قاراسايلىق شەنەۋنىكتىڭ ارەكەتى قاسكەلەڭ تۇرعىندارىنىڭ شامىنا ءتيدى

نۇر-سۇلتان. قازاقپارات - ق ر مەملەكەتتىك قىزمەت ىستەرى اگەنتتىگىنىڭ ءتوراعاسى انار جايىلعانوۆا تەمەكى تۇقىلىن لاقتىرعان قاراساي اكىمدىگى قىزمەتكەرىنىڭ ءىسىن جاۋاپتى دەپارتامەنت تەكسەرىپ جاتقانىن ءمالىم ەتتى، دەپ حابارلايدى قازاقپارات ءتىلشىسى.

ەسكە سالا كەتسەك، بۇعان دەيىن الماتى وبلىسى قاراساي اۋدانى اكىمدىگىنىڭ مامانى جەلى قولدانۋشىلاردىڭ نارازىلىعىن تۋعىزعانى تۋرالى اقپارات تاراعان ەدى.

جەلىگە تاراعان ۆيدەودان تۇرعىنداردىڭ ەر ازاماتقا شاعىمىن ايتىپ، نارازىلىق ءبىلدىرىپ جاتقانىن كورۋگە بولادى. سول ساتتە تەمەگى شەگىپ تۇرعان ول تەمەكى تۇقىلىن جەرگە لاقتىرا سالادى. تۇرعىننىڭ ءبىرى ونىڭ ارەكەتىنە اشۋلانىپ، «بالالار الاڭىنا تەمەكى تۇقىلىن لاقتىرىپ، ەتيكانى ساقتامادىڭ» دەپ شۇيلىگەدى. بەيادەپ قىلىق كورسەتكەن ادام قاراساي اۋدانى اكىمدىگىنىڭ تۇرعىن ءۇي كوممۋنالدىق شارۋاشىلىعى ءبولىمىنىڭ مامانى بولىپ شىققان. مەملەكەتتىك قىزمەتشىنىڭ بۇل قىلىعىنا بايلانىستى ۆيدەودان انار جايىلعانوۆا حاباردار ەكەنىن ءمالىم ەتتى.

«ءيا، ءبىز بۇل وقيعادان حاباردارمىز. بىزدە مەملەكەتتىك قىزمەت سالاسىن باقىلاۋ جونىندەگى دەپارتامەنت بار. بۇل دەپارتامەنت اتالمىش ماسەلەمەن اينالىسىپ جاتىر. ول اقپارات بۇگىن شىقتى. ءبىز دە ول ماسەلەمەن جۇمىس جۇرگىزەمىز»، - دەدى انار جايىلعانوۆا.

اۆتور: ايان بەكەن ۇلى