نەسيە راقىمشىلىعىن جاساماساق، ەكونوميكا قۇلدىراۋعا ۇشىرايدى - ايقىن قوڭىروۆ

نۇر-سۇلتان. قازاقپارات - قازاقستان كوممۋنيستىك حالىق پارتياسى حالىققا نەسيە راقىمشىلىعىن جاساۋ باستاماسىنا بايلانىستى ەلوردادا وتىرىس وتكىزدى، دەپ حابارلايدى قازاقپارات ءتىلشىسى.

«كەشە وزدەرىڭىز بىلەتىندەي، ءبىز حالىقتىڭ، شاعىن جانە ورتا بيزنەستىڭ نەسيەگە باتىپ كەتكەنىن ايتىپ، ۇكىمەتكە ساۋال حات جولداعان ەدىك. ءبىز جالپى حالىقپەن ەتەنە جۇمىس جۇرگىزەمىز. كوبىنىڭ ماسەلەسىنەن حابارىمىز بار. ازاماتتاردىڭ كوبى نەسيە جۇكتەمەسىنە بايلانىستى قينالاتىنىن ايتادى. سەبەبى حالىقتىڭ ىشىندە 4-5 بانكتە قارىزى بار ازاماتتار بار. ولاردى وتەۋ تىم قيىن. حالىقتىڭ كوبى وسىنداي تىعىرىقتا تۇر»، - دەيدى ق ك ح پ وك حاتشىسى، ق ر پارلامەنتىندەگى اتالمىش پارتيا فراكسياسىنىڭ جەتەكشىسى ايقىن قوڭىروۆ ق ك ح پ نۇر-سۇلتان قالالىق كوميتەتىنىڭ كەڭسەسىندە وتكەن وتىرىستا.

ونىڭ ايتۋىنشا، قازىرگى زاڭناماعا سايكەس ازاماتتاردىڭ العان قارىزى ءۇشىن بانكتەر مەن ميكروقارجىلىق ۇيىمداردىڭ الدىنداعى جاۋاپكەرشىلىگى كۇشەيگەن. قارجىلىق ينستيتۋتتار قايتارىلماعان قارىزدار ءۇشىن ازاماتتاردىڭ قۇقىعىن شەكتەي الادى.

«كەيبىر قارجىلىق ينستيتۋتتار ازاماتتاردىڭ ەل ىشىندە قوزعالىسىن شەكتەۋگە دەيىنگى قۇزىرەتكە يە بولعان. ءتىپتى پويىز بەن ۇشاققا وتىرعىزباۋعا دەيىنگى جاعدايلار كەزدەسەدى. مۇنىڭ اقىرى ەكونوميكانى دەگراداتسياعا ۇشىراتىنىن ەسكەرۋ كەرەك»، - دەدى ول. ايقىن قوڭىروۆتىڭ سوزىنە سەنسەك بانك سەكتورىنىڭ ەكونوميكانىڭ شىنايى سەكتورىنداعى كۇشى باسىم.

«ەكونوميستەردىڭ ايتۋىنشا بۇل جاعداي قازىر ءوزىنىڭ لوگيكالىق تۇيىنىنە تاقاپ قالعان. وتكەن عاسىردا باتىس ەلدەرىنىڭ بانكيرلەرى مەن كاپيتاليستەرى ەكونوميكانىڭ باسىم بولىگىنىڭ نەسيەگە باتۋ ماسەلەسىمەن بەتپە- بەت كەلگەن. الايدا كەيىن سوۆەت بيلىگى قۇلاپ قالدى دا، جاڭا نارىقتارعا جول اشىلدى. تيىسىنشە ولار بۇل جۇيەنى جالعاستىرۋ مۇمكىندىگىنە يە بولدى. ءبىراق بىزدەگى جاعدايدى ويلايىق. قازىر قازاقستان حالقىنىڭ 90 پايىزىندا نەسيە بار. قازىر كوپ ادامدا ەندى نەسيە الاتىن جاعداي دا جوق. سەبەبى جاڭادان قارىز الۋ ءۇشىن ەسكىسىن جابۋىڭ كەرەك. ال ەسكى نەسيەنى جابۋ ءۇشىن تابىسىڭ بولۋى ءتيىس. ال دەۆالۆاتسياعا بايلانىستى حالىقتىڭ تابىسى ءتۇسىپ كەتتى. سول سەبەپتى حالىقتا ونى جابار شاما دا جوق»، - دەيدى ول.

ەسكە سالا كەتسەك كەشە ءماجىلىستىڭ جالپى وتىرىسىندا «حالىق كوممۋنيستەرى» فراكسياسىنىڭ دەپۋتاتتارى اتىنان ۇكىمەت باسشىسى اسقار مامينگە ساۋال جولداعان بولاتىن. ولاردىڭ ايتۋىنشا ەلدە شەكتەۋ شارالارى ەنگىزىلگەنگە دەيىن تۇراقتى تۇردە سالىق تولەگەنىمەن، قازىر وبەكتيۆتى سەبەپتەرگە بايلانىستى نەسيەلەرگە قىزمەت كورسەتۋ بويىنشا كۇردەلى جاعدايعا تاپ بولعان جەكە جانە زاڭدى تۇلعالار ءۇشىن كەڭ اۋقىمدى نەسيە راقىمشىلىعىن جۇرگىزۋ قاجەت.

اۆتور: ايان بەكەن ۇلى