قاتەرلى دەرتكە شالدىققان بالالارعا كوروناۆيرۋس قاۋىپتى مە - ونكوگەماتولوگ جاۋابى
دارىگەردىڭ ايتۋىنشا، قاتەرلى ىسىككە قارسى بەلسەندى ەمدەۋ ساتىسىندا تۇرعان كەز كەلگەن ونكولوگيالىق ناۋقاس جوعارى قاۋىپ توبىنا جاتادى. كوروناۆيرۋس ينفەكسياسىنىڭ قوسىلۋى جاعدايدى ناشارلاتۋى مۇمكىن.
«ءبىزدىڭ پاتسيەنتتەرىمىز ينفەكسيا جانە اۋرۋدىڭ اۋىر اعىمى تۇرعىسىنان جوعارى قاۋىپ توبىنا جاتادى. ەگەر ەمدەۋدىڭ اسقىنۋلارى بولسا، قاۋىپ ارتادى. ىندەت باستالىپ، ۇدەگەن كەزدە ءبىزدىڭ ورتالىقتا 20 بالا كوروناۆيرۋسپەن اۋىردى. بۇل بالالار حيميوتەراپيا الادى جانە ەمدەۋ كۋرستارى اراسىنداعى ءۇزىلىس كەزىندە ۇيلەرىنە بارادى. ءدال سول كەزدە ولار ۆيرۋس جۇقتىرىپ العان سياقتى. ءبىز ك ۆ ي جۇقتىرعان بالالاردى جۇقپالى اۋرۋلار اۋرۋحاناسىنا جىبەرمەۋ جونىندە شەشىم قابىلدادىق، ويتكەنى قاتەرلى ىسىكپەن اۋىراتىندار ارنايى ەمدەۋ مەن ەرەكشە كۇتىمدى قاجەت ەتەتىن وسال توپتاردىڭ ءبىرى سانالادى. سوندىقتان ءبىز ورتالىقتا كوروناۆيرۋس جۇقتىرعان بالالار ءۇشىن جەكە ينفەكسيالىق بوكس اشتىق، وسىلايشا ولاردى باسقا بالالاردان تولىعىمەن وقشاۋلاي الدىق. باقىتىمىزعا وراي، بۇل بالالاردىڭ كوپشىلىگى اۋرۋدىڭ جەڭىل تۇرىمەن اۋىردى»، - دەدى ريزا بورانبايەۆا.
دارىگەر تۇسىندىرگەندەي، بەس بالادا كوروناۆيرۋس اۋرۋى اسقىنىپ كەتتى.
«اسقىنۋى بار بالالار رەانيماتسيا جاعدايىندا قارقىندى ەم الدى. ولار دارىگەردىڭ قاتاڭ باقىلاۋىندا بولدى. قازىرگى ۋاقىتتا بۇل ناۋقاستاردىڭ جاعدايى جاقسى. بارلىق بالالار كوروناۆيرۋس ينفەكسياسىنان تولىق ايىعىپ، قازىر قاتەرلى ىسىك اۋرۋىنان نەگىزگى ەمدەرىن جالعاستىرۋدا»، - دەدى دارىگەر.
سونىمەن قاتار، ريزا بورانبايەۆا پەدياتريا جانە بالالار حيرۋرگياسى عىلىمي ورتالىعىندا قازىرگى ۋاقىتتا بالالارداعى كوروناۆيرۋس ينفەكسياسىنا قاتىستى ەكى عىلىمي تاقىرىپ زەرتتەلىپ جاتقاندىعىن جەتكىزدى.
«بيىل ءبىزدىڭ دوكتورانتتار قازىرگى ىندەتكە بايلانىستى ەكى عىلىمي جۇمىستى قولعا الدى. عىلىمي زەرتتەۋ تاقىرىپتارى COVID-19 راستالعان انالاردان تۋعان نارەستەلەردەگى اسقىنۋلاردىڭ جيىلىگىنە COVID-19-دىڭ اسەرىن زەرتتەۋگە باعىتتالعان. سونداي-اق، يممۋنوسۋپرەسسيۆتى تەراپيا اياسىندا جانە ونسىز COVID-19 عا شالدىققان بالالاردىڭ جاسۋشالىق جانە گۋمورالدىق جاۋاپتارىنىڭ كورسەتكىشتەرىن سالىستىرمالى تالداۋ»، - دەدى ريزا بورانبايەۆا.
اۆتور: الما مۇقانوۆا