۋ ءبىزدىڭ باستى باسىمدىقتارىمىزدىڭ ءبىرى. پرەزيدەنتىمىز جولداۋىندا دا وسى ماسەلەگە ۇلكەن كوڭىل بولگەنىن بىلەسىزدەر»، - دەدى سەنات ءتوراعاسى «World clean up day» - «بۇكىل الەمدىك تازالىق كۇنى» اكسياسى بارىسىندا.
وسى رەتتە ماۋلەن اشىمبايەۆ مەملەكەت باسشىسى جىلدىڭ سوڭىنا دەيىن جاڭا ەكولوگيالىق كودەكس قابىلداۋدى تاپسىرعانىن، وندا اتالعان سالاداعى پروبلەمالاردى شەشۋگە قاتىستى شارالار قامتىلاتىنىن اتاپ ءوتتى.
پرەزيدەنتىمىزدىڭ باستاماسىمەن ورماندارىمىزدا 2 ميللياردقا جۋىق، قالالاردا 15 ميلليون اعاش وتىرعىزىلاتىندىعىن ەسكە سالدى.
«بۇل ۇلكەن باستاما. ال بۇگىن وسىناۋ ۇلكەن باستامانىڭ تۇساۋكەسەرى ەلوردامىزدا ءوتىپ جاتىر دەسەك، ارتىق ايتقاندىق ەمەس. جالپى، الداعى ۋاقىتتا وسى باعىتتا كوپ جۇمىس اتقارۋىمىز كەرەك. زاڭدار دا قابىلدانۋى ءتيىس. وسى باعىتتاعى جۇمىستى دەپۋتاتتار دا جالعاستىرادى. قورشاعان ورتانى قورعاۋ تەك مەملەكەتتىك ورگانداردىڭ ماقساتى مەن مىندەتى ەمەس. ويتكەنى، قوعام مەن مەملەكەتتىك ورگانداردىڭ جۇمىسىن بىرىكتىرگەندە عانا جۇمىس ناتيجەلى بولادى. سوندىقتان ءاربىر قازاقستاندىق قورشاعان ورتاعا دەگەن جاۋاپكەرشىلىگىن سەزىنۋى ءتيىس. تابيعات بايلىعىن قورعاۋ، ايالاۋ، تابيعاتقا دەگەن دۇرىس كوزقاراس اتا- بابامىزعا ءتان قاسيەت. قازاق حالقى ەجەلدەن تابيعاتپەن ۇلەسىمدى تىرشىلىك ەتكەن»، - دەدى سەنات سپيكەرى.
ايتا كەتەيىك، شاراعا ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ، ەلوردا اكىمى التاي كولگىنوۆ، ق ر پارلامەنتى سەناتى مەن ءماجىلىسىنىڭ دەپۋتاتتارى، ەرىكتىلەر، مەملەكەتتىك قىزمەتشىلەر جانە قالا تۇرعىندارى قاتىسىپ جاتىر.