09:30, 17 - قىركۇيەك 2020 | GMT +6
الماتىدا دارىگەرلەر جاڭا تۋعان نارەستەنىڭ جۇرەگىنە كۇردەلى وتا جاسادى
الماتى. قازاقپارات - الماتىداعى پەريناتالوگيا جانە بالالار كارديوحيرۋرگياسى ورتالىعىنىڭ دارىگەرلەرى تۋعانىنا 10 كۇن بولعان بالاعا وتا جاسادى، دەپ حابارلايدى قازاقپارات ءتىلشىسى.
نارەستە تۋا ءبىتتى اقاۋمەن دۇنيەگە كەلگەن. بالانىڭ جۇرەگىنىڭ اورتاسى اشىق تۇرعاندىقتان تامىر جاراقاتىن الۋ قاۋپى ءتوندى.
«ءسابي ءولىم مەن ءومىردىڭ ورتاسىندا تۇرعاندىقتان شۇعىل وتا جاسالدى. وپەراتسيا 2 ساعاتقا سوزىلعان. قازىر ناۋقاستىڭ جاعدايى ءبىر قالىپتى» دەيدى ورتالىقتىڭ ديرەكتورى عاني بودىقوۆ.
بالانىڭ ءومىرىن اجالدان اراشالاپ قالۋ ءۇشىن جانساقتاۋ بولىمىندە 27 دارىگەر كۇرەسكەن. قازىر شاقالاقتىڭ جاعدايى الدەقايدا جاقسى. سوندىقتان پالاتاعا، اناسىنىڭ قاسىنا اۋىستىرىلدى.