رەسەيدە ادام ۇرلاعانى ءۇشىن ىزدەۋدە بولعان قىلمىسكەر نۇر-سۇلتاننان ۇستالدى

نۇر-سۇلتان. قازاقپارات - ەلوردا پوليتسەيلەرى ت م د قۇقىق قورعاۋشىلارىمەن بىرلەسىپ، 16-17- قىركۇيەك ارالىعىندا «ىزدەۋ» كەڭ كولەمدى شاراسىن وتكىزدى.

بۇل تۋرالى قازاقپارات نۇر-سۇلتان قالاسىنىڭ پوليتسيا دەپارتامەنتىنە سىلتەمە جاساپ حابارلايدى.

ءتارتىپ ساقشىلارى ەكى كۇننىڭ ىشىندە 22 قىلمىسكەردى ۇستاعان، سونىڭ ىشىندە جەتەۋى كورشى ەلدەر - رەسەي، قىرعىزستان جانە وزبەكستاندا ىزدەۋدە بولعان. ءىز-ءتۇسسىز جوعالعان 9 ادامنىڭ جۇرگەن جەرى انىقتالدى.

رەسەيدىڭ ورىنبور وبلىسىندا ادام ۇرلاعانى ءۇشىن ىزدەۋدە بولعان 33 جاستاعى قازاقستاندىق ازامات نۇر-سۇلتاننان ۇستالعان.

ۇستالعان كەزدە ەر ادام جاسالعان قىلمىسقا قاتىسى جوق ەكەنىن ايتقان.

الايدا رەسەيدەگى ارىپتەستەرىمەن بايلانىسقا شىققان قازاقستاندىق ءتارتىپ ساقشىلارى ولاردان ايعاق قۇجاتتار الىپ، ەر ادامدى قاماۋعا الدى.